ఒక్కసారికి మాత్రమే వాడి వదిలించుకొనే ప్లాస్టిక్ వస్తువులు వేటినీ వాడనే వాడం!

ఆదర్శ గ్రామ నిర్మాణంలో 2208^* వ నాడు.

            గురువారం (19.08.2021) నాటి బ్రహ్మ ముహూర్త (4.20 Am) సమయంలో గంగులవారిపాలెం దగ్గరి మురుగు కాల్వ వంతెన దగ్గరకు చేరుకొన్న స్వచ్ఛ కార్యకర్తలు 10 మంది, ఇంకొద్ది నిముషాల్లో వానలోనే తడుస్తూ వచ్చి కలిసిన 8 మంది. ఈ ఆష్టాదశ స్వచ్చంద శ్రమకారుల స్వయం నిర్దేశిత కార్యం – వంతెనకు తూర్పు అభిముఖంగా బండ్రేవు కోడు మురుగు కాలువ కుడి (దక్షిణ) గట్టు మీద మొక్కలు నాటడం!

            ఒకరిద్దరు అక్కడి రైతులు, కూలీలు కాక ఈ గట్టు మీద రాకపోకలు  జరిపే వారుండరనుకొంటా. అందుకే అది పేరుకు బాటే గాని ఎన్నెన్నో పనికి రాని పిచ్చి – ముళ్ళ మొక్కలు, తుప్పలు, తీగలు పెరిగి పోయిన దారి. ఆ చీకట్లో – చినుకుల్లోనే మొక్కల పాదులు తీసే ముందుగా బాటను సుగమం చేస్తూ కార్యకర్తలు గంటకు పైగా పెనుగులాడారు. అందులో 10 గజాల మేరైతే ఎండి, వాడిన పులుగుడు కంపతో వికారంగా ఉన్నందున – ఆరేడుగురు అతికష్టమ్మీద తొలగించి, దారిని విశాలపరిచారు.

            అరకిలోమీటరు కాల్వ గట్టు దారి మీద ‘ఎర్ర తురాయి’ మొక్కల్ని నాటారు. అంతేనా – వంతెన నుండి దక్షిణాభి ముఖంగా ఎడమ ప్రక్కన ‘అడవి తంగేడు మొక్కలు (గద్ద గోరు)’ కూడా ఈరోజే కొలువు తీరినవి. తుంపర చినుకుల చిందుల నడుమనే ఈ నాటి వీరి శ్రమ మాటకేం గాని, కొన్ని మాసాల వ్యవధిలో అవి పెరిగి, పూలు పూసినప్పుడు – బహుశా వసంత మాసం నాటికి ఈ మూడు బాటల ముక్కోణ దృశ్యం వాహ్యాళి జరిపే పాదచారులకు, బైపాస్ మార్గ ప్రయాణికులకు, గ్రామ చివరి వార్డు ప్రజలకు, రైతులకు ఎంత ఆహ్లాదకరంగా మారుతుందో చూసి తీరాలి!

            “అందమె ఆనందం – ఆనందమె జీవన మకరందం ...” అని (బ్రతుకు తెరువు సినిమా) గీతం రాసిన జూనియర్ సముద్రాల, పాడిన ఘంటసాల గుర్తుకు వస్తారేమో!

            6.20 సమయాన – కాఫీ కబుర్ల సరదా వేళ DRK గారు నిర్వహించిన నేటి శ్రమదాన సమీక్షకు ముందు మండవ బాలవర్ధనుడు ముమ్మారు ఎలుగెత్తిన గ్రామ స్వచ్ఛ – శుభ్ర – సుందర సంకల్ప నినాదాలూ, స్వచ్చోద్యమ కారుల సుదీర్ఘ గ్రామ బాధ్యతా స్వీకరణ పట్ల వెలిబుచ్చిన అభిప్రాయాలూ కార్యకర్తల మన్ననలు పొందాయి.

ఇదే కాలువ గట్టు దక్షిణ దిక్కున – వంతెనకు తూర్పు – పడమర దిక్కుల్లో మరిన్ని మొక్కలు నాటే కర్తవ్యం కోసం రేపు వేకువ ఈ వంతెన దగ్గరే మనం కలువ వలసి ఉన్నది.

           భారతంతో కొత్త పోలిక

ధర్మ స్థాపన కోసం కదనరంగ చరితం అది

స్వచ్ఛ – శుభ్ర – సౌందర్యం సాధనకై ప్రయత్న మిది

వీర గాధలే రెండూ – వేరే ఉభయుల గమ్యం

ఏదతి రస వత్తరమో – ఏది ప్రయోజన కరమో!

ఒక ‘స్వచ్ఛ సుందర చల్లపల్లి’ కార్యకర్త

19.08.2021.