పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు మనం వాడవద్దు.
శనివారం నాటి గ్రామ సామాజిక సేవల్ని పరిశీలించండి! @2724*
[క్రొత్తనెల తొలి దినం చాల వింతల్ని తెచ్చింది. దాదాపు అన్ని వార్డుల్నుండీ వార్డు బాధ్యులో - ఉద్యోగ నిరుద్యోగులో వీధి పారిశుద్ధ్య కృషిలో పాల్గొనడమూ, మొత్తం 150 మంది దాక- అందులో మరీ ముఖ్యంగా 20 ఏళ్లలోపు వాళ్లు తగు సంఖ్యలో ఉండడమూ, సువిశాల బెజవాడ రాదారి కిలోమీటరు దాక స్వచ్చ- సౌందర్యాలు పులుముకొని స్వచ్ఛ- సుందరోద్యమ తడాఖా చూపడమూ - ఇవన్నీ వింతలు కావా?]
కొంచెం నిదానించండి! పైన బ్రాకెట్లో వ్రాతలు ఏప్రిల్ 1 కి చెందినవి; గ్రాఫిక్ వ్రాతలన్నమాట! అసలు సిసలు సంగతు లేమంటే:
- నేను 10 నిముషాలు ఆలస్యంగా -4.30 కు బెజవాడ దారిలోని కాటాల దగ్గరికి చేరుకోకముందే 40-50 గజాలు ముందుగానే డజను మంది మైకు నుండి మంచిపాటలు వింటూ తూర్పు డ్రైనులో 8 మందీ, పడమటి మురుగు కంపు కాల్వ దగ్గర నలుగురూ శ్రమిస్తున్నారు.
- అందులో తూర్పు డ్రైను లోతుగా, నీటి గుంటగా, ట్రాన్స్ఫార్మర్ దగ్గరగా ఉండి, ఎంతో మెలకువగా, నెమ్మదిగా పని జరిగింది. పైన మబ్బులు తప్ప - క్రింద వీధి దీపాలు లేవు!
- పడమర డ్రైన౦తా అపార్ట్మెంట్ల వ్యర్థ జలం చేరి, ఎన్ని దిక్కు మాలిన వ్యర్ధాలు వాటిలో చేరాల్నో చేరి, ఎంగిలాకుల - ఎంగిలి మెతుకుల వల్ల నిలవ నీరు కంపు కొడుతున్న సన్నివేశం! పైగా డ్రైను ఒడ్డున వరుసగా మంచి రంగుల బోగన్ విలియా పూల చెట్లూ. ఐతే ముళ్ళ కంపలూ, పూల కొమ్మల ముళ్ళూ !
- మరొక 10 నిముషాల్లో చూస్తే- స్వచ్ఛ కార్యకర్తల సంఖ్యా బలం పెరిగి – 22 దాక చేరి, అప్పుడిక చెత్త లోడింగు సందడి కూడ మొదలయింది!
- యధావిధిగా రాదారినీ, మార్జిన్లనూ చీపుళ్ల కార్యకర్తలు ఊడుస్తూనే ఉన్నారు; దంతె ధారులు కరవాల ఖండిత ముళ్ల కొమ్మల్నీ, చెత్త పరకల్నీ లాగి పోగులు చేయడమూ జరిగిపోతూనే ఉన్నది. ఈ పనులన్నీ చీకటిలోనే, వేగంగా వచ్చి, దూసుకు పోతున్న వాహన రొదల నడుమనే - అప్రమత్తంగానే చేయవలసి వచ్చింది!
అలా 6.06 నిముషాల దాక సామాజిక స్పృహ ప్రదర్శించిన 22 మందిలో జ్వరం వల్ల ఒంట్లో ఓపిక చాలకున్నా- అనివార్యంగా బాటనూడ్చి, శుభ్రపరచిన ఒక సీనియర్ స్వచ్ఛ వైద్యుడూ, ఊరి ఇతర బాధ్యతల్లో తలమునకలై కూడ వచ్చి శ్రమించిన గ్రామాధ్యక్షురాలూ ఉన్నారు!
ఎవరో పెంచిన చెట్ల కాయల్ని రాతితో కొట్టడం తేలికే! అలాంటిదే తొమ్మిదేళ్ల స్వచ్ఛ - సుందరోద్యమంలో తప్పులు వెదకడమూ - అభాండాలు వేయడమూ కూడ!
ఈ కార్యకర్తలు తలా 105 నిముషాల అమూల్య సమయాన్నీ - శ్రమనూ ఈ 60-70 గజాల రోడ్డుకు కాటాల దాక సమర్పించడ మొక్కటే నా దృష్టిలో ఆరాధ్యనీయం, అనుసరణీయం!
6.30 సమయంలో కాఫీలు ముగించి, నేటి శుభ్ర-సుందరీకృత రహదారి భాగాన్ని సంతృప్తిగా చూసుకొని, సమీక్షించిన DRK గారైతే ఇంకాస్త ఎక్కువ అనుభూతికి లోనై – అంతకు ముందు ట్రస్టు కార్మిక పర్యవేక్షక కస్తూరి శ్రీనివాసుని త్రివిధ నినాదాలు పునరుద్ఘాటించి, 6.40 కి నేటి కార్య క్రమానికి స్వస్తి పలికారు!
కొన్నిరోజులుగా స్వచ్ఛ కార్యకర్తలకు తినుబండారాలు క్రమం తప్పక పంచుతున్న రావెళ్ల - గుత్తి కొండ దంపతులు నేటి ఉదయం కూడ ఆవిధంగా స్వచ్ఛ- సుందరోద్యమంలో మమేకమయ్యారు!
రేపటి నిత్యవిధి - వీధి సుందరీకరణ నిమిత్తం మనం కలుసుకొని పాటుబడవలసింది - ఈ కాటాల దగ్గరనుండే!
ఎలా ఫలితములు దక్కును?
“తర్కవితర్కంతోనో – ముఖ స్తుతుల గోలతోనొ
ఉపన్యాసములతోనో ఉమ్మడి ఫలితం దక్కదు”
అని తెలిసీ ప్రతి వేకువ శ్రమ సందడి చూసికూడ
ఏంలాభం? పనికి దిగక ఎలా ఫలితములు దక్కును?
- ఒక సీనియర్ స్వచ్ఛ కార్యకర్త,
01.04.2023.
