పర్యావరణ ధ్వంసకమయ్యే - ఒక్కసారికే పనికి వచ్చే ప్లాస్టిక్కుల వాడకం దేనికి?
2659* వ నాటి గ్రామ భద్రతా చర్యలు.
సోమవారం (23-1-23) నాటి వేకువ 4.30 నుండే ఊరి సౌకర్య మెరుగుదల చర్యలు మొదలై - 6.30 దాక కొనసాగినవి. నేటి రెస్క్యూదళం ధ(క)ర్మక్షేత్రం 1 వ వార్డు ప్రవేశం - బందరు రహదారి ప్రక్కన!
ఆ కార్యకర్తలు ఐదారుగురు, వాళ్ల ఆయుధాలు పారలూ, పలుగూ, డిప్పలూ, ఇంకా తలా రెండు చేతులూ! వాళ్ల అసలుద్దేశం – ‘మనకోసం మనం’ ట్రస్టు తీర్చిదిద్దిన పేవర్ టైల్స్ క్రుంగిపోతే – ఆ గుంటను సరిజెయ్యడం! పాదచారులకూ, ద్విచక్ర వాహనదారులకూ మరింత సౌకర్యం కల్పించడం!
పంచాయతీ వారో, ఇతర దాతలో ఈ పని వృత్తి నిపుణులతో - అంటే తాపీ వారితో చేయిస్తే - ఏ 10 వేలో ఖర్చు అయ్యేది! మరి రెస్క్యూటీం వాళ్లవేమో - తేరగా దొరికిన ఉచిత సేవలు! సోమ – మంగళవారాలలో గానీ, ఇతర వేకువ కాలాల్లో గానీ స్వచ్ఛ - కార్యకర్తల ఇలాంటి వేలాది పనులకు ఖరీదు కట్టుకుంటూపోతే ఆ లెక్క ఎన్ని కోట్లలో ఉంటుందో!
రెస్క్యూ కష్ట జీవులకు మరో ముగ్గురు పెద్ద కార్యకర్తల పరామర్శా, మాట సహకారమూ కాక - 1వ వార్డు వారనుకొంటా - ఇద్దరి పరిశీలనా కుదిరాయి! (షరా! పరిశీలన మాత్రమే – ప్రవేశం కానే కాదు)
చూసే వాళ్లకీ, ఈ కృషి ఫలితాలనుభవించే వారికీ “ఇదేమంత కష్టంలే” అనిపిస్తుందేమో గాని – ఒక్కో రంగురాతిని పగలకుండ పైకి తీయడమెంత కష్టమో నేను దగ్గరగా చూశాను!
ఐనా - రాళ్లు పెకలించడం వరకే నేటికి పూర్తయింది! ఇసుక సర్ది – సమతలం చేసి - మళ్లీ వాటిని పరవడం రేపటికి మిగిలే ఉంది!
తమ పని ముగింపు వేళ బిగ్గరగా గొంతెత్తి తూములూరి లక్ష్మణరావు పలికిన స్వచ్ఛ - సౌందర్య సంపాదక నినాదాలతో కార్యకర్తల సోమవారం నాటి శ్రమదానం ముగిసింది!
చల్లపల్లికి తీపిగురుతులు
వినుతికెక్కే గ్రామ సేవలు – వీర విక్రమ త్యాగ దీప్తులు
మురుగు సిల్టుల వెలికి తీతలు - ముమ్మరంగా రోడ్ల ఊడ్పులు
పచ్చ పచ్చగ పెరుగు చుండే స్వచ్ఛ సుందర బాహ్యవనములు –
అవి సదా మన స్వచ్ఛ బంధుర చల్లపల్లికి తీపిగురుతులు!
- ఒక తలపండిన స్వచ్ఛ కార్యకర్త,
23.01.2023.