పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్ ల వాడకం మానేద్దాం!
31 మంది బాధ్యులతో 2570* వ నాటి వీధి మెరుగుదల.
ఆదివారం వేకువ (23-10-22) కూడ అమరవీరుల స్థూపం దగ్గరే వాళ్ళు ఆగారు. 4.20 - 6.12 నడుమ అక్కడి నుండి కాసానగర్ దిశగానే వారి రహదారి శుభ్ర - సుందరీకరణ కృషి కొనసాగింది. ప్రధానంగా పడమటి ప్రక్కనే సదరు కృషి జరిగినా, అమర చిహ్నం బైట గుబురు పొదలు కూడ అదృశ్యమై అది ఏ 100 అడుగుల రహదారిగానో అనిపిస్తున్నది.
అవనిగడ్డ బాటకు తూర్పు దిక్కున పనిచేసినది ఏడెనిమిది మంది కత్తుల - దంతెల పనివారు! అందులో ముగ్గురైతే పనిలో మునిగి నడుము ఎత్తడం కూడ మరచినవారు! ఆ పొదల్లో – చీకట్లో – ప్రామాదికమైన ఏ జీవజంతువులుంటాయో అని శంకించినది నాబోటివారు! ఈ ఔత్సాహికలు మాత్రం నిస్సంకోచంగా - 20 మందికి నిరంతరాయంగా తమ గంట కాలం పని ముగించారు.
పైగా రెండు రకాల కృషి దారికి పడమర దిక్కు గానే చేశారు –
1) గడ్డినీ, పిచ్చి చెట్లను నరికి, కొన్ని పాదుల్ని బాగుచేసి, ఇతర వ్యర్ధాలను తొలగించినది.
2) బాట – మార్జిన్ ను అతిక్రమించిన చెట్ల కొమ్మల్నీ, ఏమంత అందంగా లేని పూల మొక్కల కాడల్నీ చాకచక్యంగా – ఒడుపుగా తొలగించిన సుందరీకరణ ప్రయత్నం! (అందులో కొన్ని ముళ్ల - పూల ముక్కలుండి, ఒక సుందరీకర్తకూ, ట్రస్టు కార్మిక సమన్వయ కర్తకూ వ్రేళ్లు గాయపడిన వైనం!)
నేటి 30 మందికి పైగా శ్రమదాతల్లో ఐదారుగురు మరీ సందడి రాయుళ్ళు! పనితో బాటు పాటల చరణాలతో - మాటలతో - సామెతలతో తోటి వాళ్లను హుషారెక్కిస్తారన్నమాట!
వీళ్ళ వైఖరికి భిన్నంగా ఇంకో ముగ్గురుంటారు - వాళ్లు మరీ నిశబ్ద కర్మిష్టులన్న మాట! పనిలో మునిగి - రెండు మార్లు పిలిచినా వినిపించుకోని మరీ మితభాషులు!
ఈ ఎనిమిదేళ్ల స్వచ్చ – సుందరోద్యమ పయనంలో – ఎప్పుడైనా గాని పాలు పంచుకొన్న 200 మంది మిత్రుల్లో - గుర్తు తెచ్చుకొంటే - ఎన్ని ప్రత్యేక మనస్తత్త్వాలో! ఎంతెంత శ్రమదాన ఔచిత్యాలో!
6.25 కు గాని సాధ్యపడని ముగింపు సభలో:
1) సొంతూరి స్వచ్చ – పరిశుభ్ర – సౌందర్య సంకల్ప నినాదాలిచ్చే అవకాశం తోట నాగేశ్వరునిది!
2) కారకర్తల పట్ల తరగని ప్రేమతో తన పుట్టినరోజు వంకతో (తినుబండారాల పంపకం కోసం ఈయనకు రెండో - మూడో పుట్టిన రోజులొస్తాయి!) మిఠాయిలు తినిపించినది భౌతికంగా చాలా దూరాన ఉన్న ప్రాతూరి ఉదయ శంకర శాస్త్రీజీ!
3) కారణముందో లేదో గాని - నిన్న అందరికీ బిస్కట్ల పొట్లాల ప్రదాత ఆకుల దుర్గా ప్రసాదు!
(ఏ సవరణా లేకుంటే) - బుధవారం వేకువ శ్రమదాన ప్రదేశం మళ్ళీ నాగాయలంక బాటలోనే!
ఏ బంధుత్వము కలదని
ఏ బంధుత్వము కలదని? ఋణాను బంధం ఉందని?
ఎవ్వరు బ్రతిమాలారని? ఏ మొహమాటంతోనని!
ఇంతమంది – ఇంతకాల మీ ఊరిని అర్చించుట –
ఈ ప్రజలను దీవించుట - ఈ సంస్కృతి సృష్టించుట.....?
- నల్లూరి రామారావు,
23.10.2022.