పర్యావరణ ధ్వంసకమయ్యే - కేవలం ఒక్కసారికి మాత్రమే పనికి వచ్చే ప్లాస్టిక్కులకి ప్రత్యామ్నాయం చూసుకుందాం!
3008* వ నాటి పని వివరాలు.
స్వచ్ఛ - శుభ్ర - సుందరీకరణ పనులేమో మంగళవారానికి (23-1-24) చెందినవి. ఏ ఒక్క తృణమూ ప్రతిఫలం ఆశించకుండ - పొగడ్తలూ, తెగడ్తలూ పట్టించుకోకుండ ఎండ - వానల్ని సరకు చేయక - నిర్వికారంగా - నిశ్చలంగా వేల కొద్దీ రోజులు - తమ కనుకూలమైన బ్రహ్మ ముహుర్తాన్నెంచుకొని ఉద్యమిస్తున్న స్వచ్ఛ కార్యకర్తల్లో ఆరేడుగురు రెస్క్యూ టీమ్ పేరిట ఈ వేకువ చేసిన పనులన్న మాట!
పనులు జరిగింది మరొక మారు గంగులవారిపాలెం వీధి మధ్యలోనే. వాళ్ల సూక్ష్మ దృష్టికి తగిలింది ఊరి ముఖ్య మురుగు కాల్వకు అడ్డుతగులగల, వీధి సౌందర్యాన్ని కుంటుపరచగల ప్లాస్టిక్ - గడ్డీ వంటి వ్యర్ధాలే.
వాళ్ళు బాగుపరచినది పాతిక గజాల బజారే గాని, ఏరినవి కొద్దిపాటి ఖాళీ సీసాలే గాని, ప్రోగు చేసిన ఎండు గడ్డి పరకలు కొద్దిపాటివే గాని – ఇప్పుడు చూడండి వీధి ఎంత ఆహ్లాదకరంగా ఉన్నదో!
అసలీ పనులు వీధి కటూ - ఇటూగా ఉన్న ఐదారు ఇళ్ళ వారు కదా చేసుకోవలసింది? కార్యకర్తలు పెంచిన, పంచిన పచ్చదనమూ, పూల సుగంధమూ ఎక్కువగా భవఘ్ని నగర వాసుల అనుభవంలోనివే గదా! గతంలో వాళ్లు చాల మార్లు కార్యకర్తల్తో పోటీపడి పనిచేసిన వారే గదా! ఈ రోజు మాత్రం శీత కన్నేశారు మరి!
“మీ ఇల్లు – మా ఇల్లు, మీ వీథి – మా వీధి, వర్డు ఎవరిది....” వంటి భేదాలు పట్టని కార్యకర్తలు మాత్రం –
- ఇద్దరు తడారుతున్న డ్రైనులో దిగి, అవసరం లేని కొమ్మల్ని పెరగబోతున్న గడ్డినీ కత్తులతో చెక్కారు! పూల మొక్కల పాదుల్ని శుభ్రపరిచారు.
- మిగిలిన వారి పని వల్ల పుట్టుకొచ్చిన వ్యర్ధాల్ని ఒకాయన చీపురుతో తొలగించగా,
- మరొకరు కాగితమ్ముక్కల్తో సహా, గుట్కా పొట్లాల్తో సహా ఏరడం చూశాను.
6.15 కు పని స్థలంలోనే 7 గురూ తూములూరి లక్ష్మణ నామధేయుని నినాదాలకు బదులిచ్చారు.
బెజవాడ దానయ్య గారి కుటుంబీకులు వారి ప్రథమ వర్థంతి సందర్భంగా 10 వేలూ, ఆస్పత్రి సీనియర్ నర్సు రోహిణి తన తండ్రి శ్రీనివాసరావు ద్వితీయ వర్ధంతి గుర్తుగా 5 వేలూ విరాళాలిచినట్లు తెలిసింది!
మన రేపటి వేకువ కలయిక గంగులవారిపాలెం బజారు మొదట్లోని గస్తీ గది వద్దనే!
స్వార్థం తోకలు కత్తిరించ బడుచుండునొ
ఎచ్చట త్యాగం చిలవలు పలవలుగా పెంపొందునో
ఎందున స్వార్థం తోకలు కత్తిరించ బడుచుండునొ
30-40 మంది వ్యక్తులు ఊరును పూజిస్తుందురొ –
అదే చల్లపల్లి అనుచు అందరు గుర్తిస్తుందురు!
- ఒక సీనియర్ స్వచ్ఛ కార్యకర్త
(నల్లూరి రామారావు)
23.01.2024