పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు మనం వాడవద్దు.
అనుకోని సంఘటనతో 2713* వ నాటి శ్రమదానం!
నేటి (మంగళవారం – 21.3.23) వేకువ సైతం - ఇంకా 4. 19 ఐనా కాకుండానే - అదే గంగులవారిపాలెం వీధిలో తొలుత 7 గురూ, వెంట వెంటనే ముగ్గురమూ బండ్రేవుకోడు మురుగు కాలువ గట్టు మీద వీధి సుందరీకరణ కోసం చేసిన ప్రయత్నం.
అనగా - బాటకు దక్షిణాన క్రమశిక్షణ లోపిస్తున్న - రోడ్డుపైకి దురాక్రమిస్తున్న మరో 3 - 4 చెట్ల కొమ్మల్ని శిక్షించి, అదుపు చేసే క్రమంలో – ఆ చెట్టు కొమ్మే సగానికి పైగా కార్యకర్తలకి - ఝలక్ ఇచ్చిన వైనం!
4.30 నుండి కార్యకర్తల శ్రమదానం సాఫీగానే జరిగింది; 3 పెద్ద చెట్లకు నిన్నటిలా బోడి గుళ్లు కాక – చక్కని క్రాపులు వేశారు. ఒక చెట్టు మీద ఎత్తుగా ఎండు కొమ్మను మాత్రం మోకు తగిలించి, ఆరుగురు కలిసి లాగి, విరిచేందుకు – ఐదారు మార్లు బలాత్కారం చేసినా అది ఊడి రాలేదు; ఇక వాళ్ళు పంతం పట్టి - శక్తినంతా ప్రయోగించి లాగడమూ, ఫెళఫెళార్భటితో కొమ్మ విరిగి మూకుమ్మడిగా ఐదుగురు తూలి క్రింద పడిపోవడమూ వెంట వెంటనే!
పడిన చోట గులక రాళ్ళూ, ఎండుపుల్లలూ, చిన్న ముళ్లూ ఉండి, ఒకళ్ల మీద ఒకళ్లుగా ముగ్గురు పడడమూ - వారిలో ఒక కమ్యూనిస్టు వీధి కార్యకర్తకు బలంగా – ఐదారు చోట్ల నెత్తురు రావడమూ, ఆ ఎగుడు దిగుడు చోట పైకి లేస్తూ ఇంకొకాయన తూలి పడడమూ వాట్సప్ మాధ్యమంలో కనిపిస్తే చూడండి!
ఇవన్నీ స్వచ్ఛంద శ్రమదానంలో అప్పుడప్పుడూ జరిగేవే! ఇదేమీ అపశకునమో - దుర్ఘటనో కాదు; 2 – 3 నిముషాల్లో సంబాళించుకుని, చిన్న దెబ్బల్ని తడిమి చూసుకొని - వెంటనే మరో చెట్టు సుందరీకరణానికి పూనుకొన్నారు కూడ!
ఇక - ఇప్పుడు చెప్పండి - వీళ్లని ‘రెస్క్యూ టీమ్’ అనడం సమంజసమా కాదా!
రేపటి మన శ్రమదానం విజయవాడ బాటలో చిన్న కార్ల షెడ్డు కేంద్రం గానే జరుగవలసి ఉన్నది.
ప్రారంభమె సంచలనం
ఒక అడుగుతొ ప్రారంభం ఉద్యమాలు ఏవైనా
ఏవి ఎప్పుడాగినవో - ఏవి ఎంత నిలిచినవో!
స్వచ్చోద్యమ చల్లపల్లి ప్రారంభమె సంచలనం
సుదీర్ఘ ఘన చరిత్రనూ చూచిన ఆశ్చర్యమే!
- ఒక సీనియర్ స్వచ్ఛ కార్యకర్త,
21.03.2023.