ఒక్కసారికి మాత్రమే పనికొచ్చే ప్లాస్టిక్ వస్తువులను వాడము గాక వాడం!

216 వ జాతీయ రహదారి హరితోద్యమంలో - 2233^* వ నాటి కృషి.

20 వ సెప్టెంబరు వేకువ 4.20 నుండి 6.45 దాక – సుమారు రెండు గంటల సమయం బళ్ళ నాగన్న ఆశ్రమం దగ్గర ఆగి, ఉభయ పార్శ్వాలలో క్రిక్కిరిసిపోయేంతగా పూల మొక్కలు నాటిన 8 మంది శ్రమదాతలకు శుభాభివందనాలు! మొక్కలు బాగా బ్రతికి, పెరిగి, ఋతువు నడుమనే – తరి తప్పకుండ – ఒక్క ఉదుటున 84 మొక్కల పాదులు త్రవ్వి ప్రతిష్టించాలనే నిన్నటి నిర్ణయాను సారం జరిగిన సత్కార్యానికి స్వాగతం!

గత నాల్గు దినాల వానలకు బాట ప్రక్కల ఏటవాలు నేల చక్కగా పదునై పెట్టిన ప్రతి మొక్కా బ్రతికి, దిన దిన ప్రవర్ధమానములై – వసంత ఋతువు నాటికి విరగ బూసే దృశ్యం నాకిప్పుడే కనిపిస్తున్నది. ఈ వేకువ నాటిన ఎక్కువగా మూడు రంగుల అడవి తంగేడు పూల మొక్కలు, పరిమితంగా చైనా బెర్రీ, రేల మొక్కలూ – మొత్తం 84 కొలువు తీరినవి. అంతకుముందు నాటి బ్రతికి, పెరిగి, ఈ రహదారిలో వచ్చే పోయే వారికి నవ్వులు పంచుతున్న వందలాది పూల మొక్కలకూ, వరి పొలాల శ్యామల వర్ణ నేపధ్యంలో పెరుగుతున్న డజన్ల కొద్దీ పచ్చని వృక్షాలకూ ఇవి అదనం!

పరిసర గ్రామస్తులు గాని, దూర ప్రయాణికులు గాని ఈ 2 – 3 కిలో మీటర్ల సువిశాల – సుశ్యామల – సుమ శోభిత రహదారి నిర్మాతలైన చల్లపల్లి స్వచ్ఛ కార్యకర్తల వేల దినాల శ్రమదానాన్ని తలచుకొని సందేహించరాదు – జాలిపడరాదు - వట్టి అభినందనలు కనిపించరాదు! ఎవరి ఊరిని, వీధుల్ని, పరిసరాల్ని వారు పోటీపడి ఇంతకన్నా మిన్నగా తీర్చిదిద్దుకోవడమే చేయదగిన భవిష్య కార్యం! ఇక అప్పుడు మన గ్రామాలు, జిల్లాలు, రాష్ట్రాలు కూడ న్యూజిలాండ్ లుగా – స్విడ్జర్లాండ్లుగా – స్వీడన్ లుగా మారిపోవా?

6.45 ప్రాంతంలో ఈ అష్ట సంఖ్యాక శ్రమదాతలు ‘మనకోసం మనం’ కార్మిక పర్యవేక్షకుడు కస్తూరి శ్రీను ముమ్మారు ప్రకటించిన స్వగ్రామ స్వచ్ఛ - శుభ్ర – సౌందర్య సాధనా సంకల్ప  నినాదాలకు బదులిచ్చి గృహోన్ముఖులయ్యారు.

బుధవారం వేకువ మన స్వచ్ఛ కార్యక్షేత్రం కాసానగర్ సమీపమే!

            ఇట్టి వాళ్ళకె నా ప్రణామం – 10

ఇచట శుభ్ర – స్వచ్ఛ యజ్ఞం – అచట సుందర పుష్పలోకం

మరొక చోటున మురుగు కాల్వల మరామత్తుల విశ్వరూపం 

ఊరిలో ప్రతి మూల రోజూ ఉనికిలో ఉద్యమ విశేషం

చల్లపల్లి విశిష్ట ఉద్యమ సారధులకే మా ప్రణామం! 

ఒక ‘స్వచ్ఛ సుందర చల్లపల్లి’ కార్యకర్త

20.09.2021.