పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల్ని వాడడం దేనికి?
2627* వ నాటి చెప్పుకోదగిన శ్రమదాన విశేషం!
బుధవారం (21-12-22) వేకువ 4.17 కే మొదలై – 6.15 దాక అవిచ్ఛిన్నంగా జరిగిన సామాజిక శుభప్రదమైన శ్రమదాన ప్రదేశం మరొక మారు నడకుదురు మార్గంలోనే! ఆ వేడుక కర్తలు 26 మందే! బాగుపడిన రహదారి 50 గజాల మేరకే!
అది ఎందుకు చెప్పుకోదగినదంటే - అననుకూల వాతావరణ కారణంగానే! ఈ డిసెంబరు నెలలో బాగా ఉగ్రరూపం దాల్చిన మంచూ, చలి పరాకాష్టకు చేరినదీ ఈ బ్రహ్మముహుర్తాననేమో! ఐతే - అసలీ స్వచ్ఛ కార్యకర్త లేనాడు – ఏ ప్రకృతి అకృత్యానికి భయపడ్డారు గనుక? ఏ వానకు - ఎండకు – దుమ్మూధూళికీ జడిసి ఇంట్లో దాక్కున్నారు గనుక! ఎన్ని సందర్భాల్లోనైనా ఈ స్వచ్ఛ - సుందరోద్యమ కారులదే గదా పైచేయి?
ఆ ప్రకారంబుగా - నేటి ఉషోదయ - 50 పని గంటల - పారిశుద్ధ్య కృషి విజయవంతంగా 2627* వ మైలు రాయిని దాటినట్లే! ఆంగ్ల మాధ్యమ పాఠశాల దగ్గర ఉన్న పెద్దమట్టి దిబ్బ రాకపోకలకు కొంత అభ్యంతరం పెడుతుంటే - దాన్ని త్రవ్వి, పారలు - డిప్పల్లో ఎత్తి అవసరమైన చోటకు చేర్చడమే 10 మంది శ్రమప్రదాతల వంతయింది!
అచ్చటికి దూరంగా కొందరు కార్యకర్తల సుందరీకరణాన్ని అపార్థం చేసుకొన్న గృహస్తుడిని సమాధాన పరచడం, చల్లబరచడం ఇంకొందరు చేసిన ప్రయత్నం!
అది పుట్టో- మట్టి దిబ్బో గాని ఇద్దరు దాని మీద మొలిచిన గడ్డినీ పిచ్చిమొక్కల్నీ తుదముట్టించడం గమనించాను.
రోడ్డు ఊడుపు బాధ్యతను తీసికొన్న మహిళా కార్యకర్తలు 50 - 60 గజాల వీధినీ - వాటి అంచుల్నీ అనుకొన్నకంటే బాగా శుభ్రపరిచారు.
స్వచ్ఛ కార్యకర్తలు పాతిక – ముప్పై మంది కాక - ఈ దైనందిన శ్రమదాన నివేదికను క్రమం తప్పక చదివే జిజ్ఞాసా పరులకు – వారానికొక మార్తెనా వచ్చి - పాల్గొని - ప్రత్యక్షంగా పరిశీలిస్తేనే బోధపడగలదు - అసలీ నడకుదురు బాట 1 కిలోమీటరు భాగమే నెలనాళ్ల పాటు ఎందుకు పట్టుతున్నదీ! ఈ జగమొండి ఘటాల మురికి – బురద - దుమ్ము - పనుల సంగతీ, ఓర్పులూ - నేర్పులూ ఎలాంటి వన్నదీ!
6.40 సమయంలో వడ్లమర ద్వారంలో - నేను అందుకోలేనంత వేగంగా ఒక జాస్తి ప్రసాదు మహాశయుడు ముమ్మారు పలికిన (తనది కాని) ఊరి స్వచ్ఛ సుందరోద్యమ నినాదాలతోనూ, తదుపరి గ్రామ ప్రముఖ భిషగ్వరుడు – మన శ్రమదాన ధారా స్రవంతిపై నందిగామ ప్రముఖుడి వ్యాఖ్యానం గుర్తుచేసి, సమన్వయించడంతోనూ ఈ బుధవారం సార్ధక శ్రమదానానికి స్వస్తి!
రేపటి మన పునర్దర్శనం కూడ నడకుదురు దారిలోనే అనేది సమష్టి నిర్ణయం!
పేరుపేరున మా ప్రణామం – 175
భావి తరముల స్వస్తతే తమ బాధ్యతగ తలపోయు వారికి
విశ్వమానవ ప్రగతి కోసం విరామ మెరుగక సాగువారికి
మొదటి మెట్టుగ సొంత ఊరిని ముమ్మరంగా కొలుచు వారికి
ఎక్కడున్నా - ఎవ్వరైనా పేరుపేరున మా ప్రణామం!
- ఒక తలపండిన స్వచ్ఛ కార్యకర్త,
21.12.2022.