పర్యావరణ ధ్వంసకమయ్యే - ఒక్కసారికే పనికి వచ్చే ప్లాస్టిక్కుల వాడకం మానుదాం.

స్వచ్ఛ – సుందరోద్యమంలో – 2668^* వేకువ విశేషాలు!

            అది బుధవారం (1-2-23) వేకువ - 4.22 - 6.15 నడిమి కాలం - స్థలం పెదకళ్ళేపల్లి బాటలో ఊరికి 1½ కి.మీ. దూరాన - నాగభూషణం గారి ఇంటి వద్ద! స్వచ్ఛ కార్యకర్తలనబడే 21 మందితో జరిగిన 150 గజాల వీధి పునీత చర్యలు!

ఇక - విశేషాల సంగతికొస్తే –

            అసలు 9 ఏళ్ళు దాటిన నిస్వార్ద శ్రమదానమే ఒక విశేషం! దేశంలో ఎక్కడైనా - మన సమకాలంలో 30 -40 - 50 మంది శ్రమదాతలు - అందునా సమాజంలో గౌరవప్రద స్థానంలో వారు - ఇంత వేకువ వేళ తమ కోసం కాక – గ్రామ సమాజం మేలు కోసం కష్టించడమే అసలైన వింత!

- ఇంటి పనులకో, వృత్తికో పరిమితం కాక – ఏ 3.30 కో లేచి ఊరికింత దూరంగా వచ్చి, పేడ - పెంట పనులకు నలుగురైదుగురు స్త్రీ మూర్తులు పూనుకొన్నారే – అదేమన్నా సామాన్య విషయమా?

- అక్కడి గృహస్థులు పట్టించుకోని మురుగు కాల్వల్లోని, వాటి గట్లమీది గడ్డీ, పిచ్చి – ముళ్ల మొక్కల్నీ, తీగల్ని - ఆ ఆసాములు కూర్చొని చూస్తుండగానే, తొలగించి, నాలుగు గోతాల ప్రమాదకరమైన ప్లాస్టిక్/గాజు సీసాల్ని కప్పుల్ని ఏరిన ఏడెనిమంది పట్టుదల మాత్రం విశేషం కాదా?

- ప్రత్యక్షంగా చూడనిదే నమ్మరేమో గాని, బోలెడన్ని అనారోగ్య సమస్యల్తో 83 ఏళ్ల సూపర్ సీనియర్ వైద్యుడూ, బాగా చురుకైన ఒక పోస్టల్ ఉద్యోగీ – నడుం ప్రక్కకు ఒరిగి నడుస్తూ డిప్పలు మోయడమూ, కత్తితో పనిచేసి, చేసి అలసి కూర్చుండి పోవడమూ నిష్పక్ష పాత పరిశీలకుల దృష్టిలో విశేషమే!

- ఒక రైతు కాలు నొప్పితోనే తనకు చేతనైనంత శ్రమదానానికి పాల్పడడమూ, మరొక రైతు ట్రక్కులో నిల్చి (అతనికీ కొన్ని నడుం సమస్యలున్నా సరే-) రెండు బళ్ల వ్యర్ధాల్ని అణగ త్రొక్కి - ఒక్క ట్రక్కులోనే సర్దడం కూడ నా దృష్టిలో చెప్పుకోదగ్గ సంగతే!

- అన్నిటినీ మించిన విశేషమైన విశేషమేమంటే – 2668^* రోజులుగా – ఏ నాల్గు లక్షల పని గంటలో తమకళ్లెదుటే ఎవరి ఆహ్లాద – ఆరోగ్యాల కోసం స్వచ్చ కార్యకర్తలు శ్రమిస్తున్నారో గమనించి కూడ కొన్ని వీధుల్లో తప్ప – ప్రజలు సరిగా స్పందించక - నిమ్మకు నీరెత్తినట్లుండిపోవడం!

            తెలిసి తెలిసీ - ఈ మురికి పనులకు పూనుకొన్నందున - అది తమకు ఆనందప్రదమని నిశ్చయించుకొన్నందున - 6.30 సమయంలో సమావేశమై – ఈ నాటి తమ కృషినీ, తన్మూలంగా తొలగిన కాలుష్యం ముప్పునూ తలచుకొని కార్యకర్తలు గుండెల్నిండా సంతృప్తి పొందడంలో విశేషమేమున్నది?

            3 రోజుల్నాడు - భాగ్యనగరంలో జరిగిన (1977 - 81 నాటి) వైద్య విద్యార్ధుల కూడికలో – చల్లపల్లి స్వచ్ఛోద్యమానికి దక్కిన విశేష మన్నన - మన DRK గారు వివరించిన సంగతి!

            ఈ నెల మొదటి తేదీ ఒక చిన్న విశేషం డా. గోపాలకృష్ణయ్య గారు యధావిధిగా 2,000/- విరాళంతో స్వచ్చోద్యమ చల్లపల్లిని ఆశీర్వదించడం!

            నేటి స్వచ్ఛ - సుందరోద్యమ నినాదాలను ప్రకటించిన వంతు వేముల శ్రీనివాస మహోదయునిది!

            రేపటి మన శ్రమదాన సంకేత స్థలం ఈ పెదకళ్లేపల్లి మార్గంలోని – నాగభూషణం గారి ఇంటి వద్దే!

            సాహసాత్మక చర్యలే ఇవి

వృత్తిధర్మం కాదు కాదు - ప్రవృత్తి నడిపిస్తోంది వీళ్లని

ఎవరి ఆజ్ఞలు లేవు ఇందుకు - అంతరాత్మ ప్రబోధమే మరి

సొంత లాభం దృష్టి తగ్గి సమాజ బాధ్యత వృద్ధి చెందిన

స్వఛ్ఛ - సుందర కార్యకర్తల సాహసాత్మక చర్యలే ఇవి!

 - ఒకానొక సీనియర్ కార్యకర్త,

   01.02.2023.