పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?

2740* వ నాటి ఆరేడుగురి శ్రమదానం!

        చల్లపల్లి స్వచ్ఛ సుందరోద్యమంలో సోమ - మంగళవారాలంటే రెస్క్యూ దళం వంతు! కనుక వారు తాము బాగు చేయాలనుకొన్న గంగులవారిపాలెం బాటలోని ఆస్పత్రి ఎదుటి ఖాళీ స్థలం దగ్గర సకాలంలో ప్రత్యక్షమయ్యారు!

        అది 17 - 18 సెంట్ల జాగా - అందులో తాతినేని వేంకటరమణుడు మొక్కల పెంపక - విక్రయ కేంద్రాన్ని నెలకొల్పుతున్నాడట! సదరు నివేశన స్థల యజమాని, దాని చుట్టూ ప్రహరీ నిర్మించదలచి - అందు కడ్డుపడిన పెను వేప చెట్టును కొట్టించాలనుకొన్నప్పుడు - వీధి సుందరీకరణలో భాగంగా రెస్క్యూటీం వారందుకు పూనుకొన్నారు.

        ‘మనకోసం మనం ట్రస్టు’ కారణంగా - అసలే ఈ వీధి వేల కొద్దీ పూలమొక్కలతో - పచ్చదనం పరవళ్లతో - ఇతర హంగుల్తో ఇప్పటికే సగం జిల్లాలో మారుమ్రోగిపోతున్నది. చల్లపల్లి సందర్శకుల్లో వీలైన ప్రతి వాళ్లూ పని గట్టుకొని వీధి సౌందర్య వీక్షకులు గానో – పాదచారులు గానో దాని కభిమానులైపోతుండగా..

        క్రమంగా ట్రాఫిక్ కూడ పెరుగుతుండగా...

        ఇప్పుడీ బజారుకు నర్సరీ హంగులు కూడ తోడన్నమాట!

        గంటన్నరకు పైగా ఈ వీధి భద్రతా కార్యకర్తలు మరరంపంతో కోశారో – గొడ్డలే వాడారో - కత్తులకే పని చెప్పారో... గాని - వాళ్ల చొక్కాలు మాత్రం ఘర్మజలంతో తడిసి పోయాయి! చెట్టు నేల కూలింది; ఇంకా కొన్ని కొమ్మల పని మిగిల్నట్లుంది! బహుశా అది రేపు పూర్తి కావచ్చు!

        కార్యకర్తల ఈ వేకువ శ్రమ సంగతిని డబ్బుల్తో కొలవరాదు గాని, ఆ పనే చేయాల్సి వస్తే ఖర్చు నాలుగంకెల్లోనే ఉండవచ్చు!

        కనుక - ఇందుమూలముగా యావన్మంది వార్డు జనులకున్నూ, గ్రామ ప్రజలకున్నా మా అభ్యర్థనేమంటే –

        “ఏదీ తనంత తానై నీదరికి రాదు - శోధించి సాధించాలీ....” (శ్రీ శ్రీ)

        ‘మనకోసం మనమే’ మన ఊరి మెరుగుదల కోసం శ్రమించాలి!

        ఈ నాటి గ్రామ స్వచ్ఛ - సుందరీకరణ నినాదాల వంతు (BSNL) గౌరుశెట్టి నరసింహ నామధేయుడిది!

        రోజొక్కటి వస్తుందని

నా ఊరని – నా వీధని, నేను - నా దేశం అని,

హక్కులతో బాటు గ్రామ బాధ్యతలూ ఉన్నాయని

స్వచ్చ కార్యకర్తలతో సహకరించి చూద్దామని

ప్రతి పౌరుడు గుర్తించే రోజొక్కటి వస్తుందని...

- ఒక సీనియర్ స్వచ్ఛ కార్యకర్త,

  17.04.2023.