పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్ ల వాడకం దేనికి?
స్వచ్చంద శ్రమదాన పనిదినాల వరుస సంఖ్య – 2606*
ఇది మంగళవారం కనుక - నియమానుసారం స్వచ్ఛ సైన్యంలోని ఒక ఉప విభాగం వారు 29-11-22 ను తమకు కేటాయించుకొని - ఎక్కడో 3 కిలోమీటర్ల దూరాన పాగోలు దగ్గర - ఐదారుగురు శ్రమదాన ముదుర్లు ఈనాటి స్వచ్చోద్యమ పతాకాన్ని ఎగురవేశారు!
‘ముదుర్లు’ కనుక ఇంకా వాళ్లకి దూరమెంతైతే ఏమిటి - మంచు దంచితే మాత్రం, దానిక్కాస్త గాలి కూడ కొటితే మాత్రం లెక్కేముంది? మనుషుల దృఢ సంకల్పాన్ని ప్రకృతి మాత్రం ఏమి అడ్డుకోగలదు?
అదుగో కాస్త మన “జై స్వచ్ఛ చల్లపల్లి సైన్యం” సామాజిక మాధ్యమ చిత్ర విచిత్రాల్ని పరిశీలించండి! సగం ఎండిన కొమ్మ - రెమ్మల్నీ, ఇతర తుక్కు గుట్టల్నీ వాళ్లెలా తిరగేస్తున్నారో, రహదారి అందాల్ని ఏ మాత్రం మెరుగు పరుస్తున్నారో, సుఖంగా ఈ బ్రహ్మ ముహూర్తంలో ఉభయ గ్రామస్తులు నిద్రిస్తున్న వేళ తమ కోసం కాక – ఊరి జనం సౌకర్యార్థం ఎందుకు పాటుబడుతున్నారో తెలిసివస్తుంది!
యధాప్రకారం 6.30 తరువాత, తామనుకొన్నట్లు వీధి పారిశుద్ధ్య పనులు చక్కబెట్టిన సంతృప్తితో కస్తూరి విజయ్ కుమార్ గారు ముమ్మారు నినదించిన స్వచ్చోద్యమ ఆశయాన్ని పునరుద్ఘాటించి, గృహోన్ముఖులయ్యారు!
రేపటి మన శ్రమదాన ప్రస్థానం - గత ఆదివారమే నిశ్చయించినట్లు - నడకుదురు బాటలోని ‘రాజా వెంచర్’ దగ్గరే మొదలౌతుంది.
సమీప గృహస్తులెవరైనా వచ్చి కలిస్తే బహు సంతోషం!
చేస్తున్నాం ప్రణామాలు – 170
ఊరి వీధులు తిరిగి చూడుము – కుఢ్య చిత్ర ప్రబోధమ్ములు
ఊరి వెలుపలి ఏడుదారులు హరిత వింతలు, పూలతోటలు
అందమే ఆనందమైతే అదీ ఊరికి క్రొత్త కాదోయ్
స్వచ్ఛ సైన్యం శ్రమకు శ్రద్ధకు సమర్పిద్దాం సత్ప్రణామం!
- ఒక తలపండిన స్వచ్ఛ కార్యకర్త,
29.11.2022.