కేవలం ఒక్కసారికే పనికి వచ్చే - పర్యావరణ ధ్వంసకమయ్యే ప్లాస్టిక్ ల వాడకం మానేద్దాం!
2538* వ (ఆదివారం) నాటి వీధి పారిశుద్ధ్యం.
ఆ వీధి శుభ్రతైతే 4.20 కే మొదలయింది! ఈ వేకువైతే – 43 మందికి అందులో ప్రమేయం ఉన్నది! అది జరిగిన సినిమా ప్రదర్శన శాల ప్రాంతం నుండి బహుశా ఒక్కరికే – పూల బుజ్జి భార్యామణి (వార్డు ప్రతినిధి) గారే పాల్గొన్నారు! రామానగరం, లంకపల్లి, మొవ్వ, శివరామ పురం వంటి గ్రామేతరుల కృషి అందులో ఉన్నది! స్వచ్చ-శుభ్రతా ప్రయత్నంకాక కనీసం 20 పూల మొక్కలతో ఉప వీధిని సింగారించడమొక విశేషం!
మరి – ఇన్ని ఊళ్ల నుండి- ఇందరు – ఇంత వేకువ చీకటిలో – ఈ వీధికి – ఈ పాటి సేవలందిచడమెందుకో, నా ఊరి సోదరులు మైకు పాటల్ని పట్టించుకోక – శ్రమదాన సందడికి దూరంగా – అంటీ ముట్టక ఉండిపోవడ మేమిటో గట్టిగా ఆలోచించవలసింది నాతో బాటు నా గ్రామస్తులూ- ముఖ్యంగా బైపాస్ వీధి నివాసులూ! మనం పోటీ పడవలసింది – వీధుల్ని ఫ్లెక్సీలతో నింపడంలో కాదు, వీధి ఉద్యానాలను చెడగొట్టడంలో కాదు, మనం బ్రతికే ఊరి సమస్యల్ని పెంచడంలోనో – వీధి మార్జిన్ల ను దురాక్రమించడం లోనో కానేకాదని మనవి!
అసలు ఇది ‘ స్వచ్చ సుందర చల్లపల్లి’ అనీ, దాన్ని సాధిస్తున్నదొక శ్రమ సుందరోద్యమమనీ, 2538* నాళ్లుగా అలుపెరుగని కార్యకర్తల 4 లక్షల పని గంటల ప్రయత్నం ఎందుకనీ – కొన్ని నిముషాలైనా స్తిమితంగా ఆలోచించలేమా? ఆపాటి ఆలోచనతో పోయేదేముంది – మనోమాంద్యం తప్ప? వీలైన రోజుల్లో స్వచ్చ కార్యకర్తలతో కలిస్తే పోయేదేముంది- చిన్న చిన్న ఆంతరంగిక, శారీరక అనారోగ్య సమస్యలు తప్ప?
మరి ఇందుకు గాదూ – ఇన్ని ఊళ్ల, ఇన్ని వర్గాల, పగలు తీరిక చిక్కని ఇందరి ఉద్యోగుల- వృద్ధుల- మహిళల- వైద్యుల ఈ బ్రహ్మ ముహూర్తపు నిత్య సేవలు?
40 మందికి పైగా సాగర్ హాలు పరిసరంలో చేసిన కాయకష్టం తో:
- మరింత వీధి భాగం చూడబుద్ధి అవుతున్నది.
- ఇంకొక్క పూట శ్రమిస్తే సినిమా హాలు దాక పూల మొక్కల సింగారం పూర్తి కావచ్చు- బహుశా అది మంగళవారమే కావచ్చు.
6. 25 కాలంలో ఒక సంతృప్తిదాయక సమావేశం విశేషాలు:
1) లంకపల్లి మూలం గల – మొవ్వ నివాసి – శొంఠి శ్రీనివాస గురూజీ తన కుమార్తె జన్మదిన వేడుకను ఈ నిస్వార్థ శ్రమ జీవుల మధ్యనే జరిపి, సకుటుంబంగా పూల మొక్కలు నాటి, చల్లపల్లి స్వచ్చోద్యమానికై 5000/- విరాళం సమర్పించిన ఒక సముచిత ఆదర్శం!
2) గాయకుల శ్రమదాన కీర్తనా గానం,
మంగళ వారం నాటి వీధి పారిశుద్ధ్యం సైతం ఈ బైపాస్ మార్గంలోనే!
కావిస్తాం ప్రణామాలు – 166
ఏ కాలంలో గానీ – ఏ దేశంలో గానీ
ఎవరొ ఉద్ధరించాలని ఎదురు చూడకుండ – స్వయం
శక్తి నె నమ్ముచు ముందుకు సాగు బాధ్యులున్న చాలు-
ఆ చొరవ కె – చేతన కే అందిస్తాం ప్రణామం!
- నల్లూరి రామారావు,
18.09.2022.