పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?

సామూహిక శ్రమదాన పరమార్థం - @2822^*

            బుధవారం చీకటి (4.15 AM) కాలపు గ్రామ సేవకు తరలి వచ్చిన కార్యకర్తలు 34 మంది, వారి శ్రమ ఫలించి బాగుపడినవి

1) కమ్యూనిస్టు వీధి ఉత్తర భాగంలోని ఒక ప్రైవేటు స్థలం,

2) అక్కడికి తూర్పు దిశగా - అశోక్ నగర్ వైపున బైపాస్ వీధి,

3) సూరి డాక్టర్ వీధి అనబడే అడ్డ వీధి దాక –

            ‘ఎవరి వెర్రి వాళ్లకానందం’ అన్నట్లుగా, ఎవరి వ్యసనం వాళ్లకు ముద్దేమో మరి! ఈ కార్యకర్తల స్వచ్ఛ వ్యసనం మాత్రం ఊరి వీధి పారిశుద్ధ్యాన్ని పట్టించుకోని కొందరు గ్రామస్తుల వైఖరికి భిన్నమూ, ఆమోదయోగ్యమూ!

            లేకుంటే - ఒక ప్రైవేటు స్థలంలో వంగి, గంటకు పైగా కష్టించే అవసరం 68 ఏళ్ల విశ్రాంత ఉద్యోగికేమిటి?

            అసలది ఎవరింటి ముంగిలో చూడక – ఇంటి సొంతదారులే వారాల తరబడీ పట్టించుకోని మురుగు కాల్వ గట్టును పట్టి పట్టి శుభ్రపరచే అగత్యం మరొక 63 ఏళ్ల విశ్రాంత ఉన్నతోద్యోగికెందుకు?

            శ్రమదానంలో పాల్గొంటున్న వ్యాపారులూ, గృహిణులూ, ఉద్యోగులూ, రైతులూ, వైద్య సిబ్బందీ తామెందుకీ వీధి పారిశుద్ధ్యానికి పాల్పడుతున్నట్లు?

            ఈ శుభోదయాన ఒక 92 ఏళ్ల విశ్రాంత వ్యాయామోపాధ్యాయుడు తన జన్మదిన సంకేతంగా – గ్రామ పారిశుద్ధ్య – సుందరీకరణల నిమిత్తం తన పొదుపు సొమ్ము – లక్ష (దీనితో ఇప్పటిదాకా వీరి ఆర్ధిక సహకారం 18 లక్షలకు చేరింది.) రూపాయలనేలదానమొనర్పవలె?

            తొమ్మిదేళ్లుగా జరుగుతున్న ఈ శ్రమదానమంతా కొందరు తేలిక మనుషుల దృష్టిలో ‘కీర్తి కండూతి’ గా అనిపించవచ్చుగాక - మాలాంటి కొందరి లెక్క ప్రకారం ‘కనీస సామాజిక బాధ్యత!’

            చల్లపల్లిలో 100 కు పైగా కార్యకర్తలు నిత్య కఠిన సామూహిక శ్రమదానంతో తమ ఊరి స్వచ్ఛ - శుభ్ర – సౌందర్యాలను ఒక్కో మెట్టు పైకెక్కిస్తున్నందుకు పాతిక వేల మందిమీ సదరు కార్యకర్తలకు కృతజ్ఞులమై ఉండాలి!

            ఈ హరిత సుందరోద్యమానికి సహకరిస్తున్న ఊరి - దేశ - విదేశ సహృదయులను చూసి జాగృతులమవ్వాలి!

            నేటి జన్మదిన వయోవృద్ధునికి మారుగా  అదే వీధి కాకలు తీరిన కార్యకర్త - మాలెంపాటి అంజయ్య వీధి అంతటికీ వినిపించేలా ముమ్మారు ప్రకటించిన స్వచ్ఛ సుందరోద్యమ నినాదాలతో కార్యకర్తల చెవుల త్రుప్పు వదిలింది.

రేపటి వేకువ మనం శ్రమించవలసిన చోటు :

            వర్షం లేనిచో గ్రామ 3 వీధుల ముఖ్య కూడలిలోనూ,

            ఉన్నచో బైపాస్ మార్గంలోని విజయ్ నగర్ - అశోక్ నగర్ ల వద్దనూ ఉండగలదు.

            సందడిగా శ్రమరీతులు!

సుశ్రుతముగ, విస్తృతముగ - శోభస్కర రూపముగా

అందముగా - హరిత వర్ణ రంజితముగ - స్ఫటికముగా

మంద్రముగా - సుస్వరాల సంద్రముగా ప్రతి వేకువ

సామాజిక సామూహిక సందడిగా శ్రమరీతులు!

- ఒక సీనియర్ స్వచ్ఛ కార్యకర్త,

   12.07.2023.