పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకా వాడదామా?

వీధి వృక్షాల మరమ్మత్తులో రెస్క్యూ దళం - @2702^*

            మంగళవారం(7-3-23) నాడు వేకువ వాళ్ల ఉనికి గంగులవారిపాలెం బాటలో కన్పించింది. తొలుత ఐదుగురే కాని, క్రమంగా ఇతర కార్యకర్తల మద్దతు ఎక్కువై చివరి దశ – బాల దుర్గారాంప్రసాదుని నినాదాల వేళకు 14 మందిగా లెక్క తేలింది! అది జరిగిందేమో పద్మావతి ఆస్పత్రి ఎట్ట ఎదుట!

            నేను ఇంటి నుండి గేటు ఎదుటికి వచ్చేప్పటికే రెస్క్యూ కార్యకర్తల పని ముమ్మరించింది - కరెంటు తీగల దాక పెరిగిన పచ్చని వృక్షం సగం మర రంపంతో కోసేశారు. చెట్లు నాటి - పెంచడంలోనే కాదు - తప్పనప్పుడు వాటి సుందరీకరణ నిమిత్తమో, విద్యుత్ ప్రమాద భయంతోనో వాటి కొమ్మల్నెలా తొలగించాలో కూడ వాళ్ళకు బాగా అనుభవం వచ్చింది!

            ఒక్క గంటలోపే ఆ చెట్టునూ, ఎండిన 2 మృత వృక్షాల మొదళ్లనూ కోసి, కొమ్మ రెమ్మల్ని ట్రక్కులోకి ఎక్కించి, కొమ్మల్ని అక్కడే ఉంచి, మళ్లీ అదే వీధి చివరి మలుపులో ఇలాగే హద్దు మీరి పెరుగుతున్న ఇంకో చెట్టు సంగతి చూశారు! ఊరి వీధుల మెరుగుదలకూ – సౌకర్య కల్పనకూ - సుందరీకరణంతో ప్రజల ఆహ్లాదానికీ అంకితమైపోయిన కార్యకర్తలు ఇలాగే ఉంటారు మరి!

            మహాభారత యుద్ధ క్షేత్రంలో అర్జునుడికి ఉపదేశించే గీతాచార్యుడిలా అన్నాడట!

            “యదాయదాహి ధర్మస్య గ్లానిర్భవతి భారత -....

            సంభవామి యుగే యుగే!”

            (ఏ యుగంలో ఎప్పుడు ధర్మానికి భంగం వస్తుందో – అప్పుడు అక్కడ నేను అవతరిస్తుంటాను.)

            ఈ ఒక్క దశాబ్దంలో - ఈ చారిత్రాత్మక చల్లపల్లి కశ్మల భీభత్సాల ప్రమాదం తప్పించడానికి అలా సంభవించిందే చల్లపల్లి స్వచ్ఛ - సుందరోద్యమం!

            రేపటి బెజవాడ రహదారి పారిశుద్దీకరణ కోసం మనం కలిసి శ్రమించదగింది గాంధీ స్మృతి వనం – 6 వ నంబరు కాలువ ప్రాంతం!

అదెట్లు వచ్చి చేరిందో అందరికీ తెలియకున్న –

అలవడింది పరిశుభ్రత అందరికీ – ప్రతి యొకరిని!

పలకరించు పచ్చదనం లేకుంటే తొమ్మిదేళ్లు -

ఊరి జనుల కాహ్లాదం ఉండదుగద ముందునాళ్లు!

- ఒక సీనియర్ స్వచ్ఛ కార్యకర్త,

   07.03.2023.