పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?
పెద్ద పండుగ (సంఖ్య - 9) నాటి శ్రమదానం - @2651*
ఔను! చల్లపల్లి స్వచ్ఛ - సుందర శ్రమదానానికిది 9 వ సంక్రాంతి! మంచు - చలీ దేన్నీ లెక్కచేయక తలా – 2/3 కిలోమీటర్లు ప్రయాణించి, గ్రామ ముఖ్య వీధి కూడలి పాచి పనికి పూనుకొన్న కార్యకర్తలు 36 మంది! సమయం 4.20 వేకువ!
“అసెంబ్లీలు, పార్లమెంట్లు చెత్త కబుర్ల రాయుళ్ల సదుపాయాలైనప్పుడు - సంతలూ, రచ్చబండ లూ, అక్కడి పోసుకోలు కబుర్లే ప్రజాస్వామిక చర్చలౌతాయి!....”
అని ఎంజిలో - కాట్రోచ్చి అనే ఫ్రెంచి రచయితలు (- అనువాదం శ్రీ శ్రీ) చెప్పినట్లు – ఒకప్పుడు పంచాయతీ పారిశుద్ధ్య కార్మిక సోదరులు చేసిన పాచి పనుల్ని ఇప్పుడిక్కడ వృత్తి నిబద్ధులైన వైద్యులు, ఉద్యోగులు, రైతులు, గృహిణులు నిర్వహిస్తున్నారు! ఇది కాలమహిమ - కాల దుర్విపరిణామం!
ఊరి వీధుల్నిలా చెడగొట్టే జనంలో కాస్త మార్పు వచ్చినపుడు - ఎవరి ఇళ్ల పరిసరాలు వారు బాగా నిర్వహించుకోవాలనే స్పృహ కలిగినప్పుడు – పై నుంచి క్రింది స్థాయి దాక సుపరిపాలన జరిగినప్పుడు ఈ దుస్థితి రాకపోను!
మొన్నటి కార్యకర్తల అంచనా - అవనిగడ్డ రహదారిలో ఈ ఆదివారం వేకువ బందరు బాట నుండి RTC బస్ ప్రాంగణం దాటి శ్రమించి, బాగుచేయగలమనే! ఐతే వాళ్ల ఆలోచనకు అడ్డుకట్ట వేసింది – గణేష్ ప్రెస్ వీధి, సచివాలయం చుట్టూ ఉన్న బండెడు వ్యర్ధాలు. అసలా జాగాలో లేనివేమున్నవి కనుక? సారా సీసాలు, ఎంగిలాకులు, ఎందుకొచ్చి పడ్డాయో తెలియని ఇంజెక్షన్ సూదులు, చిత్తు పేపర్లు, ఘాటెక్కిన ఉచ్చ కంపులు - ఇలాటి చోటనే గంటన్నర పాటు 14 మంది శుభ్ర సుందరీకరణలు!
బందరు దారి, బస్టాండు బాటల బంకుల ఎదుట చెల్లా చెదరుగా త్రాగి పడేసిన కొబ్బరి బొండాలను ట్రక్కులోకి చేర్చుకొంటూ - పూల కొట్ల, బడ్డీ కొట్ల ఎదుటి భోగి నాటి రకరకాల కశ్మలాలను సేకరించుకొంటూ – 200 గజాల రోడ్డునూ, మార్జిన్లనూ ఊడ్చుకొంటూ - అటు చిన్న కార్ల స్టాండు నుండి పొట్టి శ్రీరాములు వీధి దాక తాము అడుగుపెట్టిన ప్రతి చోటును శుభ్రంగా మార్చిన స్వచ్చ కార్యకర్తలు ధన్యులు!
ఈ 15.1.23 – ఆదివారం నాడు - 30 మంది శ్రద్ధగా బాగుపరచిన (4.20 నుండి 6.15) తరువాత నేను 200 గజాల వీధిని ఒకమారు పరిశీలనగా తిరిగి చూస్తే - కార్యకర్తల సామాజిక శ్రద్ధ పట్ల సంతోషం - గర్వం పుట్టుకొచ్చాయి! 60 పని గంటలు శ్రమించిన కర్మవీరుల కెంత తృప్తిగా ఉంటుందో మరి!
6.35 పిదప వస్త్ర దుకాణం ఎదుట సమీక్షా సభలో:
- రామకృష్ణ వైద్యుని చిన్న సైజు - అనుభవ పూర్వక వ్యక్తిగత వికాస ప్రసంగమూ, దానికి ముందు సజ్జా ప్రసాదుని గ్రామ స్వఛ్ఛ - సుందరాభిలాషాపూర్వక నినాదాలూ కాక - పల్నాటి భాస్కర - అన్నపూర్ణల 1000/- విరాళము (సందర్భం - తమ కుమారుడు – రాం చరణ్ జన్మదినం!)
నిన్న భోగి పండుగ నాటి గోళ్ళ వేంకట రత్నం గారి నాలుగు అందమైన తల దీపాల (హెడ్ లైట్స్ ) వితరణ కూడ ప్రశంసనీయమూ, స్మరణీయమూ!
బుధవారం వేకువ ఇదే అవనిగడ్డ రహదారి శుభ్రత కోసం ప్రయత్నించదగింది పొట్టి శ్రీరాములు వీధి దగ్గరేనట!
నా ప్రణామం -197
కరడుగట్టిన కశ్మలాలను- పడగ విప్పిన కల్మషాలను
మురుగు కంపును- ముళ్లకంపను - వీధి ప్రక్కల ఆక్రమణలనూ
సహృదయుల సహకారములతో సాగనంపిన స్వచ్ఛ సుందర
సాహసికులకె సమర్పిస్తా స్వస్త బంధుర సత్ప్రణామం!
- ఒక తలపండిన స్వచ్ఛ కార్యకర్త,
15.01.2023.