పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్ ల వాడకం మానేద్దాం!

మళ్ళీ గాంధీ స్మృతి వనం సుందరీకరణలో - @2592^*

            మంగళవారం (15-11-22) వేకువ సైతం 4.19 కే స్వచ్ఛ కార్యకర్తలకు ముహూర్తం కుదిరింది. బెజవాడబాటలోని మహాత్ముని సాక్షిగా వారి స్వచ్ఛ – సుందర శ్రమదానం 6.07 కి - తలా 100 నిముషాలు మొత్తంగా 25 మంది – 2500 నిముషాల పాటు – అదొక శ్రమ వినోదమన్నమాట! ‘వినోదం’ అనే అగత్యం ఎందుకొచ్చిందంటే :

            వాట్సప్ ఫొటోలు, వీడియోలు గనుక శ్రద్ధగా చూస్తే – వింటే – ఆ మాటకర్ధం తెలిసిపోతుంది. ధనం కోసం, కీర్తి కోసం పనిచేసినట్లుగా అదృశ్య శ్రవణాల్లో అనిపిస్తున్నదా? లేక - పరమ సంతోషంగా ఒక పాతిక మంది పాతిక వేల గ్రామస్తులకు సామాజిక బాధ్యతను గుర్తు చేస్తూ – తమ కర్తవ్యాన్ని అవలీలగా నెరవేరుస్తున్నట్లుందా?

            పైగా ఇదేదో ఒకనాటి – ఒక ఏటి ముచ్చటా? 8 - 9 ఏళ్ల - అక్షరాలా 2592^* నాళ్ల - ఎంత చూసినా తనివి తీరని శ్రమవేడుక! మరి - ఈ వేడుక నిర్వాహకులెవరు? సౌమ్యులే గాని – గ్రామ కాలుష్యం పట్ల కఠినాత్ములూ, లబ్ద ప్రతిష్టులేగాని - ఉద్యోగ, వైద్య, రైతు ప్రముఖులే గాని, మురుగులు చేతుల్తో తోడే – రోడ్లను చీపుళ్లతో ఊడ్చే మట్టి మనుషులు! (వీళ్లలో ఒకామె బెజవాడ జరూరు ప్రయాణమున్నా – గంటైనా శ్రమ నియమం పాటించి వెళ్లింది!)

            ఊళ్లో వారు సీరియస్ గా ఆలోచించరు – పట్టించుకోరు గాని, మన స్వచ్చోద్యమకారుల వైఖరి అదీ! నిబద్ధత అంతటిదీ! 6 లక్షల భారతీయ పల్లెల్లో ఈ మారుమూల చల్లపల్లే దేశమంతటికీ ఆదర్శంగా నిలుస్తున్నదిందుకే!

            గాంధీ స్మృతివనం రెండో ప్రక్కన జరిగిన నేటి కృషిలో కుండీలు మోసే వాళ్ల, గొప్పులు త్రవ్వే వాళ్లు, మూలల్దాకా ఎగుడు దిగుళ్లు చదును చేసేవాళ్లు, పాదుల్లో నీళ్లు వంపే వాళ్లు, ఆ స్థలాన్ని పట్టి పట్టి సుందరీకరించే వాళ్లు - ఇదంతా సూక్ష్మంగా ఒక్క మాటలో చెప్పాలంటే - మంగళవారం నాటి స్వచ్ఛ – సుందరోద్యమం. ఇది గ్రహించగల్గిన వాళ్లకు ఇదే సామాజిక చైతన్య పాఠం!-

            కాఫీల వేళ అచ్చిక - బుచ్చిక ముచ్చట్లు గడిచాక - గోళ్ళ కృష్ణ గారు ముమ్మార్లు ఉద్యమ సార్థక ప్రతిజ్ఞలు పలికి నేటి గ్రామ స్వచ్ఛ పరిశ్రమ ముగిసింది.

            రేపటి వేకువ పరస్పర పునర్దర్శనం పాగోలు రహదారిలోనే!

       .... కార్యకర్తల పుట్టినిల్లిది!

కపట నీతుల నాచరిస్తూ - అబద్దాలనె ఆరగిస్తూ

తనను తానే మోసగించే సమాజంలో ఎనిమిదేళ్లుగ

స్వార్థమంటని – సార్థక శ్రమదానమే ఆలంబనంగా

గ్రామ ప్రగతికి నడుం కట్టిన కార్యకర్తల పుట్టినిల్లిది!

- ఒక తలపండిన స్వచ్ఛ కార్యకర్త,

   15.11.2022.