స్వచ్ఛ - సుందరోద్యమంలో నిన్నటి విశేషఘట్టం.

            శ్రమదానోద్యమ ముఖ్య ఛాయా గ్రాహకుడైన శంకర శాస్త్రి గారి “భవఘ్నినగర్ డ్రైను గట్టుకు దన్నుడుగా సిమెంటు స్తంభం వేశాక” అనే వ్యాఖ్యానం తాలూకు ఫొటోను చూశారా? మనలో చాలమందికి “ఏముందక్కడంతగా చూడ్డానికి – ఏదో రోడ్డుగుంటొకటి పూడ్చారు, చదును చేశారు అంతేగా...” అనిపించవచ్చు.

            అది మూడు నెలల - ఐదారుగురు కార్యకర్తల – మూడు నాలుగు విడతల ముమ్మర ప్రయత్నమనీ, అందులో ఊరి ప్రజా ప్రయోజనం తప్ప స్వార్థచింతన లేదనీ, 3017 రోజుల్లో గ్రామ వ్యాప్తంగా స్వచ్ఛ సుందరీకర్తల వందలాది చర్యల్లో ఇదొకటనీ ఏ కొద్ది మందిమో ఈ శ్రమదానానికి గుర్తిస్తాం! గుర్తించిన వాళ్లలోనైనా అతి తక్కువ మందిమే ఈ శ్రమదానాన్ని పూనుకొంటాం!

            తూర్పు ప్రక్క పొలాల, గృహాల మురుగు నీరు డ్రైనులో కలిపే తూము సరిగా లేక - ఒక వంక లోతుగా మురుగు కాల్వ, మరో వంక వీధి మార్జిన్ ఆక్రమణతో రోడ్డు ఇరుకై, గుంటలో వాహనాలు ఒరిగిపోతుంటే - ఆ తూముకు జాయింటు వేసి, క్రింద నుండి ఊరి రద్దును తెచ్చి నింపి, భారీ సిమెంటు స్తంభాన్ని అడ్డుగా సర్ది, అన్నిటి భద్రతగా పెగ్గుల్ని పాతి అక్కడి వీధి పచ్చదనాన్నీ, వాహన క్షేమాన్ని సాధించిన స్వచ్ఛ కార్యకర్తలకు గ్రామస్తుల తరపున అభివందనాలు!

- ఒకానొక స్వచ్ఛ కార్యకర్త

  01.02.2024.