ఒక్కసారికి మాత్రమే పనికివచ్చే ప్లాస్టిక్ వస్తువులను వాడనే వాడం.

2117* వ నాటి స్వచ్ఛ – సుందరోద్యమ చల్లపల్లి.

ఈ ఆదివారం(31.01.2021) నాటి మంచు ముసిరిన తొలి వేకువలో – 4.22 కే మొదలైన స్వచ్చోద్యమ కారుల బాధ్యతామయ పారిశుధ్య సంరంభం 6.20 కి గాని - ఇద్దరు పెద్ద వాళ్ళ పదేపదే అభ్యర్ధనతో గాని ముగియలేదు. నేటి వీధి శుభ్రతా కర్తలు 38 మంది. కార్యరంగమేమో విజయవాడ మార్గంలో, 6 వ నంబరు పంట కాలువ – గాంధీ స్మృతి వనాల నడిమి చోటు. స్వభావ రీత్యా ఈ పని ముప్పేటలుగా జరిగిపోయింది – అది కూడ చల్లపల్లి స్వచ్చోద్యమ ముఖ్యుని సారధ్యరహితం గాను, కార్యకర్తల స్వయం సారధ్యంలోను!

ఈ నాటి స్వచ్ఛ ఉద్యమ సందడిలో తొలిభాగం పంట కాలువ దక్షిణాన – గ్రామ సచివాలయ పడమటి వైపునే కనిపించింది. అక్కడి నానా దుర్భర కల్మషాలు నిండిన డ్రైను మట్టిని రెండు ట్రక్కులలో ఒకే మారు – పదేసి మంది కార్యకర్తలు పోటీ పడి, చలోక్తులు – చమత్కారాల నడుమ నింపుకొని, రుద్ర భూమిలోని దహనవాటికల దగ్గరకు తరలించారు. ఇద్దరు మహిళా కార్యకర్తలకు బిగిసిన ఆ గడ్డల నుండి ప్లాస్టిక్ సంచులు, సీసాలు, పిచ్చి గుడ్డ ముక్కల్ని విడదీయడంతోనే సరిపోయింది. గంటన్నర కాలానికి పైగా ఆ 30 – 40 గజాల జాగాను  చూస్తుంటే చల్లపల్లి గ్రామ స్వచ్చోద్యమ కర్మాగారం అనిపించింది! అదీ గాక – శతాబ్దం క్రిందటే దేశ పారిశుధ్య – సామాజిక – రాజకీయ రంగాల్లో సమూల పరివర్తనలకు పూనుకొన్న గాంధీ మహనీయుని (విగ్రహ) సమక్షంలో – ఈ తొలి సంధ్యలో – ఈ పునర్నవీకృత చల్లపల్లి పారిశుధ్య కృషి మరింత సమంజసంగా తోచింది!

నేటి స్వచ్ఛతా సంరంభంలో రెండో భాగం – పంట కాలువకు ఉత్తరాభి ముఖంగా – డ్రైనులోని, దారి కిరుప్రక్కలా నెలకొన్నది. పడమటి డ్రైనులోని కల్మషాల మీద ఐదారుగురి, బెజవాడ బాట మీద దుమ్ము – ధూళి మీద మహిళల చీపుళ్ళ పోరాటం జరిగింది. షరామామూలే – కాలువ లోని, గట్టు మీది ప్లాస్టిక్ తుక్కుని, ఖాళీ సారా సీసాలని, ఎండు గడ్డితో సహా పిచ్చి – ముళ్ళ మొక్కల్ని ఖండించి, దంతెలతోలాగి, ట్రాక్టర్ లో కెత్తి, డంపింగుకు చేర్చారు. కనీసం మరి రెండు నెలల దాక ఈ ప్రదేశాన్ని స్వచ్ఛ – శుభ్ర – సుందరంగా దీవించారు!

ఇక మూడోదళం అక్కడికి ఉత్తరంగా – దూరంగా  రకరకాల పూల మొక్కల కుదుళ్లలోపాలను సరిదిద్దుతూ, అవసరమైన చోట్ల కత్తిరిస్తూ, మెరుగుపరుస్తూ – తమకు సంతృప్తి  కలిగే దాక ప్రయత్నిస్తూనే ఉన్నారు.

ఈ 21 వ శతాబ్దంలో చల్లపల్లి స్వచ్చోద్యమం ఎందుకు విశిష్టమైందనీ, 2117* రోజులకు పైగా నిరాటంకంగా ప్రవర్ధమానమౌతున్నదనీ కొందరిలాగే నేనూ ప్రశ్నించుకొంటే – తట్టిన సమాధానమిది :

- ఇందులో గ్రామ చింతన తప్ప స్వార్ధ చింతనలేని కార్యకర్తలున్నారు.

- తమ సంపాదనలో కొంత భాగం గ్రామ సుందరీకరణకై వెచ్చించేవారున్నారు.

- ఫించను రావడమే ఆలస్యం – స్వచ్చోద్యమానికి ఎడాపెడా ఖర్చు పెట్టే వ్యక్తులున్నారు.

- తన నగల్ని తాకట్టు పెట్టీ – అమ్మేసీ వీధి సుందరీకరణలను సాధించే ఒకానొక మహిళ ఉన్నారు.

- ఈ ఉద్యమ లక్ష్యం నచ్చి. ఉద్యమ సారధులను నమ్మి, లక్షలాదిగా ధనవితరణపరులున్నారు.

          ఐతే ఇప్పటికీ ఈ శ్రమదానాన్ని ఉపేక్షిస్తూ – నేటికీ పాల్గొనని కొందరు గ్రామస్తులెందుకున్నారు?

          6.40 సమయంలో కాఫీ ముచ్చట్ల పిదప జరిగిన నేటి పారిశుధ్య కృషి సమీక్షా కాలంలో – గాంధీ విగ్రహ పాదపీఠం దగ్గర కూర్చుని ముమ్మారు ఈ గ్రామ స్వచ్ఛ – శుభ్ర – సౌందర్య సంకల్ప నినాదాలను ప్రకటించిన వారు నందేటి శ్రీనివాసుడు.

బుధవారం (03.02.2021) నాటి వేకువ 4.30 కు మనం కలుసుకోవలసిన చోటు – ఈ జాతిపిత విగ్రహ ప్రాంతమే!

       ఇంకెవ్వరు- మరెవ్వరు?

నిస్వార్ధత – నిబద్ధతల నిలువుటద్దమెవ్వరు?

మధ్యందిన స్వచ్చోద్యమ మార్తాండులు ఎవ్వరెవరు? 

స్వచ్చోద్యమ చల్లపల్లి సాహస జీవనులెవ్వరు?

స్వచ్ఛ చల్లపల్లి కార్యకర్తలుగాకింకెవ్వరు!

నల్లూరి రామారావు,

స్వచ్ఛ సుందర చల్లపల్లి కార్యకర్త,

31.01.2021.