పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కుల వాడకం దేనికి?

2677^* వ నాటి స్వచ్చ – సుందరోద్యమ కబుర్లు.

            ఆనవాయితీగా నిర్ణీత స్థలానికి చేరుకొని, అనుకొన్న వేళకు ముందుగానే – అంటే నేటి (10.02.2023) వేకువ 4.17 కే తొమ్మిది మంది కార్యకర్తలు కళ్లేపల్లి బాటలో బోణీ కొట్టారు! రోజుకొక గంట శ్రమ సమర్పణం అనే నియమం ఎప్పుడో దాటి పోయి, 6.16 దాక – అంటే 2 గంటల తమ సమయాన్నీ, శ్రమనూ, విచక్షణనూ, మొత్తం 24 మంది – ఇంచుమించు 40 కి పైగా పని గంటల వ్యవధిని మనస్ఫూర్తిగా ఈ రహదారి మెరుగుదలకు వెచ్చించారు!

            వారిలో ఇద్దరు సీనియర్ డాక్టర్లు, ముగ్గుర్నలుగురు ప్రస్తుత/ మాజీ బడి పంతుళ్లు, రైతులు, గృహిణులు, ఉద్యోగులు, ఒక CPM నాయకుడూ ఉన్నారు. విద్యార్థి – యువతరం ప్రాతినిధ్యం ఈ వేకువ లేదు. బాట వెంటే వచ్చే - పోయే వ్యక్తులు గాని, ఆక్వా – దాణా ఫ్యాక్టరీ సంబంధీకులు గాని చూడడం మినహా – తమ వీధి స్వచ్చ – సుందరీకరణలో వ్రేలు పెట్టిందీ లేదు!

            ఎవరు సహకరించినా, పట్టించుకోకున్నా ఈ చల్లపల్లి శ్రమదానం ఏళ్లుగా – వేల దినాలుగా జరిగిపోతూనే ఉన్నది. పాతిక-ముప్ఫై మందో-అప్పుడప్పుడు 40-50 మందో పూనుకొని ఊరి చుట్టూ 7 రహదార్లను, బస్ స్టాండు ను, శ్మశానాల వంటి పబ్లిక్ ప్రదేశాలను, గ్రామ ముఖ్య వీధుల్ని, పంట – మురుగు కాల్వల్నీ సంస్కరిస్తూనే ఉన్నారు. వివిధ కారణాలతో పాల్గొనజాలని దాతలు, సానుభూతి పరులు ఏదో విధంగా శాయ శక్తులా ఈ ఆదర్శ శ్రమదానానికి సగంమంది మద్దతు తెలుపుతూనే ఉన్నారు.

            విచారమేమంటే – సాధారణ గృహస్తులూ, విద్యార్థులూ ఒక కాలక్రమణ పట్టికతో తమ గ్రామ బాధ్యతలకు ఉత్సహించకపోవడం!

            మహా శివరాత్రి పర్వదినం నాటికి శివరామపురం దాక – 3 కిలోమీటర్ల బాటను ఎప్పటిలాగే – ఒక శివాలయమంత స్వచ్చంగా – శుభ్రంగా చేయాలనుకొన్న స్వచ్చ కార్యకర్తలు-

- ఈ వేకువ సమయంలో మేకల డొంక దాక చేరుకోగలిగారు. వాళ్లకు అడుగడుగునా మద్యం, ప్లాస్టిక్ సీసాలు, గ్లాసులు స్వాగతిస్తూనే ఉన్నాయి. ఎండు కొమ్మలూ, రకరకాల చెత్తలూ, పుల్లలూ, ప్లాస్టిక్ సంచులూ అన్నీ షరా మామూలే!

- సుందరీకరణం ముఠా కాస్తా ఈ వేళ రోడ్డు పునర్నిర్మాణ కార్మికులుగా మారి, కళ్లేపల్లి – బందరు రహదారి కూడలిలో – రాళ్లు మోసి, గుంటల్లో సర్ది, ఆ జంక్షన్ లో రద్దీ వాహనాలకు మరికాస్త వెసులుబాటు కల్పించారు.

- కత్తుల ముఠా యథా ప్రకారం డ్రైను లోనూ, గట్టు మీదా పనికిరాని మొక్కల్నీ, గడ్డినీ తొలగించే పనిలో ఉంటే -

- ఏడెనిమిది మంది పనిమంతులు ఒక ప్రక్క తుక్కుల్ని ట్రాక్టర్ లోకి నింపుతూనే – గోనె సంచీడు ప్లాస్టిక్ వ్యర్థాల్ని సమీకరించారు!

- చీపుళ్ల వారు తమ విధిని తాము నిర్వర్తించారు.

- ఇద్దరు మళ్ళీ వెనక్కి పోయి, మద్యం దుకాణం దగ్గర మరొక పెద్ద సంచిని ప్రమాదకర ప్లాస్టిక్ వ్యర్థాల్తో నింపారు...

..... ఇలా ప్రతి వేకువ శ్రమదాన సంగతుల్ని నేను వ్రాసుకుంటూ పోవడమూ, చదివే వాళ్లు చదవడమూ సరేగాని, ఒక్క రోజన్నా ఈ శుభోదయ పారిశుద్ధ్యంలో పాల్గొనని, కనీసం వచ్చి చూడని వాళ్ళకు మాత్రం ఈ వ్రాతలు నమ్మదగనివిగానో – ఆశ్చర్యార్థకం గానో ఉండవచ్చు.

            నేటి కఠిన శ్రమ సమీక్షకు ముందు  - నువ్వంటే నువ్వనుకొని ఆఖరికి BSNL నరసింహునికి అవకాశం దక్కి, శ్రమదానోద్యమ సందేశ నినాదాల్ని ముమ్మార్లు గట్టిగా విన్పించడమూ,

            కస్తూరి శ్రీనుడి చెత్త నుండి సంపద మొత్తం 560/- ని స్వచ్చోద్యమానికందించడమూ - ఆవిధంగా 6.45 కు నేటి కార్యక్రమం ముగియడమూ....!

            రేపటి శ్రమదాన సందడి కూడ ఇదే కళ్లేపల్లి రహదారిలో – మేకలడొంక వంతెన కేంద్రంగా జరగవలసి ఉన్నది.    

          స్వచ్ఛ సైన్యపు పాదముద్రలు!

మంచు కురిసిన – వానదంచిన – మండుటెండల కాలమందున

విలాసముగా- వినోదముగా- విభ్రమముగా – విచలితముగా

సమస్యాత్మక వీధులన్నిట స్వచ్ఛ సైన్యపు పాదముద్రలు!

కశ్మలాలను తరిమి కొట్టే కఠిన తర శ్రమదాన రీతులు! 

- ఒక సీనియర్ స్వచ్ఛ కార్యకర్త,

  10.02.2023.