పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడదగునా?

2777^* వ నాటి వీధి శుభ్ర - సుందరీకరణ సంగతులు!

            ఆ సమాచారం 12 మందితో 4.18 కే శ్రీకారం దాల్చింది! ఎక్కడంటే - బైపాస్ వీధి, భారతలక్ష్మి వడ్లమిల్లుల సంగమ స్థానంలో! ఎప్పటి వరకనగా - 6.00 వరకు మాత్రమే! తొలి డజను మందికి తోడైన మలి 12 గురితో మొత్తం 24 మందితో జరిగిన పారిశుద్ధ్య కృషి ఎక్కడందురా – అది ప్రధానంగా ‘8 ఏళ్ల నాడు వాసిరెడ్డి కోటేశ్వర కీర్తిశేషుని శ్రమ - ధన త్యాగంతో అందంగా రూపొందిన వీధిలోనే!

            గ్రామ చరిత్రైనా - దేశ ఇతిహాసమైనా కొందరు విశిష్ట వ్యక్తుల - కొన్ని ప్రత్యేక సంఘటనల సమాహారమే కదా! అలాంటి ఒక ప్రత్యేక వ్యక్తి వా.కో. అనుకొంటే - అనూహ్యమై న మంచి సంఘటన గత తొమ్మిదేళ్ల స్వచ్ఛ కార్యకర్తల శ్రమదానం!                     

            పుట్టుకనూ, కుల - మతాన్ని బట్టీ ఎవ్వడూ మహోన్నతుడో - హీనుడో కాదు! సమాజం పట్ల, జరుగుతున్న పరిణామాల పట్ల అతని స్పందనను బట్టే – చర్యలను బట్టే మహనీయుడో – బ్రహ్మ రాక్షసుడో ఔతాడు! దాన్ని వాడి జీవిత కాలమే నిర్ణయిస్తుంది!

            తాము నివసిస్తున్న ఊరి కోసం, కలిసి బ్రతుకుతున్న గ్రామ సమాజం కోసం తమ జీవితంలో – చెప్పుకోదగ్గ తొమ్మిదేళ్ల కాలాన్నీ, శక్తియుక్తుల్నీ సమర్పిస్తున్న స్వచ్ఛంద శ్రమదాతలది గుర్తించదగినంత ఘన చరిత్ర కాకపోతుందా?

            ఒకానొక బడి పంతులు – తన ఉద్యోగమేదో తాను చేసుకోక - పూతి దుర్గంధ దారుణమైన ఈ ఇరుకు వీధిని నెలల తరబడీ కాపుకాచి – చెట్లు పెంచి - పూలు పూయించి ఇంతగా సుందరీకరించిపోనేల?

            ఈ వేకువ సమయంలో - ఉక్కపోతల్ని తట్టుకొని - 5 గురు మహిళా కార్యకర్తలూ - పొరుగూళ్ల నుండి వచ్చి మరీ కొందరు రైతులూ, వైద్యులూ, వృద్ధులూ - విశేషించి ఎనిమిదేళ్ల బాలుడూ తలా గంటన్నర శ్రమించి - ఊడ్చి - చెట్లను నవీకరించి - పచ్చదనాన్ని కూడ రెగ్యులేట్ చేయనేల?

            ఎండిన మురుగు మట్టిని త్రవ్వి డిప్పల్తో తలల మీద మోసి, సిమెంటు బాట అంచుల్లో పోసి, విశాల పరచి, భద్రపరచుటేల?

            మురుగ్గుంట అంచున కూర్చొన్న నలుగురైదుగురికి గడ్డి పీకి, కత్తుల్తో కోసి, పిచ్చి చెట్లను తొలగించి, ఈ భారత లక్ష్మి వడ్లమర వీధిని మరింత ఆకర్షణీయంగా శ్రమించవలసిన అవసరమేమి?

            ఏమంటే - ఈ పాతిక మంది గుర్తించి, త్రికరణ శుద్ధిగా పాటిస్తున్న తమ గ్రామ సామాజిక బాధ్యతే! ఒక మంచి ఆశయమే వాళ్లను నడిపిస్తున్నది!

            అష్ట వర్షప్రాయుడైన - ట్రక్కులోనికెక్కి తుక్కులు సర్దుతున్న ఆ కుర్రవాడు చల్లపల్లి పాతికవేల జనానికాదర్సుడు కాడా?

            6.25 కు - ఆస్పత్రి సీనియర్ నర్సు కొండపల్లి కృష్ణకుమారి ముమ్మారు చల్లపల్లి స్వచ్ఛ – సౌందర్యాలను నినదించాక - కార్యకర్తల మహత్తర శ్రమదానాన్ని DRK గారు ప్రస్తుతించాక – తొమ్మిదేళ్లకు ముందు - ఈ బైపాస్, వడ్లమర వీధుల దుస్థితుల్ని అందరూ గుర్తు చేసుకొన్నాక -

            “రేపటి వేకువ శ్రమ బాధ్యతలు కూడ ఈ వడ్లమర వీధిలోనే” అని నిర్ణయించుకొని –

            సంతృప్త వదనాలతో కార్యకర్తలు ఇళ్లకు తిరుగు ప్రయాణం!

            అంతస్తుకు చిహ్నమ్ముగ

స్వచ్ఛ - మాన్య చల్లపల్లి సందర్శనె అదృష్టముగ

ఆ ఊళ్లో నివాసమే అంతస్తుకు చిహ్నమ్ముగ

అచటి ప్రజల అదృష్టమే అసూయగా - అబ్బురముగ

భావించే రోజొక్కటి భవిష్యత్తున రానున్నద?

- ఒక సీనియర్ స్వచ్ఛ కార్యకర్త,

   24.05.2023.