పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకా వాడదామా?

శుక్రవారం – (24-2-23) శ్రమ సమర్పకులు 24+2 మంది - @2691^*

శ్రమ గ్రహీతలు –

1) బెజవాడ బాట,

2) కోమలానగర్ లో 1 ½  వీధులు,

3) ఇంకొన్ని కొసరులూ!

            సమయం 4.24 నుండి 6.15 దాక! నేను గమనించినంత వరకూ స్థానిక కార్యకర్తలు ఇద్దరే!

            ఊరి వార్డులేమో ఒక లెక్క ప్రకారం 20, గడపలేమో 5000/- దాక! వార్డు కిద్దరు శ్రమదానంలోకి వచ్చినా, పొరుగూళ్లు కార్యకర్తలతో కలిసి 50 మంది ఔతారు. ఒక్కో వార్డును 2 రోజుల చొప్పున బాగుచేసినా, ఎంత సందడి - ఎంత జాగృతి - అసలదెంత అభ్యుదయకర సంస్కృతి! ఇది చల్లపల్లి కనుక ఇలాంటి ఊహాత్మక స్వప్నాలు - ఇతర గ్రామాలకవి వర్తించవు!

            ఒక న్యూజిలాండో - స్విట్జర్లాండో- అమెరికా పడమటి అంచున ‘ఇర్వైన్’ పట్టణమో – ఆఖరికి ఇండియాలోని ఇండోర్ నగరమో, అంతగా చూపు త్రిప్పుకోనంత సుందరంగా ఎలా నిలుస్తున్నాయి? ప్రతి పౌరుడిలో ఎంత అవగాహన - ఎంత స్ఫూర్తీ ఉండి ఉండాలి? మరి – చల్లపల్లికేం తక్కువని? జనంలో శుభ్ర - సౌందర్య స్పృహ పెరిగితే – పౌర బాధ్యతలు పెంపొందితే మన ఊరు దేశమందలి  6 లక్షల గ్రామాల్లో తలమానికం కావడమెంతసేపు?

            “కలలు కనండహో!” అని వేరే సందర్భంలో యువతకు పదే పదే ప్రబోధించింది మాజీ రాష్ట్రపతి అబ్దుల్ కలాం మహాశయుడు! “సదరు కలలు కేవలం వ్యక్తిగతం కాక - సమాజం గురించి కూడా” అనేది చల్లపల్లి స్వచ్చ - సుందరోద్యమకారుల ఆశ!

            ఈ ఉదయం బెజవాడ దారిలో మరొక 50 గజాల భాగాన్ని తీర్చిదిద్దినది అలా గ్రామ సౌభాగ్యాన్ని కలగనే కేవలం ముగ్గురే! మచ్చుకు వాళ్ల పనితనం చూడాలనుంటే - మన వాట్సప్ మాధ్యమ చిత్రంలో 3 వ వీధి తిలకించండి.

            18 - 20 మంది కార్యకర్తల మూకుమ్మడి శ్రమదానంతో గాని కోమలానగర్ 3 వ లైనూ, మధ్యలో అడ్డ రోడ్డూ బాగుపడలేదు. ఆ వీధిలో నాలుగైదు ఖాళీ స్థలాలు పాక్షికంగానైనా సరే కాస్త శుభ్రంగా, అందంగా మారడానికి కారణమూ గంటన్నరకు పైగా కార్యకర్తల శ్రమే!

            2 వీధుల పిచ్చి కంపలూ, ప్లాస్టిక్ తుక్కులూ, పచ్చి – ఎండు వ్యర్ధాలూ విజయవాడ దారిలో ప్రోగుబడిన చెత్త గుట్టలూ ట్రాక్టర్లో కెక్కి, చెత్త కేంద్రానికి చేరినదీ మానవ శ్రమతోనే!

            6.35కు కార్యకర్తలంతా విజయా కాన్వెంటు ముఖద్వారం ఎదుట క్రమపద్ధతిలో నిలిచి, తాతినేని రమణ గారు ముమ్మారు నినదించిన గ్రామ స్వచ్ఛ - సుందరాశయాన్ని ముక్తకంఠాలతో ప్రతిధ్వనించి, రేపటి వేకువ ప్రణాళికను రచించి, ఇళ్లకేగారు!

            బెజవాడ మార్గంలోని విజయా కాన్వెంట్ దగ్గరే మన రేపటి వేకువ కలయిక!

            ఇదేం ఖర్మ గ్రామానికి?

ప్రతి వేకువ వీధుల్లో శ్రమదానం జరుగుతోంది-

సందడిగా ఊరంతా చెత్త బండి తిరుగుతోంది-

‘మనకోసం మనం’ ట్రస్టు ఘన సేవా అందుతోంది-

ఇంకెప్పుడు పూర్తి మార్పు? ఇదేం ఖర్మ గ్రామానికి?

- ఒక సీనియర్ స్వచ్ఛ కార్యకర్త,

   24.02.2023.