ఒక్కసారి మాత్రమే వాడే ప్లాస్టిక్ వస్తువులు మనకెందుకు?
అదే ఊరి తొలి వార్డులో - 2402* వ శ్రమ సమర్పణం!
సదరు శ్రమ సమర్పకులు 25 మందే! ప్రారంభ సమయం సైతం వేకువ (శుక్రవారం-8.4.2022) 4.17 సమయమే! స్థలంలో మాత్రం కాస్త మార్పు – స్థూలంగా ప్రభుత్వ బాలికల వసతి గృహం నుండి బందరు రహదారి వరకు! మరికొంత వివరణగా ఐతే –
1) చర్చికి కుడి ఎడమల సిమెంటు దారులు,
2) వీల్ మార్ట్ పరిసరాలు,
3) ఒక మురుగు కాలువ,
4) ఆరేడుగురు మాత్రం పూల మొక్కల కుదుళ్ల సవరింపులు వగైరా!
పాతిక వేల జనాభాకు గాను ఈ పాతిక మందే నిత్య శ్రమదానం ఎందుకు చేస్తున్నదీ, (ఇంత సువిశాల-పురాతన గ్రామ మెరుగుదల కృషిలో గ్రామస్తుల్లో కొందరు సామాజిక చైతన్యవంతులై యుండీ – వారంలో అన్ని రోజులు కాకున్నా – కొన్ని రోజులైనా- గంటన్నర చొప్పునైనా – తమ ఊరి బాధ్యతలెందుకు స్వీకరించరో- ఈ అత్యవసర సత్కారాన్ని ఇంకా ఎన్నాళ్లు వాయిదా వేస్తారో.... గ్రహించలేకున్నాం!
అనవసర ఆవేశకావేశాల్నీ, కోపాన్ని, క్షణిక్రోద్రేకాల్నీ చెడు నిర్ణయాల్నీ, అంకెల్నీ లెక్కబెట్టి – ఆకాశం వంక చూసి వాయిదా వేసుకోవాలని నీతి శతక కవులూ, అనుభవుజ్ఞులూ చెప్పిన మాటైతే నిజం!
పిల్లలు, అనల్ప వయోధికులు, గ్రామ సమాజంలో తగిన గౌరవ మర్యాదల గుర్తింపు గల వృత్తి కారులు 2402 రోజులుగా నిర్వహిస్తున్న ఈ స్వచ్చ సుందర యజ్ఞంలో ఎప్పటికైనా భాగస్తులు కావాలనీ – ఆ సుముహూర్తం తొందరగానే* ఆగమించాలనీ మా విన్నపం - అభిలాషణం!
ఇంత పెద్ద ఊళ్లో చిన్నా చితకా 250 కి పైగానే వీధులున్నాయట! ఇప్పటికీ తిన్నగా తమ దారిలో తాము మర్యాదగా నడవక- హద్దులు దాటి రోడ్ల మీది కెక్కుతున్న మురుగు కాల్వలున్నాయి! ఇంకా పచ్చదనం పరిమళించని- పూల ఘుమఘుమలు సోకని, మట్టి కొట్టుకొని, కళాకాంతులు లేని – రోడ్లు, కార్యకర్తలెంత శ్రమిస్తున్నా మిగిలిపోతున్న – పూల సొగసులు, పచ్చని చెట్ల కనువిందులు చేయని మురుగు, పంట కాల్వ గట్లూ ఉన్నాయి! వీటన్నిటి పరిష్కారాలు శాశ్వతంగా ఈ 30-40-50 మంది స్వచ్చంద శ్రామికులదేనా? లోతుగా ఆలోచిస్తే-ఇదంతా ఎవరి త్యాగం? ఎవరి భోగం? ఎవరి దీక్ష/ ఎవరి ఉపేక్ష?
గత 3 రోజుల - సుమారు 150 పని గంటల పోరాటంతో ఇప్పుడు 1 వ వార్డు ముఖ్య వీధులు, మురుగు కాలువ ఎంత పరిశుభ్ర - సుందర - మనోజ్ఞంగా ఉన్నాయో- మొన్నటి , నేటి వ్యత్యాసమేమిటో గ్రామస్తులు, ముఖ్యంగా 1 వ వార్డు నివాసులు గ్రహించాలని మనవి!
ఈ వీధిలో మరొక 120 గజాల బాటను ఊడ్చాక, మార్జిన్ల గడ్డిని చెక్కాక, వ్యర్థాలను ట్రాక్టరులో నింపుకొని డంపింగ్ యార్డుకు చేర్చాక- కాఫీ సమయం కబుర్లు ముగిశాక- గోళ్ల విజయ కృష్ణ ముమ్మారు గ్రామ శుభ్ర - సుందర సంకల్పాన్ని నినదించాక - డాక్టరు గారు నేటి స్వచ్చ శ్రమదానం పట్ల ఆనందాశ్చర్యాలు ప్రకటించాక... 6.45 కు నేటి కార్యకర్తల గృహోన్ముఖ ప్రయాణం !
రేపటి మన కాలుష్యం మీద విసుగు చెందని పోరాటం కోసం కలిసి సాగవలసిన చోటు - జమ్మిలంక గ్రామ దేవత గుడి నుండే!
సమర్పిసున్నాం ప్రణామం – 101
ఉషోదయ శ్రమ వేడుక ఒక ఉత్తమ పరిణామం
డజన్ల కొద్ది శ్రమ దాతల తరలి రాక విశిష్టం
అది స్వార్థం కాక ఊరి కంకితమగు మనోజ్ఞం
స్వచ్చ కార్యకర్తకు నా సమర్పిత ప్రణామం!
- నల్లూరి రామారావు
స్వచ్ఛ సుందర చల్లపల్లి కార్యకర్త,
‘మనకోసం మనం’ ట్రస్టు బాధ్యుడు
08.04.2022
కార్యకర్తల శ్రమతో శుభ్రంగా ఉన్న రోడ్డు
