పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?
కాలుష్యం మీద కదనంలో2657*వ ఘట్టం.
శనివారం(21.01.2023) నాటి మహా యుద్ధం వేకువ చలి నడుమ 4.16 కే మొదలై 2 గంటలు కొనసాగింది! నేటి 27 మంది స్వచ్చ వీరుల్లో సింహ భాగం 20మంది అంతగా వాడుకలో లేని – బెజవాడ బాటలోని- కర్మల భవనం దగ్గరి చెరువు గట్టు 5 సెంట్లలోని కాలుష్య సంహరంలోనే గడిపారు! ఇద్దరేమో రహదారిని ఊడ్చే పనిలో, నలుగురు మాత్రం అగ్రహారం సిమెంటు కొట్టు వీధి సుందరీకరణలో !
కార్యకర్తలకు శ్మశానం తర్వాత గట్టి సవాలు విసిరిందీ, అగ్ని పరీక్ష పెట్టిందీ- శివాలయం – టీ కొట్టు దగ్గర ఖాళీ స్తలమే ! శుభ్రపరచక ముందున్న ఒక వాట్సాప్ చిత్రంలో ఆ కాలుష్య విశ్వరూపం చూశారా! 30 - 40 పని గంటల తర్వాత చిత్రం కూడ చూడండి! గ్రామస్తుల ఆరోగ్యం కోసం - ఆహ్లాదం కోసం స్వచ్చ కార్యకర్తల శ్రమ ఫలితమే రెండవ చిత్రం!
ఎందరు షాపుల వాళ్ళో – టీ కొట్టు వారో – రాత్రిళ్లు వేస్తున్న వ్యర్థాలవి! ఎంత మొండి వాళ్ళకో తప్ప – అక్కడ సిరంజీల –దుర్గంధాల – పేడల-పెంటల చోటులో కాలైనా మోపలేని దుర్భర ప్రదేశమది! ఐదు సెంట్ల జాగానుండే అంత పెద్ద ట్రక్కు నిండిపోయిన కశ్మలాలవి! చల్లపల్లి స్వచ్చ – సుందర కార్యకర్తల గ్రామ కర్తవ్య దీక్షకు తాజా సాక్ష్యమది!
శ్రీమంతు క్లబ్బు ఎదుట – నాలుగైదేళ్ళుగా స్వచ్చ కార్యకర్తల పూనికతో నిర్వహింపబడుతున్న ‘కస్తూరి మామ్మ’
ఉద్యానం అందాన్ని దెబ్బతీస్తున్న వ్యర్థాల గుట్టను కూడ మన సామాజిక మాధ్యమం లో మీరు చూడవచ్చు! దాన్ని తొలగించి, ఊడ్చి పునః సుందరీకరించిన నలుగురూ అభినందనీయులు! ఐతే – రేపటి మాపో, ఎల్లుండి రేపో అక్కడ మళ్ళీ వ్యర్థాలు ప్రోగుపడవని అభయమీయవలసింది పాల విక్రేతలూ- పండ్ల దుకాణాల వారే!
అగ్రహారం రెండో వీధిలో కొంతమేర పట్టి పట్టి శుభ్ర- సుందరీకరించింది కూడ సుందరీకరణ బృందమే!
కాఫీ సేవనం కాలంలో ఏ కార్యకర్తను పరిశీలించినా- కాస్తంత అలసట తప్ప వాళ్ల ముఖాల్లో కనిపించింది సంతృప్తే!
అందరి సంతృప్తినీ- ఊరి వీధుల పారిశుద్ధ్య, సౌందర్య నిబద్ధతనీ ముమ్మార్లు నినాద రూపంలో దబాయించినది “దేసు మాధురి”.
రేపటి గ్రామ వీధి బాధ్యత కోసం బెజవాడ బాటలోని HDFC బ్యాంకు వద్ద కలువ వలెనని నిర్ణయమైనది!
వినమ్రంగా - విభ్రమంగా
విహ్వలంగా – విశృంఖలంగా- వెర్రిమొర్రిగ ఊరి వీధులు
అచేతనముగ- అనిశ్చితముగ-అయోమయముగ జనం మనసులు
వినమ్రంగా- విభ్రమంగా-విస్తృతంగా స్వచ్చ సేవలు!
స్వచ్చ-సుందర సమన్వితముగ చల్లపల్లి ప్రముఖ వీధులు!
- ఒక తలపండిన స్వచ్ఛ కార్యకర్త,
21.01.2023.