పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడదగునా?

2779^* వ వేళ కూడ - అదే వీధి - అవే చేతులు!

          అది శుక్రవారం(26.5.23) కావచ్చు - ఋతువులు మారనూ వచ్చు – ఈ గ్రామ వీధుల స్వచ్ఛ – శుభ్ర – సౌందర్య క్రతువు మారదు! ఆ 30 – 40 - 50 మంది కార్యకర్తల ప్రయత్న లోపముండదు! ఏదోఒక మూలన చల్లపల్లిలో సుందరీకరణ శ్రమదాన పతాకం ఎగరక మానదు!

          తొమ్మిదేళ్ల కాల పరీక్షకు నిలిచి - గెలుస్తున్న ఊరి పారిశుద్ధ్య కృషికి ఆరంభమే గాని అంతమూ కనబడదు! ఐతే,  “వేల కొద్దీ రోజుల - లక్షల పని గంటల గతం ఉన్న ఈ దైనందిన శ్రమ వేడుక మీద – పని గట్టుకొని వాట్సప్ మాధ్యమం కోసం ప్రతి ఉదయం ఇలా పేజీలు నింపాలా” అనే ధర్మ సందేహం నాకు అప్పుడప్పుడు వస్తుంటుంది!

అందుకు తక్షణ సమాధానాలు:

1) ఒక మారుమూల పల్లెలో ఇంత సుదీర్ఘ కాలంగా – ప్రత్యక్షంగా చూస్తే గాని నమ్మలేని నిజంగా - స్వార్థం అడ్రస్సే కనపడని త్యాగంగా - నిండు నిబద్ధంగా – నిరాడంబరంగా జరిగిపోతున్న శ్రమ వేడుక!

2) ఇందరి సామాజిక బాధ్యతా నిర్వహణం చూస్తూ దాన్ని ఆలోచించక – విశ్లేషించక - కాస్త వర్ణనాత్మకంగా వ్రాయక - ఆగలేని నిస్సహాయత!

3) ఈ రోజు శ్రమదానం చేయని కార్యకర్తలు, గ్రామ - దేశ విదేశ చల్లపల్లి స్వచ్ఛోద్యమాభిలాషులందరికీ ఇక్కడి శ్రమ వేడుక వివరాలు తెలపాలనే కోరిక!

          కావున - నేటి కార్యకర్తల శ్రమదాన వివరాలను ఈ క్రింద యథాతథంగా తెలియజేయడమైనది!

          నేటి బ్రహ్మ కాలాన - 4.18 కే మొదలై 6.06 దాక ముప్పై ముగ్గురు పాల్గొన్నది భారతలక్ష్మి వడ్లమర వీధి!

          నిన్న వాన పడి పని చోట్ల చిత్తడిగా మారి, పైకి చల్లబడ్డట్లు కనిపించినా - ఉడికిపోతున్న ఉక్క వాతావరణం.

          సంఖ్య 33 కాని, ముగ్గుర్నలుగురు పై మనుషులు - అతిధి దేవుళ్లన్న మాట! వడ్లమిల్లు గుమాస్తా, హైదరాబాద్ నుండి వచ్చి, పని చోటును వెతుక్కుంటూ వచ్చిన గృహిణి – మధు, రేపటి తన కుమార్తె 9 వ జన్మ వేడుక ప్రకటనకై వచ్చిన ఒక సాధనాల కార్యకర్తా వగైరాలు!

          40 రోజులుగా శ్రమదానానికి తప్పక దూరమైన ఒక జాస్తి ప్రసాదుని తొణకని - బెణకని వీధి పారిశుద్ధ్యాన్ని గమనించాను. 

          ‘ఇదేం ఖర్మరా’ అని కాక - ఊరి ప్రయోజనానికి పాటుబడడం అదృష్టంగా భావించిన ఐదారుగురు మహిళల కష్టాన్ని పరిశీలించాను;

          ఆరోగ్యంలో కాస్త ఎగుడు దిగుళ్లొచ్చినా వెనకడుగేయక వచ్చి - చాతనైన పనులు చేస్తున్న 75 - 84 ఏళ్ల పెద్దల్ని గమనించాను;

          తనకంటే పేద్ద చెత్త డిప్పను మోసుకెళ్తున్న ఎనిమిదేళ్ల బడుగు వర్షిత్ సాయిని (ఫోటో చూడండి) కనిపెట్టాను;

          ఉచ్ఛమడుగుల్లో - ఘాటు కంపుకొడుతున్న పారేసిన అన్నం గుట్టల్లో - రహదారి ఉద్యానం చీకట్లో నిర్వికారంగా పని చేసుకుపోతున్న,

          వ్యర్ధాల్ని రెండు ట్రక్కులో కెక్కిస్తున్న – ప్రతి యొక్కరి శ్రమ విలువనూ ఊహించాను; మరి ఇవన్నీ చూసి చలించక, ఈ మాత్రమైనా వ్రాయక - ఎలా ఉండగలను?

          6.20 సమయంలో తన గ్రామ స్వచ్చోద్యమ సారాంశాన్ని నినాదాలుగా కీర్తించిన వ్యక్తి సాక్షాత్తూ సర్పంచమ్మే!

          ఎన్నోమారో గాని - కార్యకర్తల త్యాగ దీక్షకు ఆశ్చర్యపోవడం ఈ శ్రమదానోద్యమ ప్రారంభక వైద్యుని వంతు!

          మిగిలిపోయిన ఉద్యాన శుభ్రత కోసం మనం శనివారం వేకువ కలువదగినది భారతలక్ష్మి వడ్లమర దగ్గరే!

          ఒక సద్యః స్ఫూర్తి చర్య

ఒక సద్యః స్ఫూర్తి చర్య అలవోకగ నడుస్తోంది

మహోత్కృష్ట బాధ్యత సామాన్యులతో తీరుతోంది

వీరుల – శూరుల - ధీరుల - మేధస్సుల కన్నను సత్

సంకల్పమె ఊరి భవిత శాసింపగ పూనుకొంది!

- ఒక సీనియర్ స్వచ్ఛ కార్యకర్త,

   26.05.2023.