ఏక మాత్ర ప్రయోజనకరమైన సామానులు మనకెందుకు?

ఆదివారం – 2357* వ నాటి స్వచ్చోద్యమ వీర విహారం!

            ఔను - ఈ వేకువ 4.20 నుండి 6.20 దాక విజయవాడ మార్గంలో 30 మంది చేసింది వీరోచిత శుభ్ర – సుందరీకరణం కాక మరేమిటి? ముంబై, హైదరాబాదీయులకు దీటుగా ఇప్పుడు మన గ్రామస్తుల్లో కూడ చాల మంది ఉషోదయ వేళ మేల్కొని, తొలి బాలభానుడి ఆహ్లాదకర ప్రసన్న రూపాన్ని చూడడం మానేశారు - ముఖ్యంగా ఆదివారాలలో ఐతే 7-8-9 గంటలకు మేల్కొనే అలవాటు వచ్చేస్తున్నది.

            స్వచ్ఛ కార్యకర్తలేమో ఏ 3.30 కో లేచి, ఒక ప్రక్క స్వకుటుంబ బాధ్యతల్నీ, అటు గ్రామ కుటుంబ శ్రేయస్సునూ సమన్వయించుకొంటూ ఇలా కంటికి కనిపించని వాతావరణ కాలుష్య ఉమ్మడి శత్రువును ఏ రోజుకారోజు ఎదుర్కొంటూ కనీసం 2 గంటల పాటు పోరాడుతుంటారు!

            ఈ యోధుల్లో ఇవాళ ఏడేళ్ల నుండి 84 ఏళ్ల వయస్సు వాళ్లు - ఎవరి శక్తి కొలదీ వాళ్లు ఒకే లక్ష్య సాధన కోసం - ఒక పెద్ద వీధి స్వచ్ఛ – శుభ్ర – సౌందర్య కల్పన కోసం పనిచేశారు!

            ఈ ఏడెనిమిదేళ్లుగా స్వచ్ఛ సైనికుల గమ్యం ఒక్కటే కావచ్చు; దూరం నుండి చూసే కొందరికి “ఒకే పని చేస్తూ అవే పాటలు వింటూ - అవే నినాదాలు చేస్తూ – ఆ రోడ్లే ఊడుస్తూ – ఆ రోడ్ల ప్రక్క స్థలాల్ని ఆక్రమణల్నుండి రక్షించుకొంటూ – పూల మొక్కలు నాటుతూ - చెట్లు పెంచుతూ - మధ్య మధ్య కొన్నాళ్లు ఏ శ్మశానాన్నో – బస్ ప్రాంగణాన్నో - గుడినో - ప్రభుత్వ కార్యాలయాన్నో శుభ్రపరుస్తూంటే - చూసి చూసి బోరు కొట్టుతుండవచ్చు కూడ!

            “కనీసం 7 గంటలదాకైనా పడుకొని, నిద్ర పోనీయకుండా మా ఇళ్ళ ప్రక్కన ఈ చీకట్లో – మంచులో – ఈ సందడేంటి? ఈ మైకు పాటలేంటి?..” అని చిరాకూ కలగొచ్చు! అది వాళ్ల అవకాశం, అదృష్టం! ఈ స్వచ్ఛంద శ్రమదానం వీళ్ల బాధ్యత! బాధ్యత అని భావించకపోతే - 

            క్షణం తీరిక చిక్కని గృహిణులు, ఆస్పత్రి నర్సులు, ఉద్యోగులు, వ్యాపారులు, డాక్టర్లు, ఇళ్లకు పరిమితం కాదగ్గ పెన్షనర్లు ఇంత వేకువ చలిలో - మంచులో ఇంత సుదీర్ఘ కాల పారిశుద్ధ్య పనులు చేస్తారా? లక్షల గంటల విలువైన కాలాన్నీ, కష్టార్జిత ధనాన్నీ తమ గ్రామ పౌర సమాజం కోసం వెచ్చిస్తారా?

- ఇవన్నీ నావంటి కొందరి వ్రాతలూ, భావ ప్రకోపాలే! నిత్య కర్మిష్టులైన స్వచ్చ కార్యకర్తలు మాత్రం యధా ప్రకారంగా –

- విద్యుత్ కార్యాలయం ఎదుటి రోడ్డు దుమ్మునూ, ఆకులలముల్నీ, మురుగు కాల్వనూ, దాన్ని మూసేస్తున్న పిచ్చి తీగల్ని తమకు నచ్చేంతగా శుభ్రం చేశారు;

- ముగ్గురు నలుగురు రహదారి బంగళా ఎదుట నిన్నటి దాక తాము శుభ్రం చేసిన రోడ్డు మార్జిన్ లో గద్ద గోరు పూల తోటను సృష్టించారు! MRO ఆఫీసు ఎదుట పూల మొక్కల్తో సహా ఏ 30-40 పూల మొక్కలో ఇప్పుడు కనిపిస్తున్నవి!

- పెట్రోలు బంకు నుండి ఉత్తరంగా డ్రైను గట్టుల్ని కాలుష్య రహితం చేశారు.

రోడ్డు ఊడ్చే కార్యకర్తలు తమపనిలో తామున్నారు!

            6.40 – నినాదాల వేళ, సమీక్షా సందర్భంలో ముమ్మారు ఊరి సచ్చ – శుభ్ర – సౌందర్య నీరాజనాలు పలికింది గోళ్ళ వేంకటరత్నం; మనఃపూర్వకంగా గ్రామ శ్రమదానాన్ని మెచ్చింది డాక్టరు DRK. ఈ శ్రమదానోద్యమం ఒక విప్లవం అని తేల్చి చెప్పిందేమో - అడపా గురవయ్య నామధేయుడు!

            ఇక మన బుధవారం నాటి వేకువ వీధి పారిశుద్ధ్య కృషి కొనసాగించవలసిన చోటు విజయవాడ రోడ్డులోని పెట్రోల్ బంకు దగ్గరే!

            స్వచ్చోద్యమ రీతులు

వీధులలో కొలువున్నవి వేనవేల మొక్కలు

కర్మల భవనాలు ఇంక శ్మశానాలు రహదారులు –

అవి - కార్యకర్త కరస్పర్శతో పర్యాటక ప్రదేశాలు

అనుసరించి అనుష్టించు ఆ ఉద్యమ రీతులు!

- నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

   20.02.2022.