పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?

7 x 1 ½  = 10 పని గంటల కాయకష్టం! - @2640^*

            మంగళవారం – 3.1.23 వ నాటి వేకువ 4.30 నుండే వారి - ముఖ్యంగా ఐదుగురి కఠినతర శారీరక శ్రమ మొదలయింది! అది చల్లపల్లిలో కాక – పొరుగూరు - రామానగరం - బందరు రహదారి ఉత్తరాన - స్రవంతి హోమ్ ఫుడ్స్ వీధిలో జరిగింది.

            అక్కడి ప్రధాన వీధీ, ఉప వీధి మొదట్లోనూ ఎవరు కాస్త నిదానించి శ్రద్ధగా చూసినా, ప్లాస్టిక్ తదితర వ్యర్థాలు భరింపరానివిగానే ఉన్నాయి. ఇక - స్వచ్ఛ కార్యకర్తలా అస్తవ్యస్త – అనౌచిత్య - కాలుష్య భారాన్నెలా సహిస్తారు? వాళ్ల చూపు పడినప్పుడిక ఆ వీధి భాగం మెరుగు పడక ఏమౌతుంది?

            పాదచారులుగా – పరామర్శకులుగా ఇద్దరం 5.10 కి అక్కడికి చెరుకొనేప్పటికే రెస్క్యూ టీమ్ చీపుళ్లతో, కత్తులతో, కొండొకచో వట్టి చేతులతో అక్కడి కసవు గుట్టల మీద – పిచ్చి - ముళ్ళ మొక్కల మీద – ఏక మాత్ర వాడకానికి పరిమితమయ్యే ప్లాస్టిక్ వస్తువుల మీద – ఎంగిలాకుల మీద తడాఖా ప్రదర్శిస్తున్నది.

            ‘సీనియర్ సిటిజన్’ అనదగ్గ ఒక రైతు కార్యకర్త గొంతు నొప్పి - దగ్గు – ఆయాసంతోనే పైన చెప్పిన పనులు చేస్తున్నాడు!

            ‘ఆల్ రౌండర్’ అనే ముద్ర పడిన ఇంకొకాయన ట్రక్కు పైకెక్కి, కత్తి - గొడ్డలి ఉపయోగించి, అక్కడి బాత్ రూమ్ గోడను బద్దలు కొడుతున్న రావి చెట్టును కూకటి వేళ్లతో పెకలించి ఆ గోడ రక్షకుడైపోయాడు!

            అసలా ఐదుగురి పని సమన్యయం, అంకితభావం, సమయ స్పృహ, ప్రణాళిక.. నేను ఈ కాస్త జాగాలో ఎలా వ్రాయగలను? వాళ్ళదీఊరు కాదు, వీధీ కాదు, జీతభత్యాలూ లేవు, కనీసం ఆ వీధి మనుషుల సహకారమూ లేదు! – ఎందుకిలా చలిలో – మంచులో - దుమ్ములో ఈ వేకువ వేళ శ్రమిస్తుంటారనేదే గ్రామస్తులు ఆలోచించదగిన సంగతి!

            తమ విధి పూర్తయ్యాక - 6.45 కు యధాప్రకారం 2640^* రోజుల దీక్షనూ, తదుద్దేశ్యాన్నీ ప్రకటిస్తూ నినాదాలు కస్తూరి శ్రీనివాసరావు ద్వారా పలికి నేటికి పని ముగించారు!

            ఇద్దరు సీనియర్ కార్యకర్తలం రామానగరం వీధుల్లో పరిశీలనగా తిరుగుతున్నప్పుడు మూడు వీధులూ – అందులో ముఖ్యంగా చిరుమామిళ్ళ వారి వీధి అందులో పరిశుభ్రంగా, పొందికగా నిర్వహింపబడుతున్న ‘మానస హాస్పిటల్’ నూ గమనించాము.    

            రేపటి వేకువ మన విసృత శ్రమదానం కోసం ఎదురుచూస్తున్న చోటు బందరు రహదారిలోని ‘ట్విల్స్’ వస్త్ర దుకాణ ప్రాంతమే!

            నా ప్రణామం -188

గ్రామ బాధ్యతలన్ని తలపై కట్టగట్టుక మోయడానికి

ప్రజామోదం పొందడానికి - సజావుగ కథ సాగడానికి

ఎన్ని యత్నా - లెన్ని యుక్తులు - ఎన్ని త్యాగాలెన్ని బాధలో

అనుభవించిన - రాటుదేలిన - స్వచ్ఛ సైన్యానికి ప్రణామం!

- ఒక తలపండిన స్వచ్ఛ కార్యకర్త,

   03.01.2023.