పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?

స్వచ్చ - సుందర ప్రయత్నంలో పనిదినాల సంఖ్య 2733^*

ఊరి బాగు పట్ల నిబద్ధత గల 7+2 కార్యకర్తల సోమవారం (10.4.23) ఉదయపు శ్రమదాన ధారావాహికలో నేటి వివరాల్లోకి వెళితే:

- రెస్క్యూ ముఠా ఈ వేళ పూనుకొన్నది కూడ గంగులవారిపాలెం దారిలోని బండ్రేవుకోడు మురుగు కాల్వ దగ్గరే! ఆ బాటకు పొలం ప్రక్కగా – ఉత్తరం గానే!

- అక్కడ దక్షిణం ప్రక్కలో వలె మహా వృక్షాలు లేవు గాని, కరెంటు తీగలున్నాయి. క్రిందేమో కార్యకర్తలు ఐదారేళ్ల క్రితం నాటి, పెంచిన గద్దగోరు, సువర్ణ గన్నేరు వంటి పూలమొక్కలు చిక్కగా పెరిగాయి.

- మూడు నాలుగు రంగుల పూల కొమ్మలు కొన్ని ఇప్పటికింకా విద్యుత్ తీగల్ని తాకలేదు గాని – విద్యుదుద్యోగులకు పని కల్పించడమెందుకని - ముందుగానే స్వచ్చ కార్యకర్తలు జాగ్రత్త పడుతున్నారు!

- ఈ బాట ప్రయాణికుల్లో 2 వర్గాలు కనిపిస్తున్నాయి:

1) వేసవి ఎండల సమయంలో నీడనిస్తున్న – పూల శోభను ప్రకటిస్తున్న ఈ పెద్ద చెట్లను - సుందరీకరణ పేరుతో తొలగించరాదనేది కొందరి,

2) ఆకులు, పూలు రాలి, పుప్పొడి పరచుకొని, కొన్నిటి ఘాటు వాసన (సంవత్సరంలో 10 రోజులే!) ఇబ్బంది అనీ మరికొందరు,

            రెండవ - మూడవ (విద్యుత్ శాఖ) సంగతుల్నే పరిగణించి, చెట్ల సుందరీకరణం జరుగుతున్నది! దక్షిణం ప్రక్క ఈ ఉదయం ఏ 30 మొక్కల కొమ్మలో పోయి, బాటైతే కాస్త విశాలంగా కనిపిస్తున్నది! నేటి నినాదాల ప్రకటనదారుడు కస్తూరి శ్రీనివాసుడు.

            తెగువ కార్యకర్తలది!

దేశానికి తిండి పెట్టు దీక్ష రైతు – కూలీలది

స్వాతంత్య్రం కొరకు సాగు సమరమ్ములు అలనాటివి

గ్రామస్తుల సుఖ శాంతులు కోరి బ్రహ్మ ముహూర్తాన

దిన దినమూ పాటుబడే తెగువ కార్యకర్తలది!

- ఒక సీనియర్ స్వచ్ఛ కార్యకర్త,

  10.04.2023.