ఏక మాత్ర ప్రయోజనకరమైన ప్లాస్టిక్ సామానులు మనకెందుకు?

బుధవారం నాటి బెజవాడ దారి పారిశుద్ధ్యం - @2360^*.

            23.02.2022 వ నాటి వేకువ 15 మంది కార్యకర్తలు చేరుకుని కలుసుకొన్నది 4.20 సమయంలో; పని ముగించింది 6.20 కి. 24 మంది శ్రమదాతల కార్యరంగం – విద్యుత్ కార్యాలయం, వికాస కేంద్రాల నడుమనే! జీతభత్యాలాసించని - గ్రామ సమష్టి ప్రయోజనం కోసం సాగిన ఈ చరిత్రాత్మక కృషి నిడివి – కాలం కొలతలో – 48 పని గంటలు! దాన్ని గత 8 ఏళ్లుగా గణిస్తే మాత్రం 3 లక్షల ఏబై వేల గంటలు!

            ఇదే వాట్సప్ మాధ్యమ వేదికలో చాల మార్లు మనం ప్రస్తావించుకొన్నట్లు - చల్లపల్లి స్వచ్ఛ కార్యకర్తల సంఖ్య మొత్తమ్మీద 180 - 200 ఉండవచ్చు! ఇంచు మించుగా అందరూ నిష్కామ కర్మయోగులే! అందుచేతనే వాళ్లు అన్ని భూషణ – దూషణ - తిరస్కార – పురస్కార - నిరర్థక విమర్శలకు అతీతులు! ఇక వీళ్లకు తీరుతున్న కోరికేమంటే – తాము నివసించే చల్లపల్లి క్రమక్రమంగా స్వస్త – పరిశుభ్ర - సుందరంగా మారుతుండడం! ఎన్నెన్నో గ్రామాల వారికి చైతన్య ప్రేరకంగా మారుతుండడం!

            స్వచ్ఛంద శ్రమదాతల తీరని ఒక ఆశయమేమంటే - ప్రతి వేకువలో తమ ఊరి బాగుకోసం, ఆహ్లాదం కోసం జరుగుతున్న ఈ అపూర్వ కృషిలో పాల్గొనే గ్రామస్తుల సంఖ్య పెద్దగా పెరగకపోవడం - చాలినంత స్పందన రాకపోవడం!

            అసలు ఏమంచి మార్పుకు ఈ స్వార్థపూరిత సమాజం నుండి సకాల - సముచిత ఆహ్వానం అందింది గనుక! చెడుకు దక్కేంత ఆదరణ, మన్నన అభ్యుదయకర చర్యలకు దక్కడం ఈ కాలంలో కష్టమే మరి!

            మహాభారత కథలో ద్రోణుడి శిష్యులందర్లోకి చెట్టు మీది బొమ్మ పక్షి కన్ను అర్జునుడికే కనపడిందట! - అసలదొక్కటే కనపడిందట! తమ ఊరి కాలుష్యం అనే పక్షి కన్ను ఈ వేకువ ఈ 24 మంది కార్యకర్తలకే కనపడిందేమో! ఇక తమ లక్ష్య సాధన కోసం ఈ శ్రమదాతలు :

- నలుగురేమో విద్యుత్ భవనం దగ్గర గత నెల దాక పడిన వానలకు పెద్ద దశ చక్ర వాహనాలతో రోడ్డు మార్జిన్లో పడిన పెద్ద గుంటల్ని పూడ్చారు.

- దానికెదురుగా రహదారి పడమరగా – ఏ పుణ్యాత్ముడు ఎప్పుడో ఆక్రమించి, దాచుకొన్న స్థలాన్ని క్షుణ్ణంగా శుభ్రపరిచింది ఏడుగురు గ్రామహితాభిలాషులు,

 - దీనికి ఉత్తర దిశగా నలుగురు మహిళలు, ఉభయ ప్రసాదులు ఆ మురుగు కంపు ప్రక్కనే అరగంట పాటు శ్రమించి శుభ్రంచేశారు!

- ఈ ఊరి వాళ్లకు, సమీప గృహస్తులకు పట్టని బెజవాడ వీధి పారిశుద్ధ్యం ఎప్పుడో అమెరికా వెళ్లిన ఇద్దరు ప్రవాసుల వంతైంది! నాదెళ్ల సురేష్ కాక, S.R.Y.S.P. కళాశాలోపన్యాసకుడు విజయ సారధి గారి పుత్రుడు - అనిల్‌ కూడ నేటి గ్రామ సేవలో పాల్గొనడం విశేషం!

- చెత్త లోడింగ్ లో చాకచక్యం, ట్రాక్టర్‌లో 1 వ, 2 వ కృష్ణుళ్లు, కాఫీ సమయపు సరదా చర్చలు, సమీక్షా కాలపు కబుర్లు.... షరామామూలే!

            ఈ వేళ అమెరికా తిరుగు ప్రయాణమౌతున్న సురేష్ 3 మార్లు నిర్దుష్టంగా, నిర్దిష్టంగా చెప్పిన స్వచ్ఛ – పరిశుభ్ర – సౌందర్య సంకల్ప నినాదాలు, ఉప్పల అనిల్ ఆనందాశ్చర్యాలు - అంతకు ముందు దేసు ప్రభాకర సమర్పిత బిస్కట్లు, ట్రస్టుకు 1000/- (ఇది ఆతని పుట్టిన రోజు బహుమతి - కొంచెం ఆలస్యంగా!) మరికొన్ని విశేషాలు!

            శివరాత్రి సమీపిస్తున్నందున మన రేపటి వేకువ శ్రమదాన రంగస్తలం, పెదకళ్లేపల్లి దారిలోని మేకలడొంక దగ్గరే!

            కరోనాతో అష్టకష్టం!

వేన వేల దినాల నుండీ వీధులన్నీ శుభ్రపరచీ –

కసవులూడ్చీ – మురుగు తోడీ – గ్రామ స్వస్తత పాదుకొలిపిన

కార్యకర్తకు కళ్ల ముందే - కరోనాతో గ్రామమంతా

కళాహీనత తాండవిస్తే ఎంత కష్టం! ఎంత కష్టం!

- నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

   23.02.2022.