ఒక్కసారి మాత్రమే వాడే ప్లాస్టిక్ వస్తువులు మనకెందుకు?
స్వగ్రామం కోసం ఇదొక నిరంతర - నిర్విఘ్న శ్రమదానం - @2347*
ఔను - ఇది శుక్రవారం - (11-2-22) 4:17 వేకువ సమయం! 2 గంటలకు పైగా - 21 మంది గ్రామ సామాజిక చైతన్యకారుల వీధి శుభ్రతా ప్రయత్నం! వేలాది రోజుల్లాగా ఇది ఫలప్రదం - అటు ఊరి స్వస్తత దృష్ట్యా శ్రేయోదాయకం - ఇటు తమ ఈ నాటి కర్తవ్య పరిపూర్తి చేసిన స్వచ్చ సైనికులకు సంతృప్తిదాయకం! విజయవాడ రహదారిలో శివాలయం దాక సుమారు మరొక 100 గజాల అన్ని రకాల కశ్మలాలకు 20 మంది పాడిన మంగళం! (ఇంతటి శుభ సంకల్పం చూస్తున్న - చేస్తున్న నావంటి భావుకుల హృదయాలు కవితాత్మకం!)
అందుకే – నాకు ఎన్నడూ కనిపించని దేవాధి దేవునికి ఇది పదే పదే నా విన్నపం!
“హే ప్రభూ! ఇంకా ఎన్నేళ్లకు నా ఊరి రహదార్ల గుంటలకు మోక్షం?
ఎప్పటికి ఈ వీధి శుభ్రతలకు, రోడ్ల భద్రతలకు నా గ్రామస్తుల, అధికార్ల కటాక్షం?
ఇంకెన్ని దశాబ్దాలు ఈ సమాంతర – విరుద్ధ గ్రామ సంస్కృతీ సంప్రదాయం?
గ్రామ ప్రముఖుల్నుండి, ఆలోచనా పరుల్నుండైతే వస్తున్నది గాని ఆర్దిక - హార్దిక సహకారం,
ఇప్పుడు కావలసింది మాత్రం విజ్ఞ సోదర గ్రామస్తుల శ్రమదాన భాగస్వామ్యం!
సర్వజ్ఞుడైన దేవ దేవుని కిదే నా సంప్రార్ధనం!....”
చల్లపల్లి ప్రధాన వీధిలో అందరివీ కలిపి 40 కి పైగా పనిగంటల శ్రమదానం! కోట మలుపులో - తారు పెచ్చులూడి పోయిన రోడ్డు మీద - శివాలయం దాక ఇందరి సముచిత శ్రమదానం. ఆ వంద గజాల్లోనే మెకానిక్కుల షెడ్లు, చిరు దుకాణాలు, టీ కొట్లు, భోజనశాలలు, తోపుడు బళ్లు వగైరాలు. అసంఖ్యాకంగా రకరకాల వాహనాల రాకపోకలు! అక్కడే ఈ శ్రమదాతల చీపుళ్ల ఊడుపు శబ్దాలు, పారల గోకుడు చప్పుళ్లు, ట్రాక్టర్ లోకి బోలెడంత దుమ్ము - ధూళి కంకర పెచ్చుల నింపుళ్లు!
ఇవాళటి శ్రమదాన సందడి చూస్తుంటే - ఇది వృద్ధుల స్పెషల్ అనిపించింది. 84-83 ఏళ్ల, 74-75 ఏళ్ల వృద్ధులు ఈ చీకటి చలి వేకువ వేళ వీధి శుభ్రతకు పూనుకోవడం ఒక విధంగా నిబిడాశ్చర్యకరం! అంతేగాక - నేటి శ్రమదానం NRC (నాన్ రెసిడెంట్ చల్లపల్లీస్) ప్రత్యేకం కూడ! కనీసం ఇద్దరు ఔత్సాహికులు – అమెరికా నుండీ, కన్నడ దేశం నుండి పాల్గొన్నారు మరి! ఇందులో ఒకరు చెత్తబండి లోడింగులో ఉంటే, 84 ఏళ్ల స్వచ్చ వృద్ధ బాలుడేమో ఈ శ్రమదానం పట్ల పరమానంద భరితుడు!
మహిళలు శక్తిని కేంద్రీకరించి ఉడ్చాక – మూత్ర విసర్జిత జాగాలో వ్యర్ధాలను ఏరి, ముళ్ల మొక్కల్ని నరికి శుభ్రపరిచాక - నేటి వ్యర్థాలను ట్రక్కులోకి ఎక్కించాక – 100 గజాల వీధిని సంతృప్తికరంగా మెరుగు పరిచాక - 10 నిముషాల కాఫీ - సరదా కబుర్లు గడిచాక - అమెరికా చాక్లెట్లను నాదెళ్ల సురేష్ గారు పంచాక –
6.45 కు ఒక కర్ణాట కాంధ్రుడు - వేమూరి అర్జునుడు - నూతనోత్సాహంతో గ్రామ పరిశుభ్ర - స్వచ్ఛ - సౌందర్య సంకల్ప నినాదాలను ముమ్మారు ప్రకటించాకనే కార్యకర్తలు ఇంటి దారి పట్టారు.
రేపటి ఆవశ్యక శ్రమదానం కోసం మనం చేరుకొని, కలుసుకొని, ప్రయత్నించవలసిన ప్రదేశం శివాలయం దగ్గరే!
సంకుచితత్త్వం జిందాబాద్!
నేను – నాదే – నాకె సర్వం - 'మనం' అన్నదె మరచి పోదాం
భవితలెందుకు - నవతలెందుకు? పాత రోతతో బ్రతుకుతుందాం
ఆరేడు ఏళ్ళుగ చల్లపల్లిలొ స్వచ్ఛ సైన్యం పట్టనట్లే
ఎవరి స్వార్థం వాళ్లు చూస్తూ గ్రామ స్వస్తత మరచిపోదాం !
- నల్లూరి రామారావు,
స్వచ్ఛ సుందర చల్లపల్లి కార్యకర్త,
‘మనకోసం మనం’ ట్రస్టు బాధ్యుడు
11.02.2022.