పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్ ల వాడకం దేనికి?
2598* వ నాటి గ్రామ బాధ్యతలు రెస్క్యూ దళానివి!
సోమవారం సదరు బాధ్యతా మూర్తులు 4+1 మందే! ఈసారి వాళ్ల దృష్టి సన్ ఫ్లవర్ కాలనీ వీధి పైన బడింది! పాఠశాల – వసతి గృహాల సమీపంలోనే ఆ ఖాళీ స్థలం, దానిలోనే ఎవరో కొట్టి పడేసిన బోలెడు కొమ్మలు అవి ఎండి, గడ్డి పెరిగి చూడడానికి కలిగిస్తున్న అసహ్యం.
వాటి సంగతి చూడాలనే ఈ స్వచ్ఛ కార్యకర్తల చతుష్టయం పూనిక! గంటంబావు పాటు జరిగిన ప్రయత్నంతో ఆ 10 సెంట్ల ఖాళీ స్తలము, ముఖ్యంగా రోడ్ల బారునా రెండు దిక్కులు ఇప్పుడు బాగానే మెరుగుపడినవి.
ఓ ప్రక్కన తుఫాను వాతావరణం – ఈదురు గాలుల మధ్య వానజల్లులు, అక్కడ సామాజిక చైతన్యవంతులైన గృహస్తులున్నారు గాని ఆ క్లిష్ట వాతావరణం వల్ల కాబోలు - కార్యకర్తల పనికి సహకరించలేదు.
నేటి ఐదుగురి సంకల్పం ముందు మాత్రం గంటకు పైగా మబ్బులూ - చలి గాలులూ- వానజల్లుల చికాకులేవీ పనిచేయలేదు.
6.30 తరువాత నరసింహ నామధేయుని గ్రామ స్వచ్ఛ - సౌందర్య విధేయ నినాదాల తదుపరి రెస్క్యూ టీం వారి నేటి కృషి పరిసమాప్తి!
ఒక విశ్వంభర కీర్తి
స్వచ్చోద్యమ చల్లపల్లి ఒక విశ్వంభర కీర్తి
నిబిడీకృత ఘన సంస్కృతి – నిత్య శ్రమదాన ప్రగతి
ఏ వీధిని పలకరించు - ఎన్ని వ్యధలు చెపుతుందో!
కార్యకర్త కఠిన శ్రమల కథలు పలవరిస్తుందో!
- ఒక తలపండిన స్వచ్ఛ కార్యకర్త,
21.11.2022.