ఒక్కసారికి మాత్రమే పనికివచ్చే విషతుల్యమైన ప్లాస్టిక్ వస్తువులను వాడము గాక వాడం!

35 మంది నిర్వహించిన 2165* వ నాటి గ్రామ స్వచ్ఛ – సుందరీకరణం.

ఈ ఆదివారం (4.4.21) వేకువ 4.21 కే – బైపాస్ మార్గంలోని కమ్యూనిస్ట్ వీధి చివర సమాయత్తులైన 19 మంది, మరొక 18 మంది కాస్త వెనుకాముందు గాను కలిసి మొత్తం 37 మంది ప్రణాళికాబద్ధంగా చేసిన 1 గంటా ఏభై నిముషాల శ్రమదానంతో 200 గజాల మేర బైపాస్ బాట కాస్తా నానా కంగాళీలను వదిలించుకొని, వందలాది మంది స్థానికులకు, ప్రయాణికులకు సౌకర్యాన్ని, ఆహ్లాదాన్ని పంచుతున్నది. (ఐతే – సదరు కంగాళీల కారకుల, ఆహ్లాద అనుభవదారుల మరియు ఈ స్వచ్ఛ – శుభ్ర – సుందరీకర్తల నిష్పత్తి మాత్రం వేలమంది : 35 మంది!)

బ్రాకెట్లలో వ్రాసింది నా సొంత ఆలోచన. గ్రామ బాధ్యతా కర్మిష్టులైన స్వచ్చోద్యమకారులు మాత్రం వేల దినాల నుండి తమ ఊరి ఔన్నత్యం కోసం తామనుకొన్నది శక్తివంచన లేకుండ చేస్తూనే పోతున్నారు! శ్రమదానంతో బాటు సమయ – నగదు దానాలు ఏనాడో అలవరచుకొన్నారు. తమ, తమ వారల పుట్టిన, వివాహ ఘట్టాల వార్షిక వేడుకలను సైతం నడి రోడ్ల మీద – సోదర కార్యకర్తల సమక్షంలో జరుపుకొనే ఒక క్రొత్త సంఘటిత సుహృద్భావం, శ్రీశ్రీ చెప్పినట్లు “వ్యక్తికి బహువచనం శక్తి" అనే అవగాహన వంటి లక్షణాలు కనీసంఈ ఒక్క గ్రామంలోనైనా చూడగల్గడమే పెద్ద విశేషం! ఈ 21 వ శతాబ్దిలో స్వచ్చోద్యమ చల్లపల్లే ఒక ఒయాసిస్!

చాల నెలల తరువాత ఈ ఆదివారం వేకువ ఈ బైపాస్ వీధిలో కార్యకర్తల శ్రమ విన్యాసాలిలా ఉన్నవి :   

1. సామ్యవాద (కమ్యూనిస్ట్) వీధికి పడమర భాగాన్ని సుందరీకరణ ముఠా సొంతం చేసుకుని, ఉత్తరం వైపు రహదారి వనంలోని ఆకులు, గడ్డి, అవసరం లేని మొక్కల్ని, ఖాళీ సీసాలుంటే – ప్లాస్టిక్ సంచులుంటే అన్నిటినీ తొలగించారు. వనం వెలుపలి అన్ని రకాల తుక్కుల్నీ, బాట మీది దుమ్మునూ ఊడ్చి – ఏరి శుభ్రపరిచారు. అసలీ బృందం దారే వేరు - ఏ భాగాన్ని తీసుకొన్నా అది నాణ్యమైన అద్దంలా మారిపోవలసిందే.

