పర్యావరణ ధ్వంసకమయ్యే - ఒక్కసారికే పనికి వచ్చే ప్లాస్టిక్కుల వాడకం దేనికి?

టైల్స్ సరిచేసిన నిన్నటి పనికి పొడిగింపుగా.....@2660^*

            మంగళవారం(24-1-23) వేకువ సైతం ఐదారుగురు స్వఛ్ఛ - కార్యకర్తలది అదే కృషి, అదేచోట, అదే సమయానికి - 4.30 - 6.40 సమయాల నడుమ! చలి మాత్రం నిన్నటికంటే తీవ్రమయింది. ఏదో – ఇద్దరు సీనియర్ మోస్ట్ కార్యకర్తలం మాత్రం వేకువ పాదచారణ సందర్భంగా – చుట్టపు చూపుగా వాళ్ల కష్టానికి సాక్ష్యంగా కొంత సేపు నిలబడ్డాం!

            మా ఇద్దరికీ వాళ్ల యెడ అలాంటి సానుభూతి ఉండదు గాని, ఇతర సహృదయ పరిచయస్తులు ఈ రెస్క్యూదళ శరీర కష్టాన్ని చూస్తే “అయ్యో! ఎందుకు వీళ్లకీ ఖర్మ! ఇంకా ఎన్నేళ్లకు స్వఛ్ఛ కార్యకర్తల గ్రామ స్వచ్ఛ – శుభ్రతల బెంగతీరేది?...” అనుకొంటారేమో గాని - ఇంత మురికి పనులకు - ఇన్నేళ్లుగా అలవాటుపడిన – అంకితులైపోయిన కార్యకర్తలు మాత్రం నిర్వికారంగా – నిరంతరంగా తమ బాధ్యతను తాము చేసుకుపోతూనే ఉంటారు!

            ఈ వేకువ సైతం 2 గంటల పాటు శ్రమించినా - ఈ పంచ కార్యకర్తల లక్ష్యం నెరవేరలేదు! తమకు అలవాటు కాని తాపీ పనిని - ఒక్కో రంగు రాతిని జాగ్రత్తగా విరగకుండా తీసి, ఇసుకను సర్ది, సమతలంగా చేసి, రంగురాళ్ల దుమ్మును తుడిచి, వాటిని పేర్చడం వరకూ ముగిసిందిగానీ - ఇంకాస్త సుందరీకరణ పనేదో మిగిలినట్లుంది!

            ఈ ఊళ్లో - చేసే కార్యకర్తలుంటే ఇలాంటి పనులకు కొదవేముంటుంది? ఎప్పటికప్పుడు ఏ మురుగు కాల్వపనో - రహదార్ల హరిత సుందరీకరణ కృషో – రోడ్ల గుంటలో వాళ్ల శ్రమదానానికి ఆహ్వానం పలుకుతూనే ఉంటాయి!

            అలాంటి ఆహ్వానం రేపటి వేకువ కార్యకర్తలకు పెదకళ్లేపల్లి దారిలోని బండ్రేవుకోడు కాలువ వంతెన ప్రక్క నూనె మిల్లు దగ్గర!

            మాలెంపాటి అంజయ్య గారి స్వచ్ఛ - సుందరోద్యమ నినాదాలతో నేటి ఈ కార్యకర్తల ప్రయత్నం వాయిదా పడింది.

            ప్రణామిస్తాం – ప్రశంసిస్తాం!

సాహసిస్తే - దోహదిస్తే స్వచ్ఛ సుందర చల్లపల్లికి

అనుకరిస్తే - అనుసరిస్తే - అన్ని వార్డులు శుభ్ర ప్రగతికి

వినోదిస్తే - వికాసిస్తే వీధి స్వచ్ఛత, ప్రజా భద్రత

స్వచ్ఛ సుందర కార్యకర్తకు ప్రణామిస్తాం - ప్రశంసిస్తాం!

- ఒక తలపండిన స్వచ్ఛ కార్యకర్త,

   24.01.2023.