పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడదగునా?
27 మంది ఊరి పారిశుద్ధ్య కార్యకర్తల శ్రమ విన్యాసాలు- @2766*
ఆ విన్యాసాలు శనివారం (13.5.23) వేకువ సమయానివైతే- వారిలో డజను మందివి మరీ 4. 13 కే కనిపిస్తున్నవి ! కార్యకర్తలు ముందు గా ఆగింది పాత ప్రభుత్వాస్పత్రి దగ్గరి భోగాది ప్రకాశ రావు ఇంటి వద్దే గాని, వెంటనే కత్తులూ- డాళ్లు - దంతెలూ- చీపుళ్లూ ధరించి, కాలుష్యాన్ని వేటాడింది మాత్రం - ఆ బైపాస్ వీధిలో - అక్కడికి పడమర భాగాన్ని!
వాలంటీర్ల గుంపు పరిమాణం బట్టి చూస్తే-వాళ్ల పురోగమన జైత్ర యాత్ర ప్రాత కస్తూర్బాయి ఆసుపత్రి దాటి పోవాలి! అలా జరగకుండ అడ్డుపడినవి బైపాస్ వీధికి దక్షిణోత్తర భాగాల ఉద్యానాలే! ఒక్కటైతే - ఏకంగా 20 మంది కార్యకర్తల శ్రమను బలిగొన్నది!
మరొకమారు తటవర్తివారి భవన పరిసరాలూ,రాధానగర్ వీధి మొదలూ ఏడెనిమిది మంది శ్రమకు ఆహ్వానం పలకడం కూడ నేటి స్వచ్ఛకార్యక్రమం రాశి తగ్గడానికొక కారణం! దుర్భర వాతావరణ ప్రతి బంధకం మరొక కారణం - కార్యకర్తల దుస్తులు చెమటతో తడిసి - ఉక్కపోతకు ముఖాలు అలిసి శారీరక శక్తుల్ని పీల్చేస్తున్న వేసవి తడాఖాలో - ఇంతటి శ్రమదానమే ఆశ్చర్యావహం కదా!
[ఆలోచించడమంటే అర్ధాన్ని శ్రీశ్రీ ఇలా ప్రకటించాడు:
ఆలోచించడమంటే-
ఊకను దంచడం కాదు,
సుధల్ని పంచడం.....]
ఇంతటి అననుకూల వాతావరణంలో గంటన్నర కృషి తో- 70-80 గజాల బైపాస్ వీధిలో పుట్టుకొచ్చిన వ్యర్థాలు ట్రాక్టర్ నిండుగా !
చకచకా ఆ గుట్టల్ని ముందు డిప్పల్లోకీ, తదుపరి ట్రక్కులోకి ఒక్క ఉదుటున – 20 నిముషాల్లోనే నింపిన ఐదారు గురి సంతృప్తి ఎడదల్లో మెండుగా !
నేటి సమీక్షా సభ విశేషాలు :-
1)మాలెంపాటి గోపాల కృష్ణుల వారి జన్మ వేడుకలో పంచిన కేకులు, వారి శతమానం కోసం జరగవలసిన 16 మార్ల శుభా భినందనలూ;
2) ఊరి వేకువ శ్రమదానంలోకి క్రొత్తగా ప్రవేశించిన యువ వైద్యురాలు - కొర్రపాటి ప్రతిమ శ్రమ ప్రయత్నమూ,
3) నేటి స్వచ్చ- సుందరోద్యమ నినాదాల్ని నేనూ- సహ కార్యకర్తలూ ప్రకటించిన విధమూ,
“ జై స్వచ్ఛ- సుందర చల్లపల్లి - జై జై స్వచ్ఛ సుందర చల్లపల్లీ!
“ స్వచ్ఛ సుందర- ఆరోగ్య చల్లపల్లిని - సాధిస్తాం, సాధిస్తాం!
“ స్వచ్ఛ సుందర - ఆనంద చల్లపల్లిని సాధిస్తాం, సాధిస్తాం!
“ స్వచ్ఛ – సుందర- అభ్యుదయ చల్లపల్లిని సాధిస్తాం, సాధిస్తాం!
4) ఈ నెలకుగాను స్వచ్ఛ క్యాకర్తల ఆర్థిక విరాళ వివరాలు :
- ప్రాతూరి శాస్త్రి మహోదయుని, 5000/
-కోడూరి వేంకటేశ్వరుని 520/-
-(ఎవరిదో ఏమిటో తెలియని) 500/ వితరణ -వేముల (షణ్ముఖ) శ్రీనివాసునిది!
అందరి సమష్టి నిర్ణయంగా - రేపటి వేకువ శ్రమదానం కూడ ఈ బైపాస్ వీధిలోనే- శిధిల కస్తూర్బాయి ఆస్పత్రి వద్ద నుండే!
ఐకమత్యం నిలువ వలెనోయ్
జాగృతములై - శక్తిమయమై జనపదంబులు మెలగవలెనోయ్
శుభ్రముగ - ఆహ్లాద కరముగ - శుభంకరముగ వెలగ దగునోయ్
స్వచ్ఛ శ్రామిక కార్యకర్తల ఐకమత్యం నిలువ వలెనోయ్
స్వచ్ఛ - సుందర చల్లపల్లె జానపదులకు ఉదాహరణోయ్ !
- ఒక సీనియర్ స్వచ్ఛ కార్యకర్త,
13.05.2023.