పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?

క్రొత్త ఏడాదిలో స్వచ్ఛ – సుందరోద్యమ (శ్రమ) వేడుక - @2638^*

            వారం, నెల, సంవత్సరం (ఆది, జనవరి, 2023) - అన్నీ కాలం కొలతల్లో మొదటివే! చల్లపల్లి శ్రమదాన ఉత్సాహం కూడా అందుకు తగ్గట్లే క్రొత్త – ప్రాత కార్యకర్తలతో కళకళలాడింది ! నేటి పారిశుద్ధ్య రంగస్థలం బందరు జాతీయ రహదారిలోని భగత్సింగ్ వైద్యశాల, అమరావతి రాజప్రాసాదము, కుడి ఎడమలుగా సజ్జా వారి, మునసబు వీధులు!

            నేటి 43 మంది కార్యకర్తలు 3 విధాలు - 4.19 కీ, 5.00 లోపూ చేరుకొన్న వారు సుమారు 30 మందైతే -  మిగిలినవారు అతిధి పాత్రధారులు, అల్పాహార దాతలు వగైరాలు! వీరుకాక - ఊరి దైనందిన పారిశుద్ధ్య శ్రమ/ సమయదాతలు, పోషకులు, వీరాభిమానులు ఏ 200 మందో ఉంటారు! దేశ - విదేశాల్లో ఈ చల్లపల్లి మెరుగుదలను పట్టించుకొనేవారూ వందల సంఖ్యలోనే!

            అదీ ఈ ఊరి అదృష్టం! ఈ ఊరి స్వఛ్ఛ - సుందరోద్యమ బలం, బలగం అంతటిది! ఈ చెట్టు వేళ్లు అంతలోతైనవీ, గట్టివీ! 9 ఏళ్లైనా ఈ నిస్వార్ధ శ్రమదాన వృక్షం ఆకులు వసివాడ లేదంటే – చిగిర్చి, పుప్పిస్తున్నదంటే -దాని మూలాలు అంత పటిష్టంగా ఉన్నవన్నమాట! ఇప్పటికీ ఈ శ్రమదానం విలువ తెలియని గ్రామస్తులు గాని, అతిథి అభ్యాగతులు గాని – ఏ రోజు వేకువ వచ్చి చూసినా ఇంత సజావుగా, సజీవంగా, సృజనశీలంగా అది కొనసాగుతూనే ఉంటుంది!

ఆంగ్ల సంవత్సరాదిన కార్యకర్తల శ్రమ వైఖరులు, వీధుల మెరుగుదలలూ ఎలా ఉన్నవంటే -

A) వంద గజాల జాతీయ రహదారీ, దాని ఉత్తర దక్షిణ భాగాల పిచ్చిమొక్కలకు మూడి పనికిరాని గడ్డికీ, తీగలకూ ఆయువు తీరి, ట్రాన్స్ఫార్మర్ల లోతట్టు జాగాలు కూడ శుభ్రపడి అసలే కేంద్ర ప్రభుత్వం చలవతో దర్శనీయంగా ఉన్న వీధి మరింత సుందరతరంగా మారడం;

B) సజ్జా వారి వీధిలో కొంత భాగం - ఏడెనిమిది మంది శ్రమతో ఇంకాస్త కళాకాంతులు సంతరించుకోవడం, వీధి మొదట ఎవరో పుణ్యం కట్టుకొన్న కసవు గుట్టకు మోక్ష ప్రాప్తీ;

C) మునసబు గారి వీధిలో 50 గజాల దాక - నాల్గు చెట్ల సుందరీకరణ, డ్రైను పూడిక తొలగింపు;

D) పై చర్యలతో పుట్టుకొచ్చిన వ్యర్ధాల గుట్టల్ని ట్రాక్టర్లోకి ఎక్కించి, చెత్త కేంద్రానికి చేర్చుట;

            స్వచ్ఛ కార్యకర్తల నవోత్సాహంతో గంటన్నరకు పైగా సమయం ఇట్టే కర్పూర కదళికలా కరిగిపోయి, 6.25 వేళ – గంధం వేంకేటేశ్వరావు పక్షాన విశ్రాంతోపాధ్యాయిని రాయపాటి రమ గారు గ్రామ స్వచ్ఛ సౌందర్య సాధక నినాదాలను విస్పష్టంగా ప్రకటించి –

స్వచ్చోద్యమ ఆస్థాన వాగ్గేయకారుడు అర్థవంతమైన గీతాలాపన చేసి –

మండవ బాలవర్ది మహాశయుడు (- మామూలోడు కాదు - నాగాయలంకలో సంచలన స్వచ్ఛ సుందరోద్యమ ప్రారంభ - ప్రవర్తకుడు!) చల్లపల్లి కార్యకర్తల్ని ఉత్తేజపరచి –

రాయపాటి రాధాకృష్ణ – రమా దంపతులు 5000/- స్వచ్చోద్యమ విరాళమూ,

పల్నాటి అన్నపూర్ణ – తన సోదరుడు నరహరిసెట్టి ఆర్జున సారధి (- కైకలూరు నివాసి) తరపున 500/- చదివింపూ,

కస్తూరి వర ప్రసాదుని 1200/- కైంకర్యమూ,

తనిది కాని - ఎవరో తన మిత్రుని పనుపున వేముల – షణ్ముఖ శ్రీనివాసుని 500/- వితరణా,

            ఇక పై విశేషాలు కాక - అనూహ్యంగా - అల్పాహారం పేరుతో గంధం వేంకటేశ్వరుడు 3 రకాల తినుబండారాల్తో తలా ½ కిలో బరువు పెంచిన వైనమూ....

            గోళ్ల వేంకటరత్నం, ప్రాతూరి శాస్త్రి/గోపాలకృష్ణుల తీపి వస్తువుల పంపిణీ....

            ఇలా నూతన - 2023 సంవత్సరాదిలో చల్లపల్లి శ్రమదానోద్యమంలో ఎన్నో విశేషాలు!

            బుధవారం నాటి - వేకువ వీధి సౌందర్య కృషి కూడ బందరు రహదారిలోని Twills షోరూం దగ్గర నుండే మొదలగును!

                        నా ప్రణామం -186

సచ్ఛరిత్రుడు – కర్మవీరుడు – స్వార్ధరహితుడు - గ్రామ విహితుడు. –

నిబద్ధతతో - జాగృతులతో - హృదయ పరివర్తనకు ఆద్యుడు –

స్వచ్ఛ సుందర - కలల గ్రామం సొంతదారుడు – మహాశక్తుడు –

ఇట్టి శూరుడు - ఇంత ధీరుడు ఎక్కడున్నా మా ప్రణామం!

- ఒక తలపండిన స్వచ్ఛ కార్యకర్త,

   01.01.2023.