పర్యావరణ ధ్వంసకమయ్యే - కేవలం ఒక్కసారికి మాత్రమే పనికి వచ్చే ప్లాస్టిక్కులు ఇంకా వాడాలా!

2879^* వ నాటి 22 మంది కష్టార్జితం!

            బుధవారం (13-9.23) వేకువ 4.14 - 6.08 వేళల నడుమ SRYSP కళాశాల కుడి ఎడమలుగా బందరు రహదారి కేంద్రంగా నెలకొన్న శ్రమ అది! శ్రమ కార్యకర్తలదైతే - ఫలితంగా ఇక్కడి 100 గజాల విశాల వీధి సౌందర్యమూ, గంగులపాలెం వీధిలో అందమైన బోగన్ విలియా చెట్ల కొమ్మల నవీకరణతో వచ్చే ఆహ్లాదమూ, ఎవరైన అంది పుచ్చుకోగల వాళ్లకు సామాజిక స్ఫూర్తీ... ఇవన్నీ గ్రామస్తులకంకితం.

తొమ్మిదేళ్ల సుదీర్ఘ పరిశ్రమానంతరం కూడ - ఈ కార్యకర్తలది వ్యసనమా,సేవా, బాధ్యతా, ఆదర్శమా అనే చర్చలు కూడ అనవసరమే!

            “ఇంత పెద్ద ఊరి బాధ్యతల్ని కొద్దిమందిమి మోయగలమా, విస్తృత పౌర సమాజం పూర్తిగా సహకరించకుండానే ఈ ఆర్థిక భారాన్ని తట్టుకోగలమా...” అనే మీమాంసను స్వచ్ఛ కార్యకర్తలేనాడో అధిగమించారు.

            అదృష్టవశాత్తూ అన్ని రాజకీయ వర్గాల్నుండీ, స్వచ్ఛంద సంస్థల నుండీ కొంత హార్దిక, ఆర్థిక సానుకూలత లభిస్తూనే ఉన్నది.

            తొలినాళ్లలో - అనగా 2013 - 2014 ల్లో వలె ఈ చక్కటి కార్యక్రమాన్ని ఒక వింతగానో - పిచ్చిగానో - చూసే కొద్దిమంది కూడ ఇప్పుడు లేరు!

            ఎక్కడెక్కడి సామాజిక పరిశీలకులూ, సంఘ పరివర్తనాభిమానులూ నిరంతరం ఈ చల్లపల్లి శ్రమదానం మీద ఒక కన్నేసే ఉంచుతున్నారు! ప్రస్తుత దుష్టకాల వాతావరణంలో ఇవన్నీ సానుకూలతలే కదా!

నేనైతే ప్రతి వేకువలో వలెనే ఈ పూట కూడ గమనించి, సంతోషించే దృశ్యాలివి :

1) ఒకానొక దివ్యాంగుడు శక్తిమేర గంటన్నరపాటు ప్రైవేటు ఆస్పత్రి వద్ద శ్రద్ధగా శ్రమించడాన్ని,

2) పెద్ద వయసులో ఇద్దరు తమ శరీరాలు సహకరించిన మేర గొర్రులు ఊతంగా వంగిగడ్డి చెక్కి, తుక్కుల్ని ఊడ్చడాన్ని,

3) సొంతింటినో – గుడి ప్రాంగణాన్నో శుభ్రపరుస్తున్నంత దీక్షగా ముగ్గురు మహిళలు గూళ్ల నొప్పి లెక్కచేయక రోడ్డును ఊడ్వడాన్ని,

4) శ్రావ్య ఆస్పత్రి, రిజిస్ట్రార్ కార్యాలయ, పండ్ల కొట్లాది చోట్లన్నీ కొందరు శుభ్రపరచడాన్ని...

            ఈ సామూహిక శ్రమోత్సవానికి దూరంగా ఉన్నవారైతే వాట్సప్ ఫోటోల్లోని 6.00 ప్రాంతంలో కనిపించే నాణ్యమైన బందరు బాటనూ – కాస్త దూరంగా సుందరీకరణం జరిగిన గంగులవారిపాలెం బాటలోని సుమ వైభవాన్నీ చూసి సంతృప్తి చెందవచ్చు!

            శ్రమదానం సంగతలా ఉంచి, 6.20 సమయంలో- కళాశాల ద్వారం దగ్గర పని సమీక్షా సమావేశంలో – ‘మనకోసం మనం’ ట్రస్టు ఖర్చులకూ - రాబడికీ అంతరం తగ్గడాన్నీ,

            - రెండు దఫాలుగా వచ్చిన 1974, 1977 వైద్య బృందాలు (1 లక్ష & 49 వేలు) పంపిన డబ్బుతోను, సజ్జా వారి (లక్ష) భూరి విరాళంతోను, కోడూరు, మాలెంపాటి (520/-, 2000/-) తదితరుల యథాశక్తి సహకారంతోను అది సాధ్యపడడాన్నీ గ్రహించవచ్చు.    

                రేపటి మన వేకువ శ్రమదాన ఉద్యుక్తత మునసబు వీధి పార్రంభం నుండే అని నిర్ణయింపబడెను.

            సద్యః ఫలితాలనేవి

సద్యః ఫలితాలనేవి సమకూడును పురాణాల

గాథలలో – చలన చిత్ర కల్పనలో; వాస్తవిక

ప్రపంచాన దశాబ్దాలొ - శతాబ్దాలొపట్టవచ్చు.

స్వచ్ఛోద్యమ చల్లపల్లి సంగతైన అంతే గద!

- ఒక ‘స్వచ్ఛ సుందర చల్లపల్లి’ కార్యకర్త

  13.09.2023.