పర్యావరణ ధ్వంసకమయ్యే - కేవలం ఒక్కసారికి మాత్రమే పనికి వచ్చే ప్లాస్టిక్కులకి ప్రత్యామ్నాయం చూసుకుందాం!

శ్రమదానకర్ణుల 3006^* వ నాటి వేడుక!

            ఆదివారం – (21.01.2024) వేకువ 4.18 కే – గంగులవారిపాలెం మురుక్కాల్వ మలుపులో 15 మందితో మొదలైన ఆ వేడుక 6.30 దాక కొనసాగుతూనే ఉన్నది! ఏమైనా సరే – “ఈ ఆదివారంతో ఇక్కడి వంకబెట్టలేని స్వచ్ఛ – శుభ్ర వైభవం పూర్తి కావాలసిందే” అనే పంతం నెగ్గించుకొన్నారు – 35 మంది కార్యకర్తలు! 

            తత్ఫలితంగానే - నిన్న బాగుపరచిన కొంత స్తలంతో సహా 150 గజాల వీధీ, పూల మొక్కల పాదులూ, దిక్కుమాలిన వ్యర్ధాలూ, తుడిచి పెట్టుకుపోయి, సదరు వీధి భాగాన్ని చూస్తే చాలు - పాతకాలపు ప్రచారం Neighbour’s envy – owner’s pride (పొరుగు వీధుల కసూయగా – వీధి సొంత దారులకు గర్వకారణంగా మారిపోయింది!

            మరి - ఇక్కడ వారం రోజులుగా కష్టిస్తున్నదెవరు? అల్లాటప్పా కార్యకర్తలు కాదే - మూడేసి వేల రోజులుగా పనిలో రాటు దేలిన - కొందరైతే "ఒక ఆదర్శ గ్రామం ఎలా ఉండాలనే" పరిశోధనతో ఎమ్. ఫిల్ లూ, పి.హెచ్. డీలూ చేసిన వాళ్లు గదా!

            ఐదారుగురు కార్యకర్తల్నైతే – అత్యాశాపరులనరాదుగాని, వీధి పారిశుద్ధ్య తృష్ణతీరనివాళ్లనొచ్చు – బండ్రేవు కోడు మురుగుకూ – వీధి మార్జిన్ల పూల మొక్కల మధ్యకు దూరి, గద్ద గోరు ముళ్లు గీసుకుపోకుండ – ఆ చీకట్లోనే కలుపూ – గడ్డీ – గాదం తొలగించారు! 

            ఇంకో 10 మంది బ్యాచ్ అయితే - 6.15 దాటుతున్నా, మినప చేల ప్రక్కనున్న పిచ్చి మొక్కలూ, గడ్డీ మళ్ళీ 2 నెలల్దాక తలెత్తకుండా నరికి, పీకి గాని విరమించలేదు!

            రోడ్డు మూల నుండి దక్షిణంగా (దాని మీద ఇప్పటికీ ఐదారుగురికి బహిరంగ మలమూత్ర విసర్జనా హక్కులున్నవట !) కాల్వ గట్టును శుభ్రం చేశారు!

            మరి - మిగిలిన నలుగురైదుగురు చేతులు ముడుచుక్కూర్చున్నారా - అంటే! లేదు - బాటనంతా చీపుళ్లతో ఊడ్చే వారు ఊడ్చి, ప్లాస్టిక్ అవశేషాల్ని ఏరే వాళ్ళు ఏరి – వాళ్ళ వంతు పని వాళ్లు నెరవేర్చారు!

            చల్లపల్లి శ్రమ వేడుక బొత్తిగా తెలియని వాళ్ళకైతే “35 మందా? ఈ కాస్త రోడ్డును బాగు చేసినందుకింతగా వర్ణిస్తూ వ్రాతలా?” అనిపించవచ్చు! గంగులవారిపాలెం వీథి 1 కిలోమీటరుకు పైగా ఐదారేళ్ల నుండి ఎందుకింత ప్రసిద్ధికెక్కిందో ఆలోచిస్తే ఎవరూ అలా ఆక్షేపించరు!

            శ్రమ సందడి ముగిశాక – గోళ్ళ వేంకటరత్నం అభిమానంగా ముమ్మారు పలికిన గ్రామ స్వచ్ఛ – సుందరోద్యమ నినాదాలతోనూ, DRK గారి మెచ్చుకోళ్లతోనూ, గురవయ్య గారి వివేకానంద సూక్తులతోనూ 21-1-24 వ నాటి కార్యక్రమం ఒక కొలిక్కి వచ్చింది!

            మనందరం బుధవారం వేకువ శ్రమదానం కోసం బందరు రహదారిలో 6 వ నంబరు కాల్వ వంతెన వద్ద కలువవలెనని నిర్ణయం!

            స్వచ్ఛ - సుందర కర్మయోగమె

ఔను - భగవద్గీత కర్ధం స్వచ్ఛ - సుందర కర్మయోగమె

యుగయుగాలుగ నిలిచి వెలిగే స్వచ్ఛ సుందర సంప్రదాయమె

దేశ ప్రగతికి - జాతి సుగతికి సమాధానం శ్రమానందమె

తొమ్మిదేళ్లుగ కార్యకర్తల దమ్ము తెలిపిన శ్రమత్యాగమె!

- ఒక సీనియర్ స్వచ్ఛ కార్యకర్త

  21.01.2024