పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?

2749^* వ నాటి బెజవాడ బాట పారిశుద్ధ్యం –

            బుధవారం వేకువ - 6.06 నిముషాల దాక - అనగా గంట 45 నిముషాల పాటు జరిగిన స్వచ్ఛ వీరోచిత పోరాటమది! పోరాట యోధులు పాతిక మందే! అదీ ఎడతెగని ట్రాఫిక్ రణగొణ ధ్వనుల నడుమనే!

            అటు విజయా కాన్వెంటు మొదలు చండ్ర వికాస కేంద్రం దాక - 100 గజాల రహదారితో బాటు – తూర్పు వైపున్న డ్రైనూ, ఆక్రమిత బడ్డీ కొట్ల సముదాయ ప్రాంతమూ, దారి మార్జిన్ల మీది మొక్కల పాదులూ ఈ 35 కి పైగా పని గంటల వ్యవధిలో బాగుపడినవి!

            మరి, ఇందుకు గాను ఒడలు వొంచి, దుమ్మూ - ధూళీ పీలుస్తూ  చెమటలు దిగగారుస్తూ, ఊరి సౌకర్యార్థం శ్రమించిని పాతిక మంది స్వచ్ఛ - శుభ్ర కృషీవలుల మాటేమిటి? తమ వీధిలో దుకాణాల - గృహాల దగ్గర ఇందరింతగా శ్రమిస్తుంటే - పట్టించుకోని, సహకరించని వారి సంగతేమిటి?

            అసలా సంగతేమీ సరకు చేయక తమ సుదీర్ఘ ప్రణాళిక ప్రకారం నిర్వికారంగా, నిశ్చలంగా, రాగద్వేషరహితంగా తమ పని తాము చేసుకుపోతున్న ఈ పాతిక మంది కర్మవీరుల 26-4-23 వ నాటి రకరకాల పారిశుద్ధ్య ప్రయత్నము లేవనగా:

1) విజయాకాన్వెంటు ఎదుట – ప్రభుత్వ వైద్యశాల వీధి ప్రక్కన ముగ్గుర్నలుగురు 5.00 సమయానికే నేలను శుభ్రపరచి, మట్టి పరచి కొంగ్రొత్త అందం సంతరించిన తీరు,

2) డ్రైనులో దిగలేదు గాని, డజను మంది కత్తీ - దంతెధారులు కాల్వవ్యర్ధాల్ని బైటకు లాగి, పూల మొక్కల పాదుల గడ్డిని తొలగించి ఏ 30/40 డిప్పల గడ్డీ - చెత్తా - ప్లాస్టిక్ తుక్కుల్నో ట్రక్కులో నింపిన నేర్పు,

3) ఎగుడు - దిగుడు, గుంటల మయమైన రోడ్డును గంటకు పైగా వాహనాల్ని తప్పించుకొంటూ ఊడ్చిన నిపుణత,

4) బాట పడమర భాగాన్ని - ముఖ్యంగా 3 తూముల పూడికను తీసేందుకు సుందరీకర్తలిద్దరెంతగా శ్రమించారో – మురుగు కంపునెంతగా భరించారో - అందులో ఒకాయన జర్రున జారి కూడపడకుండ నిలద్రొక్కుకున్నాడో - అంతిమంగా వాన నీటి మడుగును సన్న కాలువ త్రవ్వి డ్రైన్లోకెలా మళ్లించారో - అదొక శ్రమదాన పాఠ్య గ్రంధం! ఇవన్నీ తొమ్మిదేళ్ల స్వచ్ఛ - సుందరోద్యమంలో మరీ క్రొత్త సంగతులు కాకపోవచ్చు; పడి లేవడాలూ – బట్టలకు మురుగంటుకోవడాలూ ప్రాత సంగతులేకావచ్చు; మరి ఈ పారిశుద్ధ్య/సుందరీకరణ ప్రయత్నాన్ని గ్రామస్తులికనైనా సీరియస్ గా పట్టించుకొంటారా అనేదే ప్రస్తుతాంశం!

            6.30 కి స్వచ్ఛంద శ్రమదానోద్యమ సందేశ నినాదాలిచ్చిన షణ్ముఖ శ్రీనివాసుడు గానీ – కార్యకర్తల కష్టాన్ని సమీక్షించిన రామకృష్ణ వైద్యుడు గానీ - ప్రముఖంగా ప్రస్తావించింది గుట్కా – ఖైనీ ప్లాస్టిక్ చిరు పొట్లాల వల్ల వచ్చే కాన్సర్ ప్రమాదాన్నే!

            చల్లపల్లి ఇరుగు - పొరుగూళ్లో 10 కిలోల గంజాయిని పట్టుకొన్న విషయాన్నెవరో ప్రస్తావించారు!

            తస్మాత్ జాగ్రత్త! పైమూడు మాదక – ప్రామాదిక ద్రవ్యాల పట్ల గ్రామ పెద్దలంతా పారాహుషార్!

            రేపటి మన శ్రమదాన సన్నద్ధత నడకుదురు బాట ప్రక్కన గల ‘ఇంధన నిలయం’ వద్ద నుండి ప్రారంభిద్దాం!

            ఇదేం ఖర్మ అనుకొనడే!

శ్రమదానం ఆయుధముగ - సహనం తన కవచంగా

ఉచ్చలు - పెంటల నడుమన ఉవ్వెత్తున దుర్వాసన

అనుభవిస్తు - శ్రమిస్తున్న అందరిలో ఇన్నేళ్లుగ

ఏ వాలంటరైనా “ఇదేం ఖర్మ అనుకొనడే!”

- ఒక సీనియర్ స్వచ్ఛ కార్యకర్త,

   26.04.2023.