ఒక్కసారి మాత్రమే వాడే ప్లాస్టిక్ వస్తువులను బహిష్కరించలేమా?

          మరొకమారు ATM కేంద్రంగా – బందరు రహదారిలో - @2411^*

          ఆదివారం – (17-4-22) మాత్రం గ్రామ ప్రముఖ వీధి శుభ్రత చేస్తేనే మంచిదనే నిన్నటి కార్యకర్తల నిర్ణయానుసారం - వేకువ 4.17 కే - వేంకటేశ్వరుని గుడి ఎదురుగా – కాలభైరవ మిత్రునితో సహా - 15 మంది స్వచ్చ యజ్ఞం మొదలెట్టారు! మిగిలిన 14 మంది సైతం వీధి కాలుష్యాల మీద తిరగబడి – సంత వీధి మొదలు మూడు రోడ్ల కూడలి దాక స్వచ్చోద్యమ విహారం చేశారు! ఈ తిరుగుబాటు 6.15 దాక కొనసాగింది! సంగీత – సాహిత్య – సరస వినోదాల ముగింపుకు మరో 15 - 20 నిముషాల సమయం!

          ఈ 200 గజాల నిడివి గల సువిశాల ప్రధాన వీధిలోనే గుడులు, అంగడులు, అడుగడుగునా తోపుడు బళ్ల ఆక్రమణలు, 5.30 కే మొదలయ్యే పూల - పళ్ల - చిరుతిళ్ల వ్యాపారాలు వాటన్నిటి నుండి పుట్టుకొచ్చే అనివార్య కశ్మలాలు - మరి స్వచ్చ కార్యకర్తలేమో – ఏ రెండొందల మందో కాదు - అల్ప సంఖ్యాకులు!

          ఐనా - ఎప్పటిలాగే ఈ క్రొత్తరకం పోరులో స్వచ్ఛ సైనికులే విజేతలు! చీపుళ్లతో దుమ్ము - ఇసుక ఊడ్చే వాళ్ళు ఊడ్చి, కొబ్బరి డిప్పల్నీ, ఎంగిలాకుల్నీ ప్రోగులు చేసేవాళ్లు చేసి, వ్యర్ధాల గుట్టల్ని ట్రాక్టరులోకి మోసేవాళ్లు మోసి, ఒకరిద్దరు మహిళలైతే నిలిపి ఉన్న కార్ల క్రింది రోతల్ని ఒంగి ఊడ్చి..... నిజంగా ఈ శ్రమదానం - అదీ వేసవి ఉక్కతో, బట్టలు చెమటతో తడిసి - దుమ్మంటుకొని, ఐనా ఎవరూ తమ ప్రయత్నం మానని....ఈ శ్రమ జీవన సన్నివేశం నా వరకు నాకు మాత్రం నయనానందకరం!

          అసలు సిసలు కష్టమంతా ATM కేంద్రం దగ్గరిదే! ఆ రంగు రంగుల పేవర్ రాళ్ల ఆవరణను ఒకటికి రెండు మార్లు ఊడ్చి, ఎందుకో పగిలిన కుండీల్ని సరిజేసిన సంగతి అలా ఉంచితే - ఎప్పుడు వీళ్ల శుభ్ర - సుందరీకరణ పూర్తవుతుందా అని కనిపెట్టి కాసుక్కూర్చున్నారే గాని - అక్కడి చిరు వ్యాపారులు ఏ ఒక్కరూ ఈ కార్యకర్తలకు సహకరించలేదు!

          ఈ ఆదివారం నాటి వీధి కాలుష్యాల వేట కేవలం బందరు రోడ్డుకే పరిమితం కాలేదు! కొందరు కార్యకర్తలు పనిలో పనిగా దక్షిణంగా ఉన్న పోలీసు కార్యాలయ వీధిలో కొంత వరకు వేటాడారు; మరికొందరు నిన్నటి ఉప్పలవారి – సూరి డాక్టరు వీధిలో ఇసుక వ్యర్థాల సంగతి చక్కబెట్టి వచ్చారు!

          6.45 కు ATM సెంటర్లో జరిగిన నేటి శ్రమదాన సమీక్షకు ముందు తాతినేని (మొక్కల) రమణ ఎలుగెత్తిన ఊరి స్వచ్ఛ – శుభ్ర – సౌందర్య సాధనా ప్రతిజ్ఞల్ని అందరూ పునరుశ్చరించారు; ‘మనకోసం మనం’ ట్రస్టు మార్చి నెల మిగులు బడ్జెట్టును తెలుసుకొని సంతోషించారు; తమ స్వచ్చ సుందరోద్యమాన్ని కీర్తించే పాటను నందేటి శ్రీనివాసు శ్రావ్యంగా పాడితే ఆలకించారు; 6.50 కి ఇంటి ముఖం పట్టారు!

          బుధవారం (19-4-22) నాటి వేకువ మన సుందరీకరణ కర్తవ్యం పాత కస్తూర్బాయి ప్రభుత్వాసుపత్రి దగ్గరే కలిసి నిర్వహిద్దాం!

          చారిత్రక గాధలు

గతాను గతికం గానే కాలుష్యపు వీధులు;

తిష్ఠ వేసుకొని కదలని మురుగుకాల్వ గుంటలు;

ముక్కు పుటాలదర గొట్టు పూతి గంథ కంపులు -

కార్యకర్త శ్రమ ధాటికి గత చరిత్ర గాథలు!

- నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

   17.04.2022.