పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?

రమ్జాన్ ముందర – ఈద్గా సమీప స్వచ్చ - సుందరోద్యోగం (ఉద్యోగం = ప్రయత్నం!) - @2744^*

            శుక్రవారపు (21.4.23) శ్రమదానం కూడ యధాప్రకారమే 4.30 కు కాక - 4.17 కే – శ్రీనగర్ లోని ఈద్గా వీధిలో - ఏ12 మందితోనో ప్రారంభోత్సవం జరిగి, నిముషాల వ్యవధిలో - వడి వడిగా వచ్చిన, 15 మందితో – మొత్తం 27 మందీ తలా 100 నిముషాల వీధి పారిశుద్ధ్య/సుందరీకరణం జరిగిపోయింది!

            అసలీ నాటి శ్రమదానం చిల్లలవాగు దక్షిణపు గట్టు వద్దనే జరగవలసియుండగా – రంజాన్ ప్రార్ధనల నిమిత్తం ఈద్గా లోపల శుభ్రం చేసుకొంటూ - ముస్లిం సోదరులు దాని ముందరి వీధి పరిశుభ్రత కోసం నిన్న స్వచ్చ కార్యకర్తల్ని కలిసి రావాలనడమూ - నిరుడిదే సమయాన ఆరేడు రోజులు అక్కడే శ్రమించిన కార్యకర్తలు సమధికోత్సాహంతో ఈ వేకువ ఆ పని పూర్తిచేయడమూ జరిగిపోయాయి!

ఇక - నేటి వేకువ శ్రమదానం లెక్కల సంగతి :

- కార్యకర్తల చేతిలో బాగుపడిన వీధి సుమారు 60 - 70 గజాల వరకే గాని - అక్కడ దొరికిన గడ్డీ గాదం, చెత్తా చెదారం పెద్ద బండెడు!

- కారణం బేమనగా - ఇన్నేళ్ల స్వచ్ఛ సుందరోద్యమం తర్వాత సైతం కొన్ని మారుమూల వీధుల్లో ఇంకా చిన్న చెత్తకేంద్రాలుండుట, డ్రైన్లలో ఏ ఛండాలాన్నైనా విసిరే అలవాటు ప్రజల్ని వదలకుండుట! మరొక కారణము  - సుందరీకర్తల మనస్తత్వమే! (వాళ్లకి పైపైన శుభ్రపరచడం చేతకాదు – సశాస్త్రీయంగానూ, సమూలంగానూ ప్రతి అంగుళాన్నీ సుందర శిల్పంగా చెక్కుతుంటే - కాస్త ఆలస్యం కాక తప్పదు గదా!)

- ఆ 200 అడుగుల వీధిలోనే - కొన్ని చోట్ల ఖాళీ కొబ్బరి బొండాలు, పిచ్చి – ముళ్ల కంపలు, మధ్యాంద్ర దేశ కీర్తి ప్రతిష్ఠల్ని చాటుతున్న ఖాళీ మందు సీసాలు, టిఫిన్ పొట్లాలు, ఎండు పుల్లలు....

            అందువల్ల - ఒక ప్రక్క కత్తుల నరుకుళ్లు, చీపుళ్ల ఊడ్పులు, ప్లాస్టిక్ తుక్కుల ఏరుళ్లు, మురుగు కాల్వ గట్టు సుందరీకరణలు... వీటితోనే సూర్యుని ఆగమనమూ!

            ఇంకొక విశ్లేషణ మేమంటే: ఎత్తైన ట్రాక్టర్ మీద – మరింత ఎత్తైన తుక్కుల మీద నిలిచి, సర్దుతున్న కార్యకర్త ఒకాయన – మైకు పాటకనుగుణంగా - తుక్కు త్రొక్కడాన్నే నృత్య భంగిమలో చేస్తుండడం! (అదేమంత చెప్పుకోదగ్గ నాట్య నైపుణ్యం కాదు గాని – ఈ నిత్య శ్రమదానం కార్యకర్తలెంత సంతోషంగా చేస్తారో తెలియజేయగలదు!)

            మరో వంక 5.30 నుండి ఒక్కొక్కరు గాను, జట్లు గాను రమ్జాన్ దీక్షితులు వచ్చి, దర్గా లోపల శుభ్రపరచడం! చివరికి 6.00 వేళకు ఆ ప్రాంతం ఎలా మారెనంటే – ‘ఏ ప్రార్థనా ప్రదేశమైనా ఇంత చక్కగా ఉండాలి’ అనేంతగా!

నేటి శ్రమదాన సమీక్షా సభలో కొన్ని విశేషాలు:

1) ప్రముఖ ముస్లి౦ పెద్ద నసీం ఘోరీ ముమ్మారు గ్రామ స్వచ్ఛ సుందరోద్యమ నినాదాలు ప్రకటించడమూ, ఇంత సుదీర్ఘ - నిబద్ద – గుణాత్మక - స్వార్థరహిత – ఆదర్మ శ్రమదాన చల్లపల్లి కారకులైన స్వచ్ఛ కార్యకర్తల్ని – మరీ ముఖ్యంగా స్వచ్చ - సుందర డాక్టరమ్మ – డాక్టరయ్యల్ని పదే పదే ప్రశంసించడమూ –

2) రామకృష్ణ వైద్యుడైతే - 33 ఏళ్ల నాటి, బాబరీ మసీదు విధ్వంసక సందర్భ ‘అఖిలపక్ష - అఖిల వర్గ సభ’ లో నాటి మస్జిద్ కమిటీ అధ్యక్షుడు అమానుల్లాఖాన్ గారి ఆణిముత్యపు మాంత్రికవాక్యం – “రేపు బాబ్రీ మసీదు సంగతెలా ఉన్నా చల్లపల్లిలో మనమంతా సామరస్యంగానే బ్రదుకుదాం” గుర్తుచేసుకోవడమూ

3) ఇక నేనైతే - ప్రస్తుత పాపిష్టి దేశ - కాల పరిస్థితుల నేపథ్యంలో. ఒక అద్భుత సేవానంతర సమావేశంలో 74 మంది (27+47) పాల్గొన్న దృశ్యాన్ని మనసారా కీర్తించి - 33 ఏళ్ల నాటి మత సామరస్య – సౌమనస్య – అఖిలపక్ష సమావేశాన్ని గుర్తుచేయడమూ......

4) ఉభయ మతస్తులూ (దేనికీ చెందని – అసలే మతాన్నీ పాటించని కొందరం కూడ ఈ సమూహంలో ఉన్నాం!) పరస్పర శుభాకాంక్షలందించుకోవడమూ.....

            కార్యక్రమం చివర జనాబ్ నసీం ఘోరీ గారు స్వచ్ఛ కార్యకర్తలందరికీ రమ్జాన్ శుభాభినందనలతో పాటు సాంప్రదాయానుగుణంగా ఖర్జూరాల పంపకం కూడా చేశారు.

            చివరగా ‘రేపటి స్వచ్ఛంద శ్రమదాన కేంద్రం చెత్త కేంద్రం’ అనుకోవడమూ...

       ఆప్త బంధువుల రీతిని

ఏ దేవుళ్ళీ ఊరిని ఇంతగ దీవించితిరా?

ఏ నేతలు తమ ఊరికి ఈ మాత్రం శ్రమించారా?

ఆప్త బంధువుల రీతిని అండదండలిచ్చితిరా?

చల్లపల్లి స్వచ్చోద్యమ సచ్చరిత్ర వ్రాసితిరా?         

- ఒక సీనియర్ స్వచ్ఛ కార్యకర్త,

   21.04.2023.