పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?
ప్ర.సా.దు, ప్లాస్టిక్ వ్యర్థాలకే నేటి శ్రమదాన సమర్పణం - @ 2676*.
అనగా కళ్లేపల్లి బాటలోని ప్రభుత్వ సారా దుకాణమని అర్థం! గురువారం నాటి 24 మంది చాకిరీ కూడ ఆ 3-4 సెంట్ల దుకాణాంతర్భాగానికి ఏ మూలకూ చాల్లేదంటే - అక్కడి సింగిల్ యూజ్ ప్లాస్టిక్ వస్తువుల సాంద్రత, ఘనత తెలిసి పోవాలి! రహదారి మీదికంతగా కనిపించదు గాని, గ్లాసుల – సీసాల- సంచుల విశ్వరూపం లోతట్టున తెలుస్తుంది!
15 మంది కార్యకర్తలు – ఎవరెక్కడ కూర్చున్నా, వంగినా, కాలు కదిపే అవసరం లేకుండానే పెద్ద డిప్ప నిండిపోయింది! అలా- తలా 100 నిముషాల్లో వాళ్ళు సముపార్జించిన వ్యర్ధాలు లెక్కిస్తే 10 వేలకు తక్కువ కావు! షణ్ముఖ శ్రీనివాసుడు స్వచ్చోద్యమానికి బహూకరించిన రెండు పెద్ద సంచుల్నిండి, (ఫొటోల్లో చూడవచ్చు) ఏరవలసినవింకా మిగిలిపోయినవి!
ఏడెనిమిది మంది కత్తి వీరుల - దంతెధారుల – శ్రమ సదరు దుకాణం ఎదుటి డ్రైనును చక్కదిద్దింది! ఇద్దరో ముగ్గురో చీపుళ్ల వారు అంగడి బైటా లోపలా చెత్త - దుమ్ము ఊడ్చారు.
కార్యకర్తల నేటి శ్రమదానం చూసే కొద్దీ నాకు ఆశ్చర్యం, ఆనందం, దిగులూ ఏక కాలంలోనే కలిగాయి! ముఖ్యమంత్రంతటి వ్యక్తి ఏనాడో ఏకమాత్రవాడక ప్లాస్టిక్ లు నిషేధించాక – ప్రభుత్వ దుకాణం దగ్గరే అవి గుట్టలు పడుతున్నందుకు ఆశ్చర్యమూ, గ్రామ సమాజంలో మంచి గుర్తింపున్న వైద్యులూ, ఉద్యోగులూ - వృద్ధులూ, రైతులూ - సొంతింటి బాధ్యతలు మోసే గృహిణులూ ఈ వేకువ కాలంలో వచ్చి, చెత్త మనుషులుగా మారి భూమికి కాలుష్య భారాన్ని తగ్గిస్తున్నందుకు ఆనందమూ!
దిగులెందుకంటే - “9 ఏళ్లుగా నిరంతరంగా ప్రస్థానిస్తున్న చల్లపల్లి స్వచ్చ సుందరోద్యమం ఖర్మకాలి ఎప్పుడైనా ఆగిపోతే – ఈ పచ్చదనాల 7 రహదారులు డజన్ల కొద్దీ మురుగు కాల్వలు, తలకుమించిన కాలుష్యాలు ఏమైపోవాలి” అనే భయంతో!
ఇంత మురికి - చెత్త - కరకు పనులు చేస్తూ కూడ తమ పారిశుద్ధ్య పనుల్తో వెగటులేక – విసుగు లేక – వాతావరణ విధ్వంసకారుల్ని నిందించక – తమ పని తాము చేసుకు పోతున్న స్వచ్చ సైనికులకు పాద నమస్కారాలు!
6.40 సమయంలో సమీక్షా సభ విశేషాలు:
1) కార్యకర్తలు నింపిన 2 నిలువెత్తు భారీ సంచుల వ్యర్థాల గ్రూప్ ఫోటో,
2) పరిమితకాల కార్యకర్త మిక్కిలినేని మధు గారు కూచిపూడిలో 15 వ తేదీన జరుగనున్న తన కుమార్తె ఉద్వాహ వేడుకలకు సహ కార్యకర్తలనాహ్వానించడం,
3) షణ్ముఖ శ్రీనివాసుని రాగిపొడి పొట్లాల వితరణ,
4) శంకర శాస్త్రీయ పప్పుండల పంపకం,
5) ముమ్మారు అడపా వారి గ్రామ స్వచ్చ – సుందరోద్యమ సారాంశ నినాదాలూ, ఒక చిన్న ప్రవచనమూ!
Dr. డి.ఆర్.కె గారు అత్యవసర ప్రయాణాల వల్ల ఈ సమీక్షా సభలో లేక పోవడమే ఒక లోటు!
రేపటి మన రహదారి సుందరీకరణం కూడ కారం మిల్లు- ఆక్వా దాణా కేంద్రాల మధ్యనే ఉండగలదు!
చెమట చుక్క మేలన్నా!
“ఆరోగ్యమె భాగ్యమనెడి మన ఆర్యుల సూక్తి కన్న
“శతమానంభవతి” యనెడి చల్లని దీవెనలకన్న
“పరుల కొరకె దేహ” మనెడి ప్రవచనమ్ముల కన్నా
స్వచ్చ కార్యకర్త కార్చు చెమట చుక్క మేలన్నా!
- ఒక తలపండిన స్వచ్ఛ కార్యకర్త,
09.02.2023.