పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?
గురువారం (19-1-23) నాటి బహుముఖీన శ్రమదానం - @2655*
నేటి వేకువ - 4.16 కే కోటకు ఉత్తరాభిముఖంగా జరిగిన స్వచ్ఛ – సుందరీకరణం రెండు మూడు చోట్లకు విస్తరించింది! 26+2 మంది హాజరైన 2 గంటల ప్రయత్నంతో
1) 3 రోడ్ల కూడలిలోని కాలుష్యదరిద్రం,
2) బెజవాడ బాటలో కోట ఉత్తర ద్వారం వరకూ,
3) కొసరుగా అగ్రహారం తొలి వీధిలో కొంత భాగం కశ్మలాలను కోల్పోయి, స్పచ్ఛ చల్లపల్లి వీధులనిపించు కొంటున్నాయి!
ఐతే - కార్యకర్తలెప్పుడూ భారమనో, తప్పని తద్దినమనో అనుకోరు గాని – ఇప్పుడక్కడ కనిపిస్తున్న వీధి అందం వెనుక - 50 పని గంటల శ్రమ సంగతేమిటి? కనీసం నెలకోమారు కార్యకర్తలు పాటుబడుతున్నా - అలవాటు చొప్పున ప్రతి పనికిరాని దాన్నీ మురుగు కాల్వలోకో, రోడ్డు మీదికో విసిరే వాళ్ల నిర్లక్ష్యం సంగతో? ఊరి జనాభాలో సగం మంది స్వచ్చ – శుభ్రతల వైపుకు అడుగులేయాలా? లేక సామాజిక - సామూహిక ప్రయోజనం కోసం తాము తలపెట్టిన శ్రమదానాన్ని కార్యకర్తలు ఆపాలా?
సమష్టి ప్రయోజనార్థం సమష్టి కృషి జరగవలసిన చోట. కొద్దిమంది కార్యకర్తలా బాధ్యతల నెంతకాలం మోయాలని మనగామస్తుల కోరిక? తొమ్మిదేళ్లు గడచినా బదులు దొరకని ప్రశ్నలివి!
నిజమే - ఇంత చలిలో - ఇంత చీకటి వేకువలో - స్వచ్ఛంద శ్రమదానానికి రావాలని ఉబలాటం ఉన్నా - రాలేని నిస్సహాయత కొందరిది! వీధులూడ్చేందుకూ, బహిరంగ స్థలాల్లో మురికి పని చేసేందుకూ కోరిక ఉన్నా - వీడని బిడియమూ, సందిగ్ధతా మరి కొందరిది! ఎప్పటికైనా తొలగవలసిన అడ్డంకులే ఇవి!
150 గజాల బెజవాడ వీధిలోనే ఇంత ప్లాస్టిక్ వ్యర్థాలూ, చిన్న ట్రక్కు దుమ్మూ – ధూళీ కార్యకర్తలు ఊడ్చారంటే - డిప్పల్తో లోడు చేసి డంపింగ్ కేంద్రానికో కొన్ని రోడ్ల గుంటలు పూడ్చే పనికో తరలించారంటే - దుకాణదారుల అలసత్వం కూడ ఉన్నట్లే!
పోలీసు పహరా కేంద్రం దగ్గర ఎంత దుమ్ము, ఎన్ని వ్యర్ధాలూ ఊడ్చారో – భవన నిర్మాణ/పునర్వ్యవస్థీకరణాల దగ్గర ఎన్ని వ్యర్ధాల గుట్టలు పడి ఉన్నాయో – వాటి పరిష్కారాలేమిటో అందరూ ఆలోచించాలి!
‘లక్ష్మీ జనరల్ మర్చంట్స్’ తరపున యార్లగడ్డ హనుమంతరావు గారు పనిగట్టుకొని అస్పత్రికి వచ్చి ‘మనకోసం మనం’ ట్రస్టుకు స్వచ్ఛ - సుందరీకరణ ఖర్చుల నిమిత్తం – 10,000- విరాళం ప్రకటించడాన్నీ, పేరు చెప్పడానికి ససేమిరా ఇష్టపడని మరొక అజ్ఞాత దాత 10,000 /- విరాళాన్నీ స్వాగతించాలి!
ఒక పశువైద్య వృద్ధ కార్యకర్త – మాలెంపాటి వారు నాణ్యమైన చాక్లెట్లు పంచగా, షణ్ముఖ శ్రీనివాసుల వారు మరొక మారు రేగు పండ్ల పంపకం చేయించారు. వీధి సుందరీకరణ నిపుణుడు ఆకుల దుర్గా ప్రసాదు స్థిరంగా ముమ్మారు గ్రామ స్వచ్ఛ – సుందరోద్యమ నినాదాలు ప్రకటించగా,
సమీక్షా సభ జరిగిన ‘విజయా డైరీ’ దుకాణస్థుడు తన పరిసరాల స్వచ్చ - శుభ్రతలకు హామీ ఇవ్వగా, 6.40 కి నేటి కార్యక్రమం ముగింపు!
రేపటి వేకువ కర్తవ్య నిర్వహణ కోసం మనం మరొకమారు కలిసి సాగవలసినది బెజవాడ బాటలోని స్వగృహ హోటల్ దగ్గరే!
ఓ మహాత్మా! ఓ మహర్షీ!
దురదృష్ట - మదృష్టమేమిటి? ఏది కష్టం - ఏది నష్టం?
గ్రామమంటే మట్టి ఇసుకా? గ్రామమంటే జనం కాదా?
కార్యకర్తల తపస్సెందుకు - ఊరి స్వస్తత కోరి కాదా?
మనం మన కోసం శ్రమిస్తే – గ్రామ సౌఖ్యం మెరుగు పడదా?
- ఒక తలపండిన స్వచ్ఛ కార్యకర్త,
19.01.2023.