పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకా వాడాలా?
మళ్లీ అదే బందరు బైపాస్ లో - @2842*
ఈ శ్రావణ శుక్రవారం బ్రహ్మకాలంలో – పాతిక మంది శ్రమదానవీరులు భక్తి - శ్రద్ధతలతో చేసిన పూజలేమిటిరా అంటే - రామానగరానికి దూరంగా ఒక రహదారి శుభ్రత, దాని దక్షిణపు 10 అడుగుల మార్జిన్ లో అసహ్యకరంగా బలిసిన గడ్డి - ఇంగ్లీష్ తుమ్మచెట్లూ - ఎందుకూ కొరగాని వెర్రి చెట్లూ వగైరాల తొలగింపూ!
వాళ్లెప్పుడు మేల్కోని, ఎన్నింటికి బయల్దేరి, ఎంతెంత దూరాల్నుండి వచ్చారో గాని నూకలవారిపాలెం డొంక రోడ్డు దగ్గరి NH 16 వద్దకు చేరుకొని, పనిలోకిదూకింది మాత్రం 4.18 వేళ!
అక్కణుండి పడమరగా - మూణ్ణాలుగు వందల గజాల బారునా నిన్నటి వికృత చిట్టడవి - మురుక్కాల్వ వంతెన దాకా మటు మాయమై – 200 కు పైగా పూల మొక్కలు నాటుడుకు సిద్ధమైపోయింది!
మన వాట్సప్ మాధ్యమంలో గనుక నేటి పని స్థలం వేకువ 4.00 కు ముందుది కనిపిస్తే పరిశీలించండి - ఎంతెంత పెద్ద ముళ్ళ చెట్లు – వాన గుంటల మధ్య నిలబడి భయపెడుతున్నాయో? మరి - అందరి ఉమ్మడి ఖాతాలో - 2500 నిముషాల – శ్రమ తరువాత - మంత్రం వేసినట్లు – చెట్టు కూలిపోయి – మొక్కల కంప పెట్టుటకనువైన తుంపులుగా మారిపోలేదా?
అదే కదా - యాంత్రిక శ్రమకూ, మానవ శ్రమకూ ఉండే తేడా! అదీ గాక - స్వచ్ఛ శ్రామికులైతే మనసుపెట్టి, తలలుపయోగించి, ఇన్ని వేల రోజులు ప్రయత్నిస్తే చల్లపల్లి, పరిసర రహదార్లింత ఆహ్లాదమయంగా ఉండకేం చేస్తాయి?
ఇంతటి కష్టాన్ని ఇష్టంగా చేయబట్టే, స్త్రీ కార్యకర్తలు కూడ చీకట్లో ముళ్ళ కంపలు లాక్కెళ్ల బట్టే – చెట్ల పని బట్టేవాళ్లు తమ పని పూర్తిచేస్తుండగానే - కొందరు వాటిని కావలసిన సైజుల్లోకి నరుకుంటే – సిమెంటు బాటను ఊడ్చేవాళ్లు ఊడుస్తుంటే - ఇంతటి ఉమ్మడి శ్రమదానంతో ఎంతటి పనైనా భారంగా తోచదు మరి!
నేటి పని పూర్తయ్యాక 6.20 సమయాన ఈ ఊరికీ, స్వచ్ఛ చల్లపల్లికీ, ఈ ప్రాంతానికి మొక్కల సరఫరాదారుడు - తాతినేని వేంకట రమణుడు ముమ్మారు వినిపించిన స్వచ్ఛ సుందరోద్యమ నినాదాలతో నేటి సామాజిక బాధ్యత ముగిసింది.
అంతకు ముందు నాటిన వందలాది పూల మొక్కల్లో కొన్నిటికి కంప రక్షణ పనికోసం రేపటి వేకువ మనం కలుసుకోదగిన చోటు - ఇదే రహదారిలో కాసానగర్ దగ్గరే!
కలదపోలిక ఎంత మాత్రము?
ఎలా ఉండెనొ మురుగు కాల్వలు, మురికి పట్టిన ఊరి దారులు?
మలవిసర్జిత దురిత బాటలు! జీవకళ కనిపించెనా? - మరి
స్వచ్ఛ సుందర కార్యకర్తల శ్రమను మ్రింగిన నేటి ఊరికి
గతంలో మన చల్లపల్లికి కలదపోలిక ఎంత మాత్రము?
- ఒక సీనియర్ స్వచ్ఛ కార్యకర్త,
04.08.2023.