పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?
బైపాస్ వీధిలో 4.30 నుండి జరిగిన శ్రమదానం - @ 2653*
మంగళవారం (17.01.2023) నాటి స్వచ్చ సుందర కార్యకర్తల శ్రమ విన్యాసాలు సాగర్ టాకీస్ ఉప రహదారిలో ½ కిలో మీటరు పొడవునా విస్తరించాయి. ఐతే – వాళ్ళు నలుగురైదుగురు + ముగ్గురే ననుకోండి! ఆ చలీ-మంచూ వాతావరణం ఎంతో నిబద్ధత – మొండి పట్టుదల ఉన్న వాళ్ళకు తప్ప అందరికీ సరిపడనిదేననుకోండి!
ఇన్ని వేల రోజుల – లక్షల పని గంటల – ఫలప్రదమైన గ్రామ సేవలు ఇక చల్లపల్లికీ – దాని అభ్యుదయ పరంపరకూ కట్టుబడిన స్వచ్చంద సేవకులకూ తప్ప మన సమకాలంలో ఎక్కడ చూడగలరు? ఈ అవకాశం, అదృష్టం ఐతే ఇద్దరిదీ కూడ!
ఈ వేకువ గ్రామ రక్షక దళం తమ సరంజామాతో తొలుత ఆగింది సినిమా హాలు వద్దనే! అక్కడున్నవి-కరెంటు విభాగ ఉద్యోగులు కాబోలు కొట్టి పడేసి సగం ఎండిన కొమ్మలూ,ఆకులూ ! వాటిని సర్దుకొని, అదే వీధిలో మరొకచోట కూడ అలాంటి పనే పూర్తి చేసుకొని, 5.20 కి కమ్యూనిష్టు వీధి ఉత్తరం కొసకు వెళ్లారు.
అది నాకు సంబంధించిన ఖాళీ స్తలమే – అక్కడ పడి ఉన్న వేరెవరి ఇంటి వ్యర్థాలో- పూల తీగలు, కత్తిరించిన కొమ్మలు, చకచకా ఇద్దరు ట్రక్కులోనికెక్కిస్తుండగా – ఇద్దరు కార్యకర్తలు ఆవరణలో పెరిగిన పిచ్చి మొక్కల్ని తొలగించారు!
ఎలాగైతేనేం – బైపాస్ వీధిలోనూ, సామ్యవాద వీధిలోనూ గంటన్నరకు పైగా తమ విలువైన కాలాన్నీ, శ్రమనూ వెచ్చించి, కొంతమేరకైనా సుందరీకరణం సాధించారుగదా!
ఒకప్పటి కస్తూర్బా ప్రభుత్వాసుపత్రి ఆవరణను ఉదయం నడక సందర్భంగా చూశాం! ఐదారేడు నెలలుగా కార్యకర్తల శ్రమ రుచి చూడక- అదెంత అధ్వాన్నంగా ఉన్నదో! ముఖ్యంగా– ప్రవేశ ద్వారం!
అక్కడి కశ్మలాల కారకులైన సమీప గృహస్తులు కలిసొస్తే – తదుపరి సోమ- మంగళ వారాలైనా కార్యకర్తల్తో సహకరిస్తే – ఆ ప్రదేశాన్ని అందంగా మలచడం ఎంతసేపు?
6.35 సమయంలో తమ శ్రమ వేడుక ముగింపుగా మాలెంపాటి అంజయ్య నినదించిన ఊరి స్వచ్చ- సుందరోద్యమ సంకల్పం మారు మ్రోగింది.
మన రేపటి వేకువ ముఖ్య వీధి శుభ్రత కోసం కలిసి పురోగమించవలసిన చోటు – అవనిగడ్డ బాటలోని వేంకటేశ్వర టెక్స్ టైల్స్ షాపు దగ్గరే!
నా ప్రణామం -199
ఎవరికైనా గంట లిరువది నాలుగే ప్రతిరోజు – అందలి
ఒక్క గంట శ్రమను సైతం ఊరి మేలు కొసంగ లేమా?
చల్లపల్లి స్వచ్చ సుందర శ్రామికుల సంకల్ప మదెగద!
అద్భుతంగద! అమోఘంగద! అందుకే గద! నా ప్రణామం!
- ఒక తలపండిన స్వచ్ఛ కార్యకర్త,
17.01.2023.
