పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?

రెస్క్యూ టీమ్ ప్రాభాత వీధి నవీకరణ చర్య - @2747^*

            సోమ (24-4-23), మంగళవారాలొస్తే ఆరేడుగురి వీధి శుభ్రతా/భద్రతా కృషి షరామామూలే గదా! ఉదాహరణకి గంగులవారిపాలెం – బండ్రేవు కోడు ఉత్తరపు గట్టు రోడ్డు - అప్పటికీ అది రాలిన పూలతో చినుకు పడి వెలిసిన తడీ - పొడీ స్థితిలో నాకైతే మళ్లీ మళ్లీ చూడాలన్నంత ముచ్చటగానే ఉంది!

            ఐతే, స్వచ్చ కార్యకర్తల - అందులోనూ రెస్క్యూ వాలంటీర్ల రూటే వేఱు - వాళ్ల చూపే పత్యేకం గనుక – గతవారం వీధి మార్జిన్ చెట్ల, పూల మొక్కల సుందరీకరణం ఈ వేకువ కూడ కొనసాగించారు!

            డజనుకు పైగా అదుపు తప్పుతున్న వాటిని క్రమబద్ధీకరించారు, అకాలంగా వచ్చిన స్వల్ప వర్షంతో కొన్ని నిముషాలు పని ఆగినా - వాళ్ల గంటన్నర శ్రమదానంతో ఆ వీధిలో ఇంకొన్ని గజాలు శుభ్రపడి, వ్యర్ధాలు ట్రక్కులోకి చేరి 6.00 తరువాత వీధి శుభ్ర – సౌందర్యాల్లో కొంత పురోగతి!

            ఈ 7.00 తదుపరి ఎవరైనా అటుగా వెళ్లేవారు కాస్త నిదానించి చూస్తే – ఇప్పటి దాకా మెరుగైన వీధి భాగానికి వంతెన దాక మిగిలిపోయిన చోటుకీ స్పష్టమైన తేడా కనిపెడతారు!

            సదరు ప్రయాణికులు “ఏమిటి వీళ్ల కాయకష్టం? రహదార్ల మీద, మురుగు కాల్వల్లోన, ఊరి ముఖ్య ప్రదేశాలన్నిట్లో 2747^* దినాల నుండీ కూటికో గుడ్డకో పనికి రాని ఇంత శ్రమదానం దేనికి?....” అని ఆలోచిస్తే గాని.....

            తక్కిన వేల - లక్షల ఊళ్లకూ చల్లపల్లికీ వ్యత్యాసమేమిటో - ఒక స్వార్ధ రహిత సుదీర్ఘ సామాజిక సామూహిక కర్తవ్యం విలువేమిటో గ్రహించగల్గుతారు!

            6.35 వేళ ఈ ఐదుగురు శ్రామికులూ నాబోటి పైమనుషులు ముగ్గురూ పద్మాభిరామం దగ్గర కస్తూరి శ్రీను మార్గదర్శకత్వంలో ముమ్మారు తమ స్వచ్చోద్యమాశయ నినాదాలను పలికి – శంకర శాస్త్రి సమర్పిత మర్యాదలందుకొని, గృహోన్ముఖులయ్యారు!

            రోజక్కటి రావాలని.

ప్రచారాలకై కాదని – స్వార్ధ మందులో లేదని

పదవీ వ్యామోహంతో పరుగులెత్తు పని కాదని

అది కేవల సామాజిక బాధ్యత మాత్రంగా నని

ప్రతి పౌరుడు తెలుసుకొనే రోజక్కటి రావాలని..... 

- ఒక సీనియర్ స్వచ్ఛ కార్యకర్త,

   24.04.2023.