పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?
ప్రకృతితో స్వచ్ఛ కార్యకర్తలతో ప్రకృతి దాగుడుమూతలు - 2823*
జులై - 13, 2023 - గురువారం నాటి వేకువ 4.12 - 5.15 నడుమ 16 మంది కర్తవ్యనిబద్దుల పారిశుద్ధ్య క్రీడలవి! కరెంటు లేని, వానా, గాలీ దోబూచులాడిన చివరికని వార్యంగా 45 నిముషాల ముందుగానే అగిన స్వచ్ఛంద సేవల సంగతిది!
అక్కడికీ - వాతావరణ సూచనలతో వాన రాకడను శంకించి, సాదా సీదా వర్షాన్నెదుర్కొనేందుకు సంసిద్ధులై, కోట మలుపు వద్ద ఆగిన కార్యకర్తలు పట్టుమని 15 నిముషాలు పెట్రోలు బంకు దాక వీధి సేవలు చేశారో లేదో - వానగాడు రానే వచ్చాడు. తడిసిన రోడ్డు పైన అంటుకొన్న దుమ్ము చీపుళ్లతో ఊడి రాక - కార్యకర్తలు మనసు మార్చుకొని, అశోక్ నగర్ కు మారారు!
అక్కడ చీపుళ్లకు బదులు కత్తులు, దంతెలకు 15 - 20 నిముషాలు పని చెప్పారో లేదో - మళ్లీ వాన పలకరింపులూ చిలకరింపులూ! చెట్ల క్రింద నిలిచి, తడిసి, మరొక ప్రయత్నం కూడ చేసేంతలోనే పెళ – పెళమని ఉరుములూ, తళ తళా మెరుపులూ, గాలి + వానాజమిలిగా విజృంభించి –
ఈ లోపే 3గ్గురు నాలుక్కిలోమీటర్ల దూరాన - వేంకటాపురం దగ్గర బాట ప్రక్కల పరిశీలనకు వెళ్లివచ్చి - చివరికి అర్ధాంతరంగానే ఆగిన శ్రమదానం! తడిసి – ముద్దైన కార్యకర్తలు 6.00 కాక ముందే ఇళ్లకు చేరిక!
ఇదీ టూకీగా గురువారం వేకువ సమయపు గ్రామ స్వచ్ఛ– సుందరోద్యమ సమాచారం! ఇంతటి గాలి, వాన, ఉరుముల, పిడుగుల వాతావరణంలో జరిగిన రిస్కీ శ్రమదానాన్ని నిబద్ధతనాలో – వ్యసనమనాలో – ఆదర్శమనాలో – తెలియని పరిస్ధితి!
ఐతే – ఈ తొమ్మిదేళ్ల శ్రమదానం అమాయకం కాదనీ, అనాలోచితం కాదనీ, అదొక నిష్టా గరిష్ట, ప్రణాళికాబద్ధ, ప్రయోజనకర, ఆవశ్యక ఉద్యమమని మాత్రం చెప్పగలను!
ఇక రేపటి 100 పూల మొక్కల ప్రతిష్టాపన నిమిత్తం బందరు ఉపరహాదారిలో - గంగులపాలెం & పెదకళ్ళేపల్లి అడ్డ రోడ్డుల మధ్య ఉండునని ఇందుమూలంగా తెలియపరచడమైనది.
కావిస్తున్నాం సహస్ర ప్రణతులు!
అందమైన సొంతూరి కోసము సుగంధ భరిత రహదార్ల నిమిత్తము
కలిసికట్టుగా భావికాల సౌకర్య సాధనకు నడుం బిగించిన –
ఊరి ప్రతిష్ఠకు ఉత్సాహించిన – బలం డ్రైనులకె బలిగావించిన –
కర్మవీరులకు - ఘర్మ దాతలకు కావిస్తున్నాం సహస్ర ప్రణతులు!
- ఒక సీనియర్ స్వచ్ఛ కార్యకర్త,
13.07.2023.