పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?

విజయ్ నగర్ లో శ్రమదాతల వీర విహారం! - @ 2645^*

            ఇది సోమవారం (09.01.2023)-అది విజయ్ నగర్ తొలివీధి – వాళ్లు గ్రామ వీధుల శ్రమదానం చేసి - చేసి రాటుదేలిన ఐదారుగురు స్వచ్చ కార్యకర్తలు! వాళ్లకు సంపూర్ణ మద్దతు దారులు ఒక శాస్త్రి, ఒక పశు వైద్యుడు – మళ్లీ చూస్తే (ఇద్దరి సగటు వయస్సు 79 ఏళ్లు!) సమయమేమో రాకాసి చలి వేకువ - 4.30!

            ఇక - ‘పుణ్యం పురుషార్థం’- అన్నట్లు ఒక సీనియర్ సామాజిక వైద్యుడు, మరొక విశ్రాంత కళాశాలాధ్యక్షుడు కలిసి చేస్తున్న గ్రామ వీధుల వాహ్యాళి సందర్భంగా 5.00 తరువాత ఆరేడుగురి సామాజిక కర్తవ్య తపస్సుకు వారిద్దరి ప్రత్యక్ష పరిశీలన!

వాకబు చేస్తే తెలిసిన సంగతేమంటే :

- అక్కడొక పెద్ద రాతి ముక్కల – ఇసుక- సిమెంటు రద్దుల గుట్ట. అది మాలెంపాటి గోపాలకృష్ణుల వారిది! దాని మీద సర్వ హక్కుల్నీ వదలుకొని, అతడు గ్రామ సౌకర్య వినియోగార్థం స్వచ్చ కార్యకర్తలకు అప్పగించిన వైనం.

- మరి- రెస్క్యూ టీం వాళ్లైనా దాన్నేమీ సొంతానికి వాడుకొనేందుక్కాదు – ఊరి మెరుగుదల చర్యల్లో భాగంగా ఆ రద్దు గుట్టను గంటకు పైగా పారల్తో-డిప్పల్తో ట్రక్కులోకి ఎక్కించి, 2 ½ కిలో మీటర్ల దూరాన - నాగాయలంక బాట తూర్పున గల కమ్యూనిష్టు అమరవీరుల స్తూపం ప్రవేశ ద్వారం దగ్గరి పల్లం పూడ్చడానికట!

            వండర్ ఫుల్! అమరవీరులది రేపటి తరం కోసం ప్రాణత్యాగం!

            ఈ స్వచ్చ వీరులది ఇంకాస్త మెరుగైన గ్రామ సమాజం కోసం శ్రమత్యాగం! ఉభయులూ తమ సమకాలానికీ, సమాజానికీ పడిన అప్పును చెల్లించేసినట్లే!

            6.30 తరువాత వేల రోజుల్నుండీ చేస్తున్నట్లే – స్వచ్చ కార్యకర్తలు మాలెంపాటి వైద్యునితో కలిసి మరింత మంచి సమాజం కోసం తాము చేస్తున్న శ్రమదాన ఉద్యమాశయాన్ని ముమ్మార్లు నినదించారు! 

                    నా ప్రణామం -192

అయోమయ మని ఏల అనవలె? అసాధ్యం అని ఎందుకనవలె?

జన్మనిచ్చిన ఊరి మేలుకు గంట సమయం ఇవ్వలేమా?

అందరొకటై ఉన్న ఊరును నందనముగా మార్చలేమా?

కార్యకర్తల నిత్య కథ ఇది – కనుక వారికి నా ప్రణామం!

- ఒక తలపండిన స్వచ్ఛ కార్యకర్త,

   09.01.2023.