పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?
ముగిసిన గంగులవారి పాలెం వీధి సపర్యలు - 2748*
కిలోమీటరుకు తక్కువగా ఉన్న ఆ వీధికి రోజూ 6-7-8 మంది రిస్కు తీసుకొని చేసిన సుందరీకరణ – క్రమ బద్ధీకరణ సపర్యచర్యలు (7/8 రోజులకు పైగా -) నేటి ఉదయం 6.30 కు ఫలప్రదమై, ఏమాత్రం సౌందర్య పిపాస కలవారి నైనా ఈ వేసవి కడ దాక అలరిస్తూనే ఉండగలవు.
అలాంటి సహృదయులు ఈ బాటపై నడుస్తూ హ్లాద మనస్కులైనపుడు - ఈ సుమ సుందర వాతావరణం వట్టి మాటల్తో సమకూడలేదనీ, వందల కొద్దీ శ్రమ గంటల కష్టంతో- నైపుణ్యంతో - చెమటలతో - స్వచ్ఛ కార్యకర్తల సంకల్ప సిద్ధేననీ గుర్తుచేసుకోవడమే న్యాయం!
"అగాధమౌజలనిధిలోన - ఆణిముత్యమున్నటులే
'కష్టాల' మరుగున దాగీ- సుఖమున్నదిలే
ఏదీ తనంత తానై - నీదరికి రాదు
శోధించి సాధించాలీ - అదియే ధీరగుణం”
అని ఒక సినీ (శీశ్రీ?) కవి చెప్పినట్లు -
ఈ శ్రమైక జీవన సంగీతాన్నీ - ఈ ఊరిసామాజిక, సామూహిక కర్తవ్య నిర్వహణ సౌందర్యాన్ని విజ్ఞులు పట్టించుకోకపోతే ఎలా?
ఈ వేకువ కూడ :
- వాతావరణం చల్లగా ఉన్నట్లు తోచినా, తాము కార్చిన చెమటల్ని సీసాలకొద్దీ నీటీతో భర్తీచేసుకొన్నారు!
- ఇద్దరు 60 + కార్యకర్తలు బాటను ఊడ్చారు!
- వాళ్లు తొలగించకపోతే ఒక మంచి చెట్టు కరెంటు కార్మికుల చిరాకుకు బలయ్యేదే!
- ట్రాక్టరు డోరు అంచున నిలిచి ఒకాయన సదరు చెట్టును సుందరీకరించిన వైనం చూసి తీరాల్సిందే!
పనులు ముగించాక 6. 35 కు మాలెంపాటి వైద్యుననుసరించి ఉద్యమ నినాదాలిచ్చారు!
అంతకుముందు తాతినేని వారి కుక్కుటాండ- పానీయాలను కూడ చవి చూశారు!
రేపటి బృహత్తర వీధి పారిశుద్ధ్య బాధ్యతలు బెజవాడ రోడ్డులోని ఆకుల దుర్గా ప్రసాదు సిమెంటు - నాపరాళ్ల దుకాణం దగ్గర ఆగి నిర్వర్తిద్దాం!
రెండు రెళ్ళు నాలుగు
రెండు రెళ్ళు నాలుగనే లెక్క ఎంత ఖచ్చితమో
మలయ పవన చల్లదనం మాట ఎంత వాస్తవమో
‘శ్రమ మూలమిదంజగత్’ సామెతెంత సార్థకమో
- ఒక సీనియర్ స్వచ్ఛ కార్యకర్త,
25.04.2023.