పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?

2739^* వ (ఆదివారం) నాటిది ఈ శ్మశాన- డంపింగ్ కేంద్రాల సంస్కరణ!

            ఈ 16.4.23 నాటి ఆ సంస్కర్తలెవరు - ఎందరు –  సంస్కరణ విధం బెట్టిది?... అని ఆరా తీస్తే :

            5.10 కి అర్ధాంతరంగా నిష్క్రమించిన ఇద్దరు వైద్య ప్రముఖులూ, విశ్రాంత వయోధిక ఉద్యోగులూ, రైతులూ, గృహిణులూ, తదితర వృత్తికారులూ - మొత్తం 28 మంది.

            మరి వేకువ 4.20 కే శ్మశాన, దహన వాటికల ప్రక్కన వాళ్లకేం పని బడిందయ్యా అంటే – శుభ్ర పరచడానికి ఊరి వీధులూ, మురుగు కాల్వలూ దొరకలేదా అనుకొంటే- సెంటిమెంటల్ గా - ఈ రుద్రభూమి ప్రమధగణాల సరసనే చీకట్లో ఎందుకు పనిచేస్తున్నారని ప్రశ్నించుకొంటే-

            ఈ చిల్లలవాగు గట్టు మీది కైలాస క్షేత్రానికొక బ్రహ్మాండమైన శ్రమదాన గతం ఉన్నది! రాష్ట్రంలోని వేలాది శ్మశానాల కన్న దీని కొక ప్రసిద్ధి ఉన్నది!

            - ఏడేళ్ళ క్రితం గణనీయ సంఖ్యలో స్త్రీ పురుష కార్యకర్తలు ఉదయ - సాయంత్రాల్లో జట్టు జట్లుగా శ్రమించి నెలల తరబడీ తీర్చిదిద్దిన శ్రమైక జీవన చరిత్ర ఉన్నది!

            అందుకే నేటి శుభ్ర - సుందరీకరణ ప్రయత్నంలో అడుగడుగునా స్వచ్ఛ కార్యకర్తల అనుభూతులు!

            10 మంది చెత్త సంపద కేంద్ర - దహన వాటికల ప్రాంతాన చెట్లు, పూల మొక్కల నడుమ కలుపుతీస్తుంటే -

            ఏడెనిమిది మంది కత్తులు, దంతెలు ప్రయోగించి, పాతిక సెంట్ల ఖాళీ జాగాలోని గడ్డినీ – పిచ్చి కంపనీ - తీగల్ని తొలగిస్తుంటే..

            గ్రామ సర్పంచమ్మతో సహా ముగ్గురు మహిళలు చీపుళ్లతో సిమెంటు బాటల్ని ఊడుస్తుంటే -

            చిల్లలవాగు ఉత్తరపు గట్టును నలుగురు బాగు చేస్తుంటే -

            ఇద్దరు మాత్రం సిమెంటు బాట మార్జిన్ను అద్దంలా మెరిపిస్తుంటే -

            ఈ గంటన్నర కాలపు సార్వకాలిక ఆదర్శ శ్రమదాన వేడుకను చూస్తూ నాబోటి వాళ్లకు మనసు జలదరిస్తుంటే -

            మరొక వృద్ధ భావుకుడు ఈ దృశ్యాలను ఫోను కెమేరా కంట్లో బంధిస్తుండగానే తూర్పున సూరీడు మేల్కొన్నాడు!

            చెత్త సంపద కేంద్రం తూర్పును ఐదారేళ్ల క్రిందట ఒంగోలు వైద్య కురు వృద్ధుడు – నల్లూరి రంగారావు, GBR ఫౌండేషన్ వ్యవస్థాపక వైద్యుడు గోపాళం శివన్నారాయణుడు నాటిన ఫల ప్రదములైన ఆమ్ర వృక్షాలు,           

            అప్పుడిక రెండు చిన్న ముఠాలు తాము కష్టపడి శుభ్రపరచిన చోటుల్ని ఏదెలా ఉందోనని పోల్చి చూసుకొని - మిగిలిన వారికి చూపించుకొని, మురిసిపోతున్నారు! (పాపం - అత్యల్ప సంతోషులు!)

            ఉదయం 6.10 దాక సాగిన శ్రమదానంతో భళ్లున తెల్లారాక దృశ్యాలేమంటే:

            - మెరుగులు దిద్దుకొన్న 3 సిమెంటు రోడ్లు,

            - పచ్చని చెట్లు, పూల మొక్కల నడుమ ఆహ్లాదకరంగా 2 ఖాళీ స్థలాలూ,

            - ఇంకో వైపున డంపింగ్ కేంద్రపు పొగలూ,

            -  వాటి నడుమ తమ నేటి కాయకష్టఫలితంగా శుభ్ర- సుందరీకృత ప్రదేశాల్ని సంతృప్తిగా చూసుకొంటున్న పాతిక మంది పైగా స్వఛ్ఛ - సుందరోద్యమ కారులు!

6.40 దాక జరిగిన సమీక్షా కాలపు విశేషాలు:

1)  రావెళ్ల, గుత్తికొండ ఉపాధ్యాయ దంపతుల పప్పుండల - నువ్వుండల పంపకమూ,

2) లంకే సుభాషిణీ ప్రాయోజిత ములగకాయల వితరణమూ,

3) అస్మదీయ నాణ్యమైన - లేలేత కరివేపాకు ప్రదానమూ,

4) ధ్యానమండలి ప్రతినిధి నాయుడు మోహనుడి చెవికింపైన స్వచ్ఛ - సుందరోద్యమ నినాదాలూ,

            చల్లపల్లి స్వచ్ఛోద్యమం తరపున ధ్యాన మండలివారు 10 వ తరగతి ముగించిన విద్యార్థుల కోసం మంద గమన ద్విచక్ర (స్లో సైకిలింగ్) పోటీల (ఈ సాయంత్రం 4.00/5.00 నడుమ -  స్వచ్ఛ కార్యకర్తలందరూ ఆహ్వానితులే!) ప్రకటనమూ...

            ‘బుధవారం వేకువ కూడ కార్యకర్తల కృషి శ్మశాన చెత్త సంపద కేంద్రాల దగ్గర’ అనే సమాచారమూ...

            ఎన్నాళ్ళీ అమాయకం?

బ్రహ్మకాల శ్రమదానం ఫలిత మిచ్చునని తెలిసి

ఆ ఫలితా లారోగ్యం ఆనందం అని గ్రహించి –

వందలాది క్రొత్తవాళ్లు వచ్చి సహకరించరేమి?

ఎన్నాళ్ళీ అమాయకం? ఇదేం ఖర్మ మన ఊరికి?

- ఒక సీనియర్ స్వచ్ఛ కార్యకర్త,

  16.04.2023.