2. ఇక కత్తుల – దంతెల వీరులు 17 – 18 మంది అక్కడి నుండి తూర్పుగా ప్రధానంగా బైపాస్ దారిని, కొసరుగా కుడి ఎడమల చిన్న రోడ్లనూ ఎంతగా శుభ్రపరిచారంటే – మురుగు కాల్వలోని కొన్ని వ్యర్ధాలు, కాల్వ ఒడ్డు మీద పెరిగిపోయి, ఏ మాత్రం నచ్చని పిచ్చి మొక్కలూ, హద్దులు దాటి పెరిగిన పూల మొక్కల కొమ్మలు, గడ్డి, ఖాళీ సీసాలు, వంటి వెన్నో తొలగిపోయి, దంతెల – చీపుళ్ళకు చిక్కి, డిప్పల ద్వారా ట్రాక్టర్ లోకి (ఈ పని ఇద్దరు మహిళలది!) ఎక్కి, చివరకు చెత్త కేంద్రానికి చేరిపోయినవి.

స్వచ్ఛ కార్యకర్తలది నిస్వార్ధ – ప్రజోపయుక్త - పని సంస్కృతి అని అందరికీ తెలుసు కాని – దగ్గరగా ఉండి, పరిశీలిస్తే తెలిసేదేమంటే – వాళ్లు శ్రమదానాన్ని చాలా ఇష్టంగాను, వేడుక గాను నిర్వహిస్తారని! మధ్యలో ఒకరిద్దరి గట్టి అరుపులు వినిపిస్తే వినిపిస్తాయి గాని, పని సమయంలో ఎన్నో ఛలోక్తులు, చమత్కార సంభాషణలు, కొండొకచో - మాయా బజారు సినిమాలో ఘటోత్కచుడు చెప్పినట్లు – క్రొత్త పదాలు సైతం అప్పటికప్పుడు పుట్టుకు వస్తూనే ఉంటాయి.

3. కొసరుగా, విజయ్ నగర్ లో ఒక వీధిని, సజ్జా ప్రసాదు గారి బాటలో కొంత భాగాన్ని కూడ కశ్మలరహితంగా పరిష్కరించారు.

         6.35 తరువాత డాక్టరు గారి సమీక్ష/ విశ్లేషణకు ముందు మూడు మార్లు స్వగ్రామ స్వచ్ఛ – శుభ్ర – సౌందర్య సంకల్ప నినాదాలు ఎలుగెత్తి చాటినది – ఒకప్పటి స్వచ్ఛ – చల్లపల్లి నవయువ కార్యకర్తల్లో ఒకడైన సాధనాల సతీష్! దుర్గా ప్రసాదు మాష్టారుతో కలిసి కార్యకర్తలకు (భారీ) అల్పాహారాన్ని తినిపించడమే గాక – ‘మనకోసం మనం’ ట్రస్టుకు 3,000/- కూడా విరాళాన్ని సమకూర్చిందీ అతడే! (సందర్భం – ఇటీవల తన ద్వితీయ కుమార్తె తొలి జన్మదినం)

         ఇక శంకర శాస్త్రి గారి సంగతి చెప్పేదేముంది – పెన్షను ఇంకా రాకుపోయినా మేనేజింగ్ ట్రస్టీ గారికి 5000/- చెక్కుతో ఆయన రడీ!

అటు ధ్యానమండలి ముఖ్యుడూ – ఇటు స్వచ్చ చల్లపల్లి బాధ్యుడు అయిన రాయపాటి రాధాకృష్ణ గారు కూడా అంతే! ఇంకా ఫించను అందకపోయినప్పటికీ 1,000/- విరాళం డా.డి.ఆర్. కె గారికి సమర్పించడం ఆయనకే చెల్లు.     

         బుధవారం (6.4.2021) నాటి మన వీధి శుభ్రతా సాధన కోసం మనం మరల ఈ నాటి ప్రదేశంలోనే కలుసుకుందాం.

      వాళ్లతి  రధమహారధులు.

ప్రజా స్వస్తతల పోరున వారతి రధమహారధులు

అండదండలాసించనిఅసహాయ మహాశూరులు

ఐక్యమహా స్వచ్ఛ సేన కను నిత్య ప్రవర్తకులు

స్వచ్చోన్నత చల్లపల్లి సమగ్రతకు అంకితులు!  

ఒకానొక ‘స్వచ్ఛ సుందర చల్లపల్లి’ కార్యకర్త

04.04.2021.