పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకా వాడదామా?
32 మంది కార్యకర్తల ‘రెడ్ శాల్యూట్’ - @2689*
ఎక్కడంటే - బెజవాడ బాటలోని చండ్ర వికాస కేంద్రం దగ్గర;
ఎప్పుడంటే – బుధవారం వేకువనే - మరీ 4.19 కే;
‘అరుణ వందనం’ మాత్రం 6.35 కు!
వివరాల్లోకి వెళితే:
- ముందుగా బెజవాడ దారి బాధ్యతలు - ఊడుపూ, దారికి తూర్పు పడమరల మార్జిన్ల గలీజును – అంటే నిరుపయోగ, అనాకారి మొక్కల్నీ, గడ్డినీ, ప్లాస్టిక్ ఛండాలాన్ని నరుక్కుంటూ, ఏరుకొంటూ, చెక్కుకొంటూ, ఎగుడు దిగుడుల్ని సరిదిద్దుకొంటూ - ఏళ్ల తరబడీ అలవాటైన రహదారి శుభ్ర - సుందరీకరణ కోసం 16 మంది,
- తమ ప్రత్యేకతను ప్రదర్శిస్తూ - అది మురుగుకాలువైనా, తామే నాటి పెంచిన చెట్లైనా, రోడ్లు గతుకులైనా, టీ - టిఫిన్ దుకాణాల వ్యర్ధాలైనా క్షుణ్ణంగా మెరుగులు దిద్దే నలుగురైదుగురు సుందరీకర్తలూ;
- విద్యుత్ ఉపకేంద్రం దగ్గరున్న దుమ్మూ - ధూళీ, మరెన్నో వ్యర్థాలనూ, పెట్రోలు బంకు మొదలు టీ దుకాణాల దాకా గంటన్నర పాటు విసుగు చెందని విక్రమార్కుల్లాగా ఊడ్చిన ముగ్గురు వాలంటీర్లూ;
- రహదారి కాలుష్యం పని పట్టాక - కోమలానగర్ తొలి వీధిలో - అనగా మిల్లు ప్రక్క వీధి చివరి కంటా కశ్మలాల మీద వీర విహారం చేసిన మొదటి షోడశ సంఖ్యాకులూ;
- గంటన్నర పైగా శ్రమదానంతో పుట్టు కొచ్చిన వ్యర్థ భీభత్సాలను ట్రక్కులోకి ఎగుమతి చేసి, చెత్తకేంద్రానికి చేర్చిన నలుగురు పనిమంతులూ;
- పని విరమణ విజిల్ మ్రోగాక – 6.16 దాకా వికాస కేంద్రం ఎదుట డ్రైనును బాగుచేస్తున్న ముగ్గుర్నలుగురు రైతులూ......
నేటి శ్రమదానంలో ఇవి కొన్ని ముఖ్య ఘట్టాలు!
కాఫీ సేవనం పిదప - సమీక్షా సభకు ముందు ఒక వీరసింహుడి సందడి! అతని మనుమడు – ‘కొర్రపాటి అభినవ్’ అష్టమ జన్మదినోత్సవాన్ని ఇందరు శ్రమదాతలు ఆశీస్సులతో రోడ్డుపైన జరపడమొక ప్రత్యేకత! ఈ విశ్రాంత పంచాయతీ చిరుద్యోగి యధాశక్తిగా సోదర కార్యకర్తలకు మిఠాయిలు తినిపించి, ఎర్ర టీ షర్టులు తొడిగించి, స్వచ్ఛ – సుందరోద్యమానికి అర్థవెయ్యిన్నూట పదార్లు సమర్పించి, టాంజానియాలో ఉన్న జన్మదిన బాలకుడిని కార్యకర్తలభినందించి......
అలా ముగిసెను - 2689* వ నాటి గ్రామ స్వచ్ఛ – సుందరీకరణ బాధ్యతలు!
గురువారం నాటి వేకువ సమయ శ్రమదాన నిమిత్తం మనం మరొకమారు చండ్ర వికాస కేంద్రం ముంగిటనే కలిసి, శ్రమించవలెనని మనవి!
శ్రమదానం చూడ రండు
స్వచ్ఛ - శుభ్ర స్వప్నాలను - సామాజిక బాధ్యతలను
కలలు నిజం చేయగలుగు కర్మిష్టుల కదలికలను
చూడాలనిపిస్తుంటే - స్వచ్ఛ చల్లపల్లిలోన
ప్రతి వేకువ విధిగా జరిగే శ్రమదానం చూడ రండు!
- ఒక సీనియర్ స్వచ్ఛ కార్యకర్త,
22.02.2023.