పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?
స్వచ్చోద్యమ చల్లపల్లి శ్రమ వేడుక వరుస సంఖ్య 2636*
30.12.2022 – శుక్రవారం నాటికి పని దినాల సంఖ్య అది! (గంటల్లో కొలిస్తే ఎన్ని లక్షలౌతుందో మరి!) తొమ్మిదేళ్ల కాలంలో – అడుగడుగునా నిలువెత్తు స్వార్థం వికటాట్టహాసం చేస్తున్న సమయంలో – తమ సొంతానికి కాక-ఊరు ఉమ్మడి సౌఖ్యం కోసం – వేకువ 4.00 నుండి 2 గంటల పాటు పాతిక – ముప్ఫై – నలభై మంది ఈ భూగోళం మీద ఒకానొక పల్లెలో కొనసాగిస్తున్న శ్రమ సంస్కృతి ఎంత అపురూపమైనదో ఆలోచిస్తుంటే నిబిడాశ్చర్యం కలగదా?
హిమపాతం తల మీద టోపీల్నీ, బట్టల్నీ తడిపేస్తుంటే – మురుగు కాల్వల అంచున ధూళి దూసర వీధుల్లో – దూషణ భూషణ తిరస్కారాలను లెక్క చేయక – ఎంచుకొన్న లక్ష్యం కోసం ఒక 28 మంది సమూహం యొక్క శ్రమ జీవన సౌందర్యాన్ని ఎవరు వర్ణించగలరు? నిత్యం సదరు శ్రమ వైభవాన్ని చూస్తూ- చేస్తూ అనుభూతి చెందే- వ్రాసే నాబోటి వాళ్లూ, ఎంతెంత దూరంలో ఉన్నా శ్రద్ధగా చదువుతూ ఈ సార్థక శ్రమదానంతో మమేకమౌతున్న కొందరు ఆలోచనాపరులు – హార్దిక సహకారులూ ఈ స్వచ్చోద్యమాన్ని ఆశీర్వదిస్తూనే ఉంటారు!
ఈ 2636* వ నాటి ఒక ముఖ్య విశేషం – ప్రాతూరి శంకర శాస్త్రి గారి శతదినానంతర పునరాగమనం! ఇలాంటి జన్మతః సామాజిక స్వచ్చ కార్యకర్తలు ప్రపంచ వ్యాప్తంగా ఎక్కడున్నా అది భౌతికంగానే తప్ప - వాళ్ళ అంతరంగాలు మాత్రం చల్లపల్లి స్వచ్చ- సుందరోద్యమం తోనే! ఇది వినా – ఆత్మ సంతృప్తి దాయకం వాళ్ళకు మరొకటుండదు మరి!
“జై స్వచ్చ చల్లపల్లి సైన్యం” వాట్సప్ మాధ్యమ చిత్రాలుండగా, వ్యాఖ్యానాలుండగా- మళ్లీ నేను ఒక్కొక్కరి పనిని విశ్లేషించి, వివరించనేల? మనసున్న వారికి ఆ చిత్రాలే- అందులో కార్యకర్తల పని భంగిమలే- ఎన్ని విశేషాలనైనా చూపుతాయి- అందుకొనే వాళ్ళకు స్ఫూర్తినీ ఇస్తాయి!
కనుక ఆ చిత్రాల + నా ప్రత్యక్ష సాక్ష్యం ప్రకారంగా:
1) ఇంధన శాల – విద్యుదుప కేంద్రాల – NTR పార్కుల ప్రదేశమే ఈ వేకువ కూడ స్వచ్చ కార్యకర్తల శ్రమ స్థలంగా నిలిచింది. బెజవాడ రోడ్డు కేంతక్కువని? ఇటు ప్రయాణికులూ, స్థానికులూ, అటు టీ కొట్ల – మత్స్య విక్రయ దారుల – కొనుగోలు దారుల నిర్లక్ష్యం కలిస్తే ఎన్నెన్ని రకాల నిరుపయోగ - ప్రమాదకర కాలుష్యాలు ప్రోగుబడవు? 20 కి పైగా కత్తుల – దంతెల – చీపుళ్ల వాళ్ళకు చేతినిండా పనే పని!
2) పార్కు బైటి ప్రధాన ప్రవేశం దగ్గరి చెట్ల సుందరీకర్తలు - వాళ్ల నిచ్చెనతో, కట్టర్లతో గంటన్నర కు పైగా శ్రమే శ్రమ!
3) ఇక్కడికి దూరంగా - పురిటిగడ్డ దిశగా - ఖాళీలు ఎంచుకొని, 23 పాదులు త్రవ్వి, గద్ద గోరు పూల మొక్కల్ని నాటిన నలుగురైదుగురి కార్య దీక్ష మాత్రం తక్కువా?
కాఫీ వేళ ముచ్చట్లు ముగిసి, బంకు ఆవరణలో జరిగిన సమీక్షా సభలో శంకర శాస్త్రి గారి పునరాగమనాన్ని కార్యకర్తలు స్వాగతించి – స్వచ్చ సుందరోద్యమ నినాదాల్ని పునరాగంతకుడు పలికి తన అహ్మదాబాద్ 3 నెలల ఉనికినీ – అనుభవాల్నీ ప్రస్తావించి, నేటి శ్రమదానాన్ని DRK గారు విశ్లేషించి – 7.00 కు గాని అందరూ గృహోన్ముఖులు కాలేదు.
ఉదయ శంకర శాస్త్రీయ 5000/- విరాళాన్ని అందరూ సహర్షంగా – కృతజ్ఞతా పూర్వకంగా స్వాగతించారు.
రేపటి మన ఉషోదయాత్పూర్వ శ్రమ వేడుక సైతం ఇదే పెట్రోలు బంకు నుండే మొదలు పెడదాం!
నా ప్రణామం -184
కృతజ్ఞతకే స్థానముంటే – నిజాయతీనే గౌరవిస్తే-
స్వార్థ రహిత శ్రమకు ఇంకా స్థానముందని నిరూపిస్తే-
ఈ సుదీర్ఘోద్యమ స్ఫూర్తితొ ఎవ్వరైనా ముందుకొస్తే ...
అట్టి వారికి స్వగంతాంజలి! అమేయంబగు తొలి ప్రణామం !
- ఒక తలపండిన స్వచ్ఛ కార్యకర్త,
30.12.2022